Нылпи садэ 35 пиналъёс ветло. Соос понна «Ягодки» но «Непоседы» группаос кылдытэмын. Татын тупаса, тыршыса, огкылысь луыса ужало воспитательёс Людмила Чепкасова, Инга Зайнетдинова, Лариса Козекова, Нина Петрофанова, Вера Сухоплюева, Марина Менгараева (крезьгуръя кивалтӥсьлэсь но ужзэ быдэсъя). Пичиосты ческыт сюдон сярысь сюлмаське пӧзьтӥськись Ирина Валиахматова. Завхозлэн ужез Фидалия Шакирова вылын.
Нылпи сад усьтӥськон арын сӥзьыл татчы воспитатель луыса ужаны Нэля Минигулова лыктэм. Туннэ нуналэ но со татын. Кызь арлэсь кема воспитательын тыршемез бере, Нэля Менгалиевнаез нылпи садэн кивалтӥсе юнматӥллям.
- Воспитательёс котькуд нылпилы, солэн быгатонлыкъёсызлы бадӟым саклык висъяло. Пичиослэсь тазалыксэс кыдатон сярысь туж сюлмасько. Ёросын радъяськись ужрадъёсы но ӵем пырисько, призо интыослы кузё луо, - вера кивалтӥсь. Соослэн вормонъёссы сярысь борддоръёсысь диломъёс, данъян грамотаос, тау карон гожтэтъёс, ӟечкыланъёс но верало.
- Нылпи садмы бадӟым, чылкак выльдэмын ке но, татчы ветлӥсь пичиослэн лыдзы, жаляса верано, арысь аре кулэсме. Егитъёс гуртысь кошко, егит семьяос но кулэсмо. Кылсярысь, кылем арын Гожанын вить нуны вордӥськиз, нош дас кык семья палэнэ улыны выжиз. Азьланяз мар луоз, тодмо ӧвӧл, - нылпи садлэн вуоноез сярысь сюлмаськыса вера Нэля Менгалиевна.
Гожанысь нылпи сад – со мусоесь, визьмоесь, шаплыесь, задоресь, чупресэсь, шудыны яратӥсь, котьмаин тунсыкъяськись, котьку капчи мылкыдо нылпиос. Татын ужасьёс соос мед азинскозы, тазаесь мед будозы шуыса, вань кужымзэс поныса тыршо. Соин ик анай-атайёс нылъёссэс но пиоссэс оскымон киосы кышкатэк кельто.
Миляуша БУЛАТОВА.
Пермь шаерысь Куеда ёрос.
Оставить сообщение: