«Шундыберган» дыр ортчемъя уз куасьмы

Тодматскон

Шундыберган шуэм бере ик, яркыт ӵуж буёл син азе пуксе. Удмуртъёслэн, пе, ӵуж тус герӟаськемын шундыен, ю-нянен, анаен. Со буёл матысь луэмез возьматэ: ӵужанай, ӵужатай, ӵужапай, ӵужкенак юнме шуиллямтэ, лэся.

Зал тыр чузъяськиз «Подсолнухи» кырӟан. Сое быдэстӥзы Выль Татышлы школаын дышетскисьёс. Кырӟан улсын эктӥзы пичи «шундыберганъёс» - покчи классъёсын дышетскисьёс но нылпи садэ ветлӥсьёс.

Ужрадэз дасянэ но ортчытонэ трос кужымзэс понӥзы гуртысь культура юртэн кивалтӥсь Зифина Фархутдинова но культура юртын ужасьёс. Озьы тупаз, та нуналэ уж визитэн татышлы музъеме вуэмын вал Уфаысь истори наукаосъя доктор Ранус Садиков, Парижысь тодосчи Ева Тулуз, Тарту университетысь докторант Николай Анисимов. Азьпалтыса верало, конкурсэз соос тунсыкъяськыса учкизы, солэсь мур пуштросо, туж пайдаё луэмзэ пусйизы.

Аспӧртэмлыко ужрадэ удмурт песяйёс, ӵужайёс асьсэлэн нунокъёсынызы вуизы: Калмиярысь Ирина Минлиаскарова но Анастасия Шайсултанова, Выль Татышлыысь Римма Дельмышева но Яна Хасанянова, Бальзюгаысь Римма Манапова но Софья Шайхуллина, Улысь Балтачысь Альфия но Элина Баймиеваос, Уразгильдыысь кык семьяос - Зульфира но Екатерина Хатиповаос, Анита но Аделина Зидымаковаос. Конкурсантъёслы но люкаськем калыклы ӟечкылан кылъёсын вазиськиз республикаысь удмуртъёслэн историяя но культурая центренызы кивалтӥсь Ирина Самигулова. «Шундыберганэ» вуэмъёслэсь быгатонлыкъёссэс дунъяз жюри: Николай Анисимов, Ирина Самигулова, БР-ысь удмуртъёслэн НКЦ-зылэн Кенешезлэн секретарез Татьяна Шайбакова, Янаул ёросысь Шудек гуртысь культура юртэн кивалтӥсь Ангелина Менгафарова.

Песяйёс, ӵужайёс,

пичи нылъёс - усточиос

Песяйёс, ӵужайёс но пичи нылашъёс конкурсэ камсьӧр удмуртъёслэн калык дӥськутъёсынызы лыктӥллям. Сцена вылын соос яркыт воректӥзы. Соослы куать эскеронъёс пыр потоно луиз. Шӧдӥськиз, ваньзы ужрадэ пыр-поч дасяськиллям.

«Мон но мынам песянае, ӵужанае» нырысетӥез конкурс ужрадэ вуэмъёслэн улон-вылонэнызы, тунсыкъяськонъёсынызы тодматӥз. Кылсярысь, Яна Хасанянова яратоно песяез но ачиз сярысь кылбур чуръёс пыр мадиз, нош Элина Баймиева - «Я с бабушкой своею» кырӟан пыр.

«Кузь йырси» конкурс песяйёслэсь но ӵужайёслэсь пӧртэм амалъёсын йырси пуныны усточи луэмзэс шараяз. Яна песяйзэ кырӟанэныз бурдъяны малпаз, пичи нылашлэн жингрес куараез зал тыр чузъяськиз. «Чорыг быж», «Мынам инвожое», «Яратӥсь сюлэм», «Шундыберган», «Удмурт нылаш» причёскаос возьматэмын вал.

«Шыкыс» конкурс ваньзэс вашкала дуннее вуттӥз, шуыны луоз. Татын котькудӥз туала нуналозь сандыказ возиськем дӥськутъёсыныз тодматӥз. Паймымон, песяйёс-ӵужайёс туж тодыса, ӟеч валэктонъёс сётъязы котькуд дӥськут сярысь, соосты егитъёс но, пичиос но туж тунсыкъяськыса кылзӥзы. Анита Зидымакова, кылсярысь, Аделиназэ но шумпоттыны вуиз, нунокезлы со удмурт дӥськутэн мунё кузьмаз. «Шыкысысь арбери» конкурсын ужрадэ пыриськисьёс сандыкын мар кыллемзэ тодыны кулэ вал, со арбериос «Вӧсь» йылоллы сӥземын. Татын висъяськисьёс ик ӧй вал, ваньзы тодӥзы, мар «ватскемын» шыкысэ.

Вашкала дырысен удмурт калык куно пумитаны яратӥсь луэменыз висъяськем, ӝӧк выл тыр пӧръёс дасям. «Ческыт пӧръёс» конкурсын усточиос пӧръёссэс возьматӥзы. Перепеч, табань, ныро, шаньги, шу кисаль – ваньзы ческыт пӧраллям! Нош пичи нылашъёс асьсэ киосынызы тупатэм арбериоссэс ваиллям – соос шундыберган сяськаез возьматыны кулэ вылэм. Кин топиарий, кин картина, кин сяська тупатэм.

Берпуметӥ конкурсын ужрадэ пыриськисьёс асьсэлэсь творчествоя быгатонлыксэс возьматӥзы. Калмияръёс учкисьёслы «Шундыберган» кырӟанзэс кузьмазы: кылъёсыз но крезьгурез Ирина Минлиаскаровалэн. Катя песяезлы сӥзьыса кырӟан быдэстӥз. Аделина эктыны усточи вылэм, макем чебер но шаплы возиз со ассэ сцена вылын. Бальзюгаос но улысь балтачъёс кырӟан дасяллям, нош выль татышлыос – эктон.

Вормисьёс

Кызьы пусйиз жюри, устоос пӧлысь устооссэ бырйыны соослы туж шуг луэм. Ваньзы конкурсэ тыршыса дасяськиллям угось. Тужгес трос балл люкаса, ужрадын вормисе потӥзы Римма Дельмышева но Яна Хасанянова. Калмияръёс «Мусокай» номинацилы кузё луизы, «Оскон» номинациен пусйизы бальзюгаосты. Баймиеваос - «Кибашлы» номинациын вормисьёс, Хатиповаос - «Усточи» номинациын, Зидымаковаос - «Визьбугор» номинациын.

Конкурсъёс вискын учкисьёсты кырӟанъёсынызы но эктонъёсынызы шулдыртӥзы Николай Анисимов, Алина Гильманова, «Унябейёс» но «Пушъетъёс» ансамбльёс (кивалтӥсьёссы З. Фархутдинова но З. Зарипова), Шудекысь куноос - «Чибориё» коллектив (кивалтӥсез Л. Давлетшина). Вераны кулэ, шудекъёс ужрадэ тужгес пичи участницалы шуыса, кузьым ваиллям: со Яналы шедиз.

*        *        *

«Шундыберган», оскисько, выжыоссэ мур лэзёз, котыраз удмурт песяйёсты, ӵужайёсты но пичи нылъёсты арлы быдэ люкалоз, дыр ортчемъя сяська уз куасьмы, арысь аре пушъёз.

     Миляуша БУЛАТОВА.