icon_gotop
18+
autorisation
Войти | Регистрация
Время в Татышле
18:37
Пятница, 29 Марта
Рекламный баннер 990x90px top

Удмурт огазеяськон эшъёссэ люказ

10:40 22.12.2016

Кызь ар. Трос-а со, ӧжыт-а? Арлыдэз учконо ке, со ӧжыт. Нош национально-культурной центр понна, 20 ар – со кузь сюрес, кытын луиллям кезьытэсь, пыд йылысь погыртӥсь тӧлъёс но, зоро-кото нуналъёс но, вормонъёс но, шумпотонъёс но. Удмурт огазеяськон кылдэмен, республикаысьтымы пӧртэм ёросъёсысь удмуртъёс ог-огзэс тодӥзы, огинэ кариськыса ужаны кутскизы, удмурт сям-йылолъёсты улӟытон но азинтон бордын трос ужъёс лэсьтӥзы. Национально-культурной центрлэсь ужъёссэ вераса но, лыдъяса но уд быдты. Тужгес бадӟымъёсыз сярысь верано ке, кылсярысь, нылпиослы «Усточикар» лагерез, нылпи творчествоя фестивалез, спорт шудонъёсты, «Чеберина» республика конкурсэз пусйыны луоз.

Кылем арняын Татышлы ёросысь Выль Татышлыысь культура юрт эшъяськон коркалы пӧрмиз, шуыны луоз. Национально-культурной центрлэн кылдэмез дырысен 20 ар тырмонлы сӥзем ужрадэн ӵош, татын финн-угор культурая фестиваль радъяськиз на. Ужрадэ Татышлы ёрос администрациен кивалтӥсь Рушан Гараев, республикаысь Калыкъёслэн эшъяськон юртэнызы кивалтӥсьлэн воштӥсез Альмира Кулдавлетова, Башкортостанысь финн-угор калыкъёслэн ассамблеяенызы кивалтӥсь Юлия Герасимова, республикаысь поръёслэн национально-культурной автономиенызы кивалтӥсь Павел Бикмурзин но мукетъёс пыриськизы. Уфаысь вуэм куноос но БР-ысь удмуртъёслэн НКЦ-енызы кивалтӥсьлэн  воштӥсез Юрис Саитов нырысь Ренат Биктимирович Галямшинлэн дораз вуылӥзы. Солы тау карон но ӟечкылан кылъёссэс веразы, синпель кузьымъёс сётӥзы. Юрис Саитович национально-культурной центрлэн почётной председателезлы туспуктэмъёс кузьмаз. Соосты учкыса, Ренат Биктимирович ужам аръёсаз выльысь берытскиз кадь, шунытэсь тодэ ваёнъёсыныз люкиськиз.

Ужрадлэн нырысетӥ люкетаз удмурт огазеяськонлэн ужаз азинлыко пыриськисьёсты Татышлы ёрос администрацилэн, НКЦ-лэн, «Удмурт кенеш» ассоциацилэн тау карон гожтэтъёсынызы пусйизы. НКЦ-лэн Кенешезлэн секретарез Татьяна Шайбакова удмурт огазеяськонлэн 20 ар ӵоже быдэстэм ужъёсыныз тодматӥз. Бурай, Балтач, Калтасы, Янаул ёросъёсысь, Нефтекамскысь, Пермь шаерысь Куеда ёросысь вуэм куноос но национально-культурной цетрлэсь ӟеч, пайдаё ужъёссэ пусйизы, азьпалан азинсконъёс сӥзизы.

Финн-угор культурая фестиваль – ужрадлэн кыкетӥ люкетэз – пӧртэм калыкъёслэн «тугокозылы» пӧрмиз. Отын удмурт кырӟан-эктонъёсты возьматӥзы Татышлы но Янаул ёросъёсысь сцена вылысь усточиос, поръёссэ – Калтасыысь эктонъя «Эрви» калык ансамбль, мордвазэ - Стерлитамак ёросысь  «Вастома» фольклорно-этнографической ансамбль. Вераны кулэ, куноос татышлы музъеме асьсэлэсь лулчеберетсэс, пӧртэм ласянь усточи луэмзэс возьматӥсь узыр адӟытонэн вуиллям. Ужрад котькинлы ӝутскем мылкыд кузьмаз.

        Миляуша БУЛАТОВА. 

7916

Оставить сообщение: