icon_gotop
18+
autorisation
Войти | Регистрация
Время в Татышле
23:24
Четверг, 28 Октября
Рекламный баннер 990x90px top

Ортчем аръёссы сярысь жаляны дырзы ӧвӧл

2017-01-12

Ужез гажась калык

Удмуртъёсты нюлэскын улӥсь калык шуыса верало. Вашкала дырысен соос музъем утялтӥллям, юртъёс ӝутӥллям, пудо вордӥллям, етӥн будэтӥллям, куиськиллям, усто пужыяськиллям. Удмуртъёслэн культуразы туж узыр.

Удмуртъёс куно пумитаны быгатэменызы но висъясько. Соос сабырлыесь, чидасесь, кутскем ужзэс пумаз вуттӥсесь. Тросэз тодосчиос соослэн ужез гажась, капчи мылкыдо, кырӟаны-шулдыръяськыны яратӥсь луэмзы сярысь паймыса гожъяллям. Сыӵеесь ик купченейёс но: ужаны но, шутэтскыны но быгато. Ёросысьтымы одӥгаз гуртын но Купченеевоын мында ӝутӥськись бригадаос, мушкасьёс, бакча сиён, емыш но узьым будэтӥсьёс ӧвӧл, татын юртлы быдэ тракторъёссы вань. Гырон-кизён вакытэ, турын дасяку соос котьку ог-огзылы юрттӥсько… Огкылын вераса, удмуртъёс зарезь дурын инкуазьлэсь воштӥськемзэ витьыса уг пуко, саесъёссэс пужалляса семьязы, гуртсы понна тыршо.

Экто ваньзы!

Ортчо нуналъёс, аръёс. Куддыр мӧзмыт но луэ. Егит дыр тодэ лыктэ. Но кылем арын 65-зэ пусъем «Тодэ ваён» калык ансамбле пыриськисьёслэн мӧзмыны, ортчем аръёссы сярысь жаляны дырзы ӧвӧл. Песянайёслэн котьку мылкыдзы капчи: серекъятозы но соос, кырӟатозы но, эктытозы но. Калыкын юнме вераллямтэ, лэся, сюлэмшугед вань ке, сое такмаклы пӧрмыты шуыса, пыдъёсыд висё ке – тыпыртонэз бырйы!

Ансамбльлэн ужаз тросгес пырисько Елизавета Яковлевна Михайлова, Екатерина Антоновна Мокеева, Анастасия Романовна Пургина, Александра Ильинична Бектель, Ефросинья Николаевна Макарова. Ваньзы соос куатьтон аресэз вамыштэмын ни. Нош тужгес кема «кырӟамъёс» - Александра Ильинична (80 арес) но Ефросинья Николаевна (87 арес).

Ансамбль аспӧртэмлыко вылэм. Нырысь ӝыт пуконъёсы люкаськылӥллям, собере – лыдӟиськон коркаосын,  нош 50-тӥ аръёсы гуртын клуб усьтӥськем бере – отчы кыстӥськиллям. Коллективез балалайкаен, гитараен, арганэн шудӥсьёс данъяллям. Прокофий Мельник ас киосыныз тупатэм крезен шудэ вылэм, сыӵе быгатонлыко адямиос гуртын вылӥллямтэ ни. Мандолинаен усто шудэменыз паймытъям Анатолий Илларионович Ефремов. Балалайкая усточи луэм Нина Ивановна Тимофеева. Гитараен матысь эшъяськиллям Алексей Кузьмич Никитин, Валерий Васильевич Медведев но мукетъёс. 

Кут кутчаса – Уфае

Нырысьсэ ансамбль ужрадэ пыриськиз 1951-тӥ арын южтолэзе. Соку Уфаын «Дружба народов» фестиваль радъяськем. Ансамбле пыриськисьёс пыдъёсазы кут но колоша кутчаса кузь сюрес вылэ потӥллям. Иван Бектельлэн кутъёсыз чидаллямтэ. Солы пыдкутчан утчано луэм, мырдэм сапегъёс шедьтӥллям, но соос кыксы ик одӥг пыдэ кутчано, пе. Ваня агай со сапегъёсын ик потэм бадӟым сцена вылэ.

Со аръёсы гуртын улон аспӧртэм сюрестӥ азинскем – сям-йылолъёсты, ӝыт пуконъёсты, тунаськонъёсты сӥлы кариллям… Но огдыре ваньмыз вунэм-бырем. 1961-тӥ арын школаын удмурт кылэз дышетэмысь дугдӥллям (1990-тӥ арын гинэ анай кылэз дышетонэз выльысь улӟытӥллям). Огзы бӧрсьы огзы песянайёс улонысь кошкиллям. Гурт сирота выллем кылем. Ӝытъёссэс ваньзы доразы, телевизор азьын, ортчытъяллям. Ансамбль но «кысэм».

Вашкалазэ утись

Ермекей палъёсысь удмуртъёслэсь культуразэс, сямъёссэс но йылолъёссэс, кыллэсь пӧртэмлыкъёссэ утёнлы бадӟым саклык висъя Ермекей ёросысь удмурт огазеяськонэн кивалтӥсь Анастасия Николаевна Вождаева. Со луэмен купченейёс республикаямы улӥсь удмуртъёсын, РФ-ысь вань удмуртъёслэн «Удмурт Кенеш» ассоциациенызы шуныт кусыпъёс возё.

- Адями ас калыкезлэсь культуразэ уг тоды ке, сое уг ке шӧды, со ассэ удмурт шуыны уг быгаты, - озьы малпа вылэм 16 аресъем Настя. Соку ик нылаш ас вылаз бадӟым ныпъет басьтэм – калыкезлэсь ышись культуразэ улӟытонэз но ӝутонэз. Ужез секыт ке но вылэм, шонер сюрестӥ мынэмзэ тодэм. Ассэ со данъяськымон выжызэ азинтӥсен лыдъям. Атаез ӝутӥськись вылэм, анаез нянь пыжем. Пересь песятайёсыз кырӟаны усточи вылӥллям. Со дырысен ик Настя апайлэн лулпуш нюжаосыз вашкала ӵыжы-выжыосызлэн шаеренызы – Удмуртиен герӟаськем. Али Анастасия Николаевналы 66 арес. Соос пӧлысь куатьтонзэ со «Тодэ ваён» ансамбльлы сӥзем.

Берлань вуоное

Арысь аре коллективе выль талантъёс вуылӥллям. Егитъёсты дышетоно, эшъяськытоно, тодыса дӥсятоно. Тӥни соку ик пересь песяйёслэсь сандыкъёссэс усьяса, отысь куэм дӥськутъёсты поттылыны кутскиллям. Вашкала сямъёсты, йылолъёсты тодазы вайылӥллям, вашкала кырӟанъёсты но эктонъёсты дышетон борды басьтӥськиллям. Купченейёслэн кырӟанъёсын «шыкыссы» узыр вылымтэ, соин ик ансамбле ветлӥсьёс бигер, ӟуч кырӟанъёсты удмуртэ берыктыса кырӟаллям. Ваньзы валало вылэм, озьы кыдёке уд мыны шуыса…

Анастасия Николаевна Вождаева со дыре Купченеево сельсоветлэн исполкоменыз кивалтэ вылэм. Дас ньыль кузя люкаськыса, купченейёс Удмуртие фольклор люканы, отысь ӵыжы-выжыосынызы тодматскыны мыныны малпаллям. Со вылэм 1989-тӥ арын шуркынмон толэзе. Коньдон люкаса, соос автобусэн Ижевске вуиллям. Жаляса верано, отысь вуз карон юртъёсысь но пластинкаос, кассетаос шедьтыны шуг вылэм. Культурая но дышетонъя министерствое удмурт кылъя но литературая учебникъёс пумысен юалляськыны мынӥллям. Озьы тупам ук, со нуналэ «Ижмаш» заводын композиторлэн Геннадий Корепанов-Камскийлэн юбилеезлы сӥзем концертэз ортче вылэм. Купченейёсты сцена вылэ ӧтиллям. Соос сое гинэ витё вылэм: Иже купченейёс балалайкаосынызы, гитараосынызы мынӥллям, озьы ик сцена вылэ потӥллям. Бӧрысь коллектив Удмурт радиоын чузъяськем.

Со дырысен «Тодэ ваёнлэн» улонэз инметӥ яркыт пиштыса мынӥсь кометалы кельшыны кутскем: нуналлы быдэ радъяськись репетициос, фестивальёс, смотр-конкурсъёс. Тани ансамбльлэн куд-ог дано вакытъёсыз: Поволжьеысь калыкъёслэн фестивальзылэн лауреатэз (1982, Уфа), Финн-угор егитъёслэн ассоциацизылэн III Конгрессаз пыриськон (1995, Сыктывкар), «Башкортостан – жемчужина Урала» калык творчествоя форуме пыриськон (2005, Агидель), Лулчеберетлэсь арзэ йылпумъянлы сӥзем гала-концертэ пыриськон (2015, Уфа). Нош ёрос но зональной конкурсъёсын вормонъёсыз «Тодэ ваёнлэн» лыдъяса быдтонтэм.

Ермекейёслэн татышлы музъемын улӥсь удмуртъёсын герӟаськем культурая сюрессы но туж тунсыко. 1982-тӥ ар. Купченеево клубын тупатъян ужъёс лэсьтоно вал. Республикаысь Культурая министерство стройматериал басьтыны ӵектэм Татышлы ёросысь. Кыӵе шумпотон: Татышлы ёросысь удмуртъёс 14 гуртъёсын огӵошгес уло! Кӧня ке толэзьскын «Тодэ ваён» ансамбль концертэн Ивановка гуртэ вуылэм, эшъяськон кусыпъёссэс юнматон вылысь.

Одӥг семьяын выллем

Крезьгурлы синмаськем адямиос одӥг гердэ биниськемын, соосты «Тодэ ваён» ансамбль огазея. Соос вашкала удмурт улонэз пырыосын-пырыосын люкало. Сцена вылэ потыса, ансамбле ветлӥсьёс вашкала дӥськутъёссэс возьмато, удмурт праздникъёссы - «Пӧртмаськон», «Йӧкелян», «Гуждор», «Гуршида» - сярысь мадё. Шумпотымон, та ужрадъёс сярысь пичиос но егитъёс тодо.

Туннэ нуналэ ансамбле пыриськисьёс вашкала дӥськутъёссэс, чеберъяськонъёссэс «улӟытон» бордын тыршо. Котькинлэн аслэсьтыз дӥськутсэ нуллэмез потэ. 80-тӥ аръёсы Купченеевоын вуриськон цех ужа вылэм. Соин ик татын тросэз вуриськон амалъёсты ӟеч тодо. Вуоноын песянайёс дасям дӥськутъёссэс внучкаоссылы кузьмалозы.

1995-тӥ арын Финляндиысь этнограф Мэрья Сало Купченеевоын фольклоръя материал люкам. Удмурт калык дӥськутъёслэн эскизъёссылы Эстониысь но татчы вуылӥллям. Нош 20 ар талэсь азьло гуртын выль «Зангари» ансамбль кылдэм (кивалтӥсез Мария Константинова). Зангариос – «Тодэ ваён» калык ансамбле ветлӥсьёслэн внукъёссы но внучкаоссы, удмурт сям-йылолъёсты азинтӥсьёс.

Энже ШАФИКОВА.

(Басьтэмын «Панорама Башкортостана» журналысь). 

2700

Оставить сообщение:

НАШИ ПАРТНЕРЫ