Быдӟымналын куриськизы, огазьын шулдыръяськизы

Быдӟымналэз сӥлы карыса, вӧсясьёс – Сади Газиев, Валерий Галиев но Раиф Гаязов – Инмарлы вазиськизы. Соосын ӵош вань люкаськем калык ас понназ куриськиз. Та нуналэ соос шудбуро, тыро улон, тазалык, сайкыт инбам но вань ӟечсэ куризы. Куриськемзы бере удмуртъёслэн бадӟым праздникенызы ӟечкыланы кыл сётӥськиз Ямады гурт поселенилэн администрациеныз кивалтӥсьлы Гузалия Талиповалы, БР-ысь удмуртъёслэн НКЦ-енызы кивалтӥсьлы, «Ошмес» газетлэн редакторезлы Салимьян Гарифуллинлы, БР-ысь удмуртъёслэн НКЦ-енызы кивалтӥсьлэн  воштӥсезлы Юрис Саитовлы, Камсьӧр удмуртъёслэн огазеяськонэнызы кивалтӥсьлы, Андреевкаын вордӥськем но будэм Флюра Чибышевалы. Гузалия Магдановна ӟечкыланаз удмуртъёслэсь эшлыко, куноосты гажась, ужрадэ сюлмысь дасяськись луэмзэс пусйиз. Салимьян Гарифуллинович но Юрис Саитович ужрадэз мыло-кыдо ортчытонэ пыриськисьёсты Валерий Галиевез но Гузалия Талиповаез данъян грамотаосын, Гузалия Губаеваез, Фаниля Гаязоваез, Рида Хасфатуллинаез тау каронъёсын пусйизы. Флюра Ахметовна Юрис Саитовичлы, гуртоосызлы сям-йылолъёсмес утьыны сюлмаськемзы понна тау карон кылъёссэ вераз.

Андреевкаын вордӥсь-кыса будэм но али дыре Пермь шаерысь Куеда ёросысь Бадӟым Гондырын улӥсь Антонина Исламова вордӥськем гуртэзлы сӥзьыса гожтэм кылбурзэ кузьмаз. Озьы ик та нуналэ андреевкаос Быдӟымналэз ортчытон йылолэз возьматӥзы. Нина апайлэсь пиналъёс та нунал сярысь трос тунсыкозэ тодӥзы. Кылсярысь, Быдӟымналлы котьку выль дэрем вуро вылэм. Вирнунал ӝытэз кулон потон уй шуиллям. Со ӝыт котькуд адями аслэсьтыз юртсэ кортэн котыртэ, шайтанъёс медаз пыре шуыса. Та ӝытэ ик мунчо эстыса, азвесь коньыен пыласькыса, кулэмъёсты буре вайыса дасясько вылэм. Нош ӵуказеяз быдэс семья тыл вылтӥ тэтчам. Быдӟымналэ куриськем ӝук сииллям, курегпуз питыръяса шудӥллям.     

Быдӟымнал трос удмурт ансамбльёсты но кырӟасьёсты люказ. Ужрадэз нуисьёс Анида Нурисламова но Ильнара Исламова котькудзылы кыл сётӥзы. Та нуналэ андреевкаос доры шулдыр эктон-кырӟанъёсын Татышлы ёросысь Вязовкаысь «Уӵы ныл», Янаул ёросысь Каймашабашысь «Капчи мылкыд», Барабановкаысь «Азвесь гур», Шудекысь «Тюрагай», Вуж Варяшысь «Югдон», Нанядыысь «Инвожо» ансамбльёс, Янаулысь Алмаз Раянов, Ижевскысь Александр Минеахметов но мукетъёс вуизы. Кузёос асьсэос но вуэм кунооссылы ӟеч мылкыдзэс кузьмазы. Со сяна, андреевкаос пӧртэм пӧрам-пыжиськемъёсын тырмем ӝӧк дасяллям, тылскем вылын ческыт ӝук пӧзьтӥллям.                              

Марина НИКОЛАЕВА.

Янаул ёрос.