icon_gotop
18+
autorisation
Войти | Регистрация
Время в Татышле
07:24
Четверг, 5 Августа
Рекламный баннер 990x90px top

Секытлыкъёс сётӥсько кужмоослы

2017-02-02

Пумиськиллям кык ӝожомись сюлэмъёс, матысьгес тодматскемзы бере, улон сюрессэс герӟаллям. Удмурт Элькунысь Наталья башкир музъемысь удмуртъёс доры вуэм. Озьы Николай Викторовичлэн Ирина нылыз но Виталий пиез анаё луиллям, нош кузпалызлэн нылыз, Надя, Николай Викторовичез «атай» шуыса вазиськем. Кыкетӥ шудзэс шедьтэм кузпалъёслэн пизы вордӥськем.

- Вакыт туж ӝог ортче. Али гинэ вал кадь Наташаен тодматскем дырмы. Лыдъяно ке, улон сюрес кузя 23 ар артэ вамышъяськеммы ни. Женя пимы али Белебейысь гурт хозяйствоя техникумын дышетске. Армие но ветлыса бертӥз, дышетсконзэ азьланьтыны малпаз. Ми понна со туж бадӟым шумпотон. Солдат улон пыр потэм пиос тросэз дышетсконзэс кушто угось, - малпанъёссэ шарая Н. В. Константинов. – Бадӟымъёсыз нылпиосмы куиньназы ик пыд йылазы йыгмыт султэмын ни.

Школае вамыштэм дырысеныз 41 ар ортчем ни. Дышетон сяна, Николай Викторович дас вить ар ӵоже школаен кивалтэм.

- Школалэн зданиез пичи, вуж вал. Выль школа ӝутон борды басьтӥським. Вань ужез киын быдэстоно вал. Шифер луымтэен кӧня курадӟим, кытчы гинэ ӧм вуэ сое утчаса. Тямыс ар ӝутӥмы школаез. Кыӵе шумпотон вал выль школае выжон. Классъёс югытэсь. Но… Одӥг ар но ӝыны дышетскеммы бере, школамы ӝуаз, электр проводка бордысь тылпу ӝутскем шуизы. Мастерскойлэсь юртсэ огдырлы школа карим. 1993-тӥ арын выль, али дышетсконо школае выжим. Та зданиез ӝутонэ но кужыммэ понӥ. Огкылын вераса, татын вордӥськи, татын будӥ, татын ик пересьми, - шуэ арлыдо дышетӥсь.

Школа – со нимысьтыз государство. Кӧня солэн ужез, нимысьтыз куронъёсыз. Николай Викторович кивалтон вакытэ Купченей школаын удмурт кылэз уг дышето вылэм. Нылпиос анай кылзылы дышыса мед будозы шуон понна, удмурт кылъя но литературая урокъёсты радъян вылысь, директорлы кӧня бызьылоно луиз меда? Созэ дышетӥсь ачиз гинэ тодэ.

Гуртын улонэз капчи ӧвӧл. Котькыӵе аръёсы но Констанинов кузпалъёс трос пудо вордӥллям, сад-бакча утялтӥллям. Али но соос куинь скал вордо, кык – кунян, кызьлэсь трос - ыж, азбар тыр чипы-курегъёссы. Наталья апай, гуртазы юн хозяйство луыку, кунян утисьын ужам. Та дыре со юрт котыраз берга. Бадӟым хозяйствоез луэм кышномуртлы дораз но уж тырмыт.

Берытскыса учконо ке, Николай Викторовичлэн кужыменыз кӧня ужъёс лэсьтэмын, кӧня нылпиослы со тодон-валан сётэм. Али но яратоно уженыз уг люкиськылы. Ӵукналы быдэ тодмо, трос пол лёгам сюресэз сое нылпиос доры вуттэ.

Улон. Кыӵе гинэ эскеронъёс со уг сёт адямиослы. Секытлыкъёс кужмоослы сётӥсько, шуо. Чидась сюлэмо адямиос котьмае вормыса пото, азьланяз соосты шудо улон вите.

Миляуша БУЛАТОВА.

Ермекей ёрос.  

1418

Оставить сообщение:

НАШИ ПАРТНЕРЫ