icon_gotop
18+
autorisation
Войти | Регистрация
Время в Татышле
14:38
Sunday, 17 Октября
Рекламный баннер 990x90px top

Калыкез кызь вить ар шумпоттэ, кырӟан-эктонэн шулдыртэ

2016-12-01

Ӝытэз усьтыса ӟечкылан кылъёсын вазиськизы Татышлы ёрос Кенешлэн секретарез Радик Рахимов, Татышлы ёросысь культурая управлениен кивалтӥсь Альфия Шайнурова, Башкортостанысь удмуртъёслэн НКЦ-енызы кивалтӥсь Салимьян Гарифуллин но Выль Татышлы гурт поселенилэн администрациеныз кивалтӥсь, «Шулдыр ӝыт» ансамбле нырысетӥ нуналъёсаз пыриськем Николай Рахимьянов. Ваньзы ансамбле пыриськисьёслы, солэн кивалтӥсезлы Зульфира Зариповалы, культура юртэн кивалтӥсьлы Зифина Фархутдиновалы трос шуныт кылъёс веразы, тау каронъёсын, данъян грамотаосын но кузьымъёсын пусйизы. 

Кызь вить аръем сюрес коллектив понна со трос. Та дыр ӵоже со пӧртэм интыосы вуылӥз, трос сюлмаськонъёс но куректонъёс, вормонъёс но шумпотонъёс, пумиськонъёс но люкиськонъёс, сюрес вылаз выль эшъёс пумиталляз. Кызь вить ар талэсь азьло Выль Татышлы культура юртэ ёрос культура ёзэтысь постановление вуэм. Отын тросгес калыкез ужрадъёсы кыскыны но быгатӥсь егитъёсты шараяны куремын вылэм. Та вакытэ художественной кивалтӥсьын ужась Зульфира Зарипова сям-йылолъёсмес, кылмес, лулчеберетмес утьыны но азинтыны юрттӥсь фольклор ансамбль кылдытэм. Соослэн нырысетӥ фольклор композицизы «Шулдыр ӝыт» нимаськем. Со бордысь ик коллективлэн нимыз но потэмын.

Одӥг кырӟан-эктон но арганчитэк чебер уг пӧрмы. Уго азьвыл дырысен котькуд ӝыт шудонъёс, шулдыръяськонъёс арган шудэм улсын ортчылӥзы. Арганчи котьку гажано, адӟем карымон адями вал. «Шулдыр ӝыт» ансамблез но пӧртэм аръёсы крезьгуръёсын Мавлет Мардамшин, Амирхан Мухамадиев, Флюр Ахметшин, Рамиль Садиков, Владимир Морозов шулдыртӥзы. Нош али коллективез крезьгуръёсын Александр Галиев узырмытэ.

Шуныт пумиськонъёс, люкаськонъёс бадӟым, шулдыр культура юртын ортчыло. Огазеясь юрт Ренат Галямшинлэн кичӧлтэмезъя ӝутэмын но 1987-тӥ арын усьтэмын. «Шулдыр ӝыт» ансамблез азинтон понна Ренат Биктимирович трос кужымзэ сётӥз.

 

Калык ансамбль республикаямы сяна, Пермь шаере, Удмурт Элькунэ, Эстоние но мукет интыосы вуылӥз. Шаермылэн пӧртэм сэрегъёсаз улӥсь удмурт калыкъёс доры вуттыны солы юрттӥзы автобусъёслэн руль сьӧразы пукисьёс Зиннат Даутов, Фанил Аскаров, Фирдус Галиев. Соостэк вакчи сюрес но кузь потысал.

Шулдыр ӝытъёсты дано юбилеенызы ӟечкыланы, шунытэсь кылъёс вераны вуизы удмуртъёслэн историяя но культурая центренызы кивалтӥсь Ирина Самигулова, БР-ысь удмуртъёслэн НКЦ-зылэн Кенешезлэн секретарез Татьяна Шайбакова, БР-ысь удмуртъёслэн НКЦ-енызы кивалтӥсьлэн воштӥсез Юрис Саитов, Пермь шаерысь удмуртъёслэн огазеяськонэнызы кивалтӥсь Станислав Гадиятов, Татышлы ёросысь культурая но шутэтсконъя центрысь ужась Ямиль Исламов, Выль Татышлыысь Кристина но Диана Зариповаос но мукетъёс.

«Шулдыр ӝыт» ансамбль егитъёслэн улоназы но бадӟым пытьы кельтӥз. Татчы пыриськыса соос яратонзэс пумитазы. Озьы улон сюрессэс огазеязы Алевтина но Николай Гизадуллинъёс, Наталья но Ильдус Латиповъёс, Ольга но Иосиф Константиновъёс. Табере соосты нылпиоссы вошто.

«Шулдыр ӝыт» кылдэм дырысен со пыр 160-лэсь трос адями потӥз. Жаляса верано,  Тимофей Гизадуллин, Венер Халиков, Олег Глимзянов, Антонио Бадртдинов, Руслан Фархутдинов, Наталья Гараева, Роман Шартдинов пӧламы ӧвӧл ни. Соосты буре вайыса Зифина Фархутдинова Ирина Самигуловалэн кылъёсызъя гожтэм «Тузь омыре» кырӟанэз кырӟаз.  

Ужрадэ кырӟанъёсын, ӟечкыланъёсын но кузьымъёсын шумпотыса вуизы Пермь шаерысь Бадӟым Гондырысь «Тюрагай», Янаул ёросысь Вуж Варяшысь «Югдон», Татышлы ёросысь Улысь Балтачысь «Ӧрӟи», Бальзюгаысь «Ошмес», Кызыл-Ярысь «Марӟан», Вязовкаысь «Уӵы ныл», Калмиярысь «Инвожо» но Уразгильдыысь «Етӥн» ансамбльёс. Та нуналэ Выль Татышлыысь Линда Гильманова, Чернушкаысь Лира Туктакиева чебер кырӟанъёс кузьмазы. Задор эктонъёсын Выль Татышлыысь «Пушъетъёс» нылпи фольклор ансамбль шумпоттӥз. Шулдыр ӝытъёс «Выль корка данъян», «Кубо чук куран», «Учке али бакчамес» но мукет пуштросо композициос возьматӥзы. Отын азьвыл аръёсы ансамбле ветлэмъёс но  мыло-кыдо шудӥзы.

Нош Арибашысь вуэм куноос ваньзэс сайкатӥзы кадь. Соос куинь кыткем гырлыё валъёсын жингыртыса вуизы угось. Лилия Гараева празднике аспӧртэм кузьымъёсын вуэм. «Шулдыр ӝыт» ансамблен но культура юртэн кивалтӥсьёслы Зульфира Зариповалы но Зифина Фархутдиновалы, худруклы Марина Низамовалы эктыса посьтӥсьтэм сапегъёс, арганчилы Александр Галиевлы «крезьгур поттӥсь инструмент» кузьмаз, нош ансамбльлы – котьмалэсь утись арбериосын пичи пуйы. Озьыен, азьпалан но лулчеберетмес, кылмес но йылолъёсмес утись «Шулдыр ӝыт» ансамбль мед улоз,  нокыӵе шуг-секытъёслы сётскытэк.  

Марина НИКОЛАЕВА.             

2761

Оставить сообщение:

НАШИ ПАРТНЕРЫ