Таӵе амалэн йыртэмасьёсын нюръяськонъя туэ бадӟым ужъёс нуиськозы. Со понна ОНФ (общероссийский народный фронт) «Генеральная уборка» экологической проект кылдытоз. Со шаерысьтымы жуг-жаген тырмытэм интыосты шараяны юрттоз. «Туннэ Россиысь тросэз жуг-жаг тырон интыос вань куронъёсты тӥяса кылдытэмын. Со выллем интыос 20 сюрслэсь трос лыдъясько. Соос пӧлысь ӝыныез кышкытлык кылдыто. Выль проект юнме «Генеральная уборка» нимамын ӧвӧл. Ми жуг-жаген тырмытэм интыосты шараян сяна, соосты тазатон сярысь сюлмаськом. Со понна вылӥ кивалтэтъёсы вазиськом, уж борды волонтёръёсты кыском», - вера Кун Думаысь инкуазья но котыр улосэз утёнъя комитетэн кивалтӥсь Ольга Тимофеева. Солэн кылъёсызъя, проектлэн валтӥсь ужпумез – калыкен ивортэм жуг-жаг тырон интыос сярысь кивалтэтлы вуттон. «Генеральная уборка» проект улсын «Интерактивная карта свалок» кылдытозы. Отчы Россиысь 85 регионъёс пыртэмын луозы. Котькуд мылкыд карись сайтын жуг-жаг сярысь ивортыны быгатоз. Берло, эскеронъёс ортчытэмзы бере, сое картае пыртозы.
Инкуазез но нюлэсъёсты утёнэн герӟаськем ужпумъёсты эскеронъя центрысь экспертлэн Дмитрий Мироновлэн верамезъя, Калык фронтлэн ужаз пыриськисьёс куд-ог интыосысь жуг-жагез асьсэос тазатозы. Со понна акциос, субботникъёс радъялозы. Нош бадӟым кужымез кулэ карись интыос понна кивалтӥсьёс кыл кутозы. Со пумысен «Зелёный патруль» огазеяськонлэн кивалтӥсез Андрей Нагибин шуэ: «Туннэ интыысь кивалтӥсьёс пӧлысь тросэз уг валало, законэз тӥяса кылдытэм жуг-жаг тырон интыосты ватоно ӧвӧл шуыса. Бакчаосазы люкам жуг-жаг сярысь но ивортыны тыршоно». «Зелёный патруль» огазеяськон «Интерактивная карта свалок» проектэ пыриськоз. Соос вань жуг-жаген тырмытэм интыос сярысь калыклы ивортыны дась. Кылем арын «Зелёный патруль», кылсярысь, Орёл, Омск, Волгоград, Краснодар шаерын эскерон ортчытӥз. Туэ но соос котькуд регионэ потыны дась. Соин оскон кылдэ: та выллем проектъёс радъяськыку, калык жуг-жагзэ нюлэскы, сюрес дуръёсы уз кушты. Со понна нимысьтыз чаклам интыос вань угось. Куддыръя пичи жуг-жаг но котыр улослы бадӟым кышкытлык кылдытэ.
Дасяз Ольга НИГАМАТУЛЛИНА.
Оставить сообщение: