icon_gotop
18+
autorisation
Войти | Регистрация
Время в Татышле
18:56
Пятница, 29 Марта
Рекламный баннер 990x90px top

Сюлэмаз крезьгур улэ

10:00 27.04.2017

Куеда ёросысь Бадӟым Гондыр гуртысь Физая Сабирьяновна Гарифуллина лулчеберет ӧре 1990-тӥ арын вамыштэм: «Тюрагай» фольклорно-этнографической ансамбле ветлыны кутскем. Янаул ёросысь Вылысь Барабановка гуртын вордӥськыса будэм нылаш школазэ йылпумъяса, Пермьысь гурт хозяйствоя институтын зоотехниклы дышетскем. Тодон-валан басьтыса, «Заря» колхозын тыршем. Улон сюресэз солэн Янаул ёросысь Кельдасан гуртысь (али со быремын ни) Фирдаус Мингалиевичен герӟаськем. 1984-тӥ арын соос шудо семья кылдытӥллям. Кузпалъёслэн Марина нылзы, Антон но Алексей пиоссы вордӥськиллям. 1987-тӥ арын Гарифуллинъёс Бадӟым Гондыре улыны выжиллям.

2003-тӥ арын Физая Сабирьяновна татысь культура юртын методист-хореограф луыса ужаны кутскем. Солэсь азьвыл вуз карон юртын, почтаын ужам. Вераны кулэ, котькыӵе удысын мед тыршоз, ужзэ со валаса, тодыса, ӟеч быдэсъям.

Дас ньыль ар ӵоже Физая Сабирьяновна «Тюрагай» удмурт калык ансамблен кивалтэ ни. Кыӵе гинэ ужрадъёс, конкурсъёс Пермь шаерын ортчо, тюрагайёс котькудаз пырисько, вормонъёслы кузё луо. Башкортостанын, Удмурт Республикаын но соосты ӟеч тодо. «Играй, гармонь!» телепередачае но «Тюрагай» кык пол вуылӥз ни. Со сяна, Физая апай «Уӵыпиос» ансамблен кивалтэ. Отчы нылпи садысь пичильтыкъёсысен 11-тӥ классозь нылпиос ветло.

- Шумпотӥсько, дышетэм «уӵыпиосы», школаез быдтыса но крезьгур дуннелэсь уг палэнско. Кылсярысь, Даша Еремеева. Со УдГУ-ын тодон-валан басьтэ, отысь ансамбле ветлэ, - вера Физая Сабирьянова.

- Кузпалылэн пичиысен кырӟаны-эктыны талантэз луэм. Солы школа бере ик культураен герӟаськем ӧнер быръёно вылэм, - вера Фирдаус агай.

- Сыӵе быгатонлыкъёсты кинлэсь ке выжемын-а? – юасько Физая апайлэсь.

- Анкай туж шулдыр кырӟа вал, атай арганэн шудылӥз, - вера со.

Улон огвыллем гинэ уг азинскы: лобан дыръёс но, усён, юн шуккиськон вакытъёс но, ыштонъёс но луо. Гарифуллинъёслэсь семьязэс но куректон палэнтӥ ортчымтэ. Жаляса верано, яратоно Антон пизы пӧламы ӧвӧл ни.

- Кӧня ар улӥсько, сомында мон паймемысь уд дугдӥськы Физаялэн талантэзлы, кужымезлы. Котькыӵе уж борды мед басьтӥськоз, ваньзэ быгатэ. Гужем бакчамы пӧртэм-пӧртэм сяськаосын шобырске, пӧраны но со туж усто. Спортэн но эшъяське, - вера Фирдаус агай.

Физая Сабирьяновналэн ужезлы кивалтэт но вылӥ дунъет сётэ. Солэн тыршемезлэн емышъёсыз – басьтэм тау карон гожтэтъёс, данъян грамотаос, конкурсъёсын вормонъёс.

- Физая Сабирьяновна – туж таланто адями. Со Бадӟым Гондырысь культуралэсь данзэ ӝутыны быгатӥз. Бадӟым тау солы ваньмыз понна, - вера Бадӟым Гондыр гурт поселенилэн администрациеныз кивалтӥсь Фидаиль Гайтиев.

Физая апайлэсь мылкыдтэм дырзэ адӟеме ик ӧвӧл. Котырысьтыз адямиосызлы со выль кужым сётэ. Пичиосын но, арлыдоосын но огкыл капчиен шедьтэ. Котькыӵе шуг-секытъёс ке но луизы сюрес вылаз, со уг сётӥськы, шумпотыса пумита но келя кунооссэ, котькинлэсь со мылкыдзэ ӝутыны дась. Со бордысь кыӵе ке шунытлык лыктэ кадь.Семьяез но солэн туж творческой. Фирдаус агай но «Тюрагае» пыриське, внучкаоссы но песяй-песятайзылэсь адӟем карыса, сцена вылэ кыстӥсько.

        Миляуша БУЛАТОВА.

Пермь шаерысь Куеда ёрос.

6314

Оставить сообщение: