Кузпалъёслэн тужгес бадӟым шудзы – куать нылпиоссы. Семья шудо луэ соку, куке корка тыр жингрес нылпи куара чузъяське. Шуо, нылпиос, нунокъёс ке вӧзын, дорын шулдыр, шуныт, мылкыд но капчи. Туннэ нуналэ Гильманшинъёсты внукъёссы сяна, правнукъёссы но шумпотто ни.
Семён Губаевич Альгаын вордскыса будэм. Та шулдыр, нюлэсэн котыртэм гуртын ик ортчем солэн гумырез. Нош Шамсикаятэзлэн вордӥськем гуртэз - Бальзюга.
Арлыдо кузпалъёслэн кылъёссыя, вакытаз Альга котьмалы узыр вылэм. Калык парсь, кролик фермаосын ужам, вал вордон гид но бадӟым вылэм. Жаляса верано, али соос быремын.
- Гуртысь егитъёсты уд ни пумита, уж луымтэен, соос палэнэ кошко, кытысь уж шедьто, отчы ик выжы лэзё, - вера Ш. Гильманшина.
Уж сюрессы кузпалъёслэн колхозын ортчем. Кыӵе уж ӵекто, сое быдэсъяллям. Мукетъёслы адӟем карымон тыршыса улӥллям соос, трос пудо, муш вордӥллям. 84 аресаз вуыса но, Семён Губаевич яратоно ужъёсызлэсь – муш вордонлэсь, вал утёнлэсь – палэнскымтэ на.
- Вал утёнэз капчи ӧвӧл, но сотэк асме китэк, пыдтэк кадь потӥсько. Соин ик вордыны тыршиськом ини, - вера С. Гильманшин.
Кузпалъёс вӧзын - Людмила нылзы. Ӵукна соос нылзэс бускель Улысь Балтач гуртэ ужаны келяса кылё, ӝыт солэсь бертэмзэ чидатэк витё. Ог-огзылы кенешчи но, эш но, юрттӥськись но луыса уло Гильманшинъёс. Нош праздникъёсы соослэсь юртсэс куное вуэм нылпиоссы, нунокъёссы шулдырто.
1959-тӥ арысен ваче ки мынӥсь кузпалъёслэн ог-огзылы осконзы арысь аре юнмам гинэ, котьма медло – соос ӵошен луиллям, шумпотонъёссэс но, шуг-секытъёссэс но шори люкылӥллям.
- Улонлэн турлы дырыз луэ. Секытлыкъёсты но адӟиськиз ини. Тулыс Танып шур кузя кор лэзьылыны но ветлӥ. Кык толэзь йӧ вылын улӥм. Кылем вуысь корез вуэ пырыса поттылӥськом вал. Тазалык сярысь малпан луымтэ ини, - шуэ Семён Губаевич.
Кузпалэз ватса:
- Нылпиос будыку пызь ӧй вал. Пермь шаерысь Чернушкае пызь утчаса мынӥськом. Отысь но шедьтыны шуг вал, тодмоосыд пыр басьтӥд ке гинэ.
Улон – со одӥг бугоре биниськем шундыё но пилемо нуналъёс, вормонъёс но ыштонъёс, пумиськонъёс но люкиськонъёс… Ог-огедлы тыбыр пыкет луыса гинэ улӥд ке, улон каньыл азинске, яратон, валан, оскон адямиез шудо каре.
Миляуша БУЛАТОВА.
Татышлы ёрос.
Оставить сообщение: