«Тюрагай» но Заволокинъёс

Куамын ар ӵоже ини «Играй, гармонь» программа Россилэн пӧртэм-пӧртэм сэрегъёсысьтыз таланто арганчиосты, калык кырӟанъёсты, такмакъёсты быдэсъясьёсты утча, пӧртэм калыкъёслэсь узыр культуразэс возьматэ. Пермь шаерысь усточиос но телепередачае пыриськылӥзы ни. Соос пӧлын луиз «Тюрагай» удмурт калык ансамбль но.

- Ми туж шумпотӥськом, ужрадэ вуылӥм шуыса, котькуд адями телевизионной передачае уг шедьы угось. Ӧтён басьтэм бере ик, ми дасяським но сюрес вылэ потӥм. Анастасия но Захар Заволокинъёсын ми кемалась тодмо. Соосын ньылетӥ ползэ пумиськылӥм ни. Тодматским Кудымкарын ортчем финн-угор фестивальын, бӧрысь Юрлаын но Новосибирскын пумиськылӥм, - вера ансамбле пыриськись Вячеслав Менликаев.

Съёмкаос Осаысь культура юртын ортчизы. Тюрагайёс «Здравствуй, милая моя» кырӟанэз быдэстӥзы. Бадӟым Гондыр культура юртысь егит ӧнерчи – арганчи Эдуард Ахметзянов аслэсьтыз быгатонлыксэ усто возьматӥз.

Осаысь бадӟым гондыръёс ӝутскем мылкыдын, выль малпанъёсын бертӥзы. «Тюрагай» ансамбль шутэтскыны дышемын ӧвӧл, азьпалан соосты выль ужрадъёс витё.

Дасямын «Куединский вестник» газетысь материалъя.