Шулдыр но задор кырӟанъёс, сюлэме пыӵась гуръёс

Котькуд ар та смотр-конкурсэз ортчытыны коньдонэн юрттэ «Рассвет» СПК-ен кивалтӥсь Альберт Минлебаев. Конкурсэ 11 коллективъёс пыриськыны мылкыд каризы. Соос пӧлысь ньылез – «Ошмес», «Надежда», «Вуюись» но «Инвожо» - удмурт гуртъёсысь вокал ансамбльёс.   

Гала-концертэз  2014-тӥ арын Гран-при утэм Улысь Балтачысь «Рябинушка» вокал ансамбль (кивалтӥсез И. Шайхлисламова) усьтӥз. Со учкисьёслы ӟуч задор кырӟанъёс кузьмаз. Собере та ӝытэ ёросамы улӥсь калыкъёслэн быдэс лулчеберетсы возьматӥськиз кадь. Учкисьёс огез бӧрсьы огез чузъяськем удмурт, бигер, ӟуч кырӟанъёсты шумпотыса кылзӥзы. Озьы ик Улысь Балтач школаын дышетскись нылъёс (кивалтӥсьсы З. Шарафутдинова) удмурт но пор эктонъёсын шумпоттӥзы. Улысь Балтач культура юртлэн «Русский сувенир» образцовой ансамбляз ветлӥсь пиналъёс (кивалтӥсез И. Шайхлисламова) пуньыен шудыса пӧртэм кырӟан крезьгуръёс кылдытӥзы. Смотр-конкурсын, кылсярысь, Шулганысь «Гэрэ буе» вокал ансамбльлэн (кивалтӥсез И. Кашипов) бигер кырӟанэз но сюлме пыӵамон чузъяськиз. Нош 2014-тӥ арын куинетӥ степенё дипломен пусъем Бальзюгаысь «Ошмес» вокал ансамбль (кивалтӥсез Ф. Ахметшин) ваньзылэсь нырзэс чигтӥз кадь. Соослэсь  удмурт «Бусъёсын шобырскизы» но ӟуч «Как за Доном» кырӟанъёссэс учкисьёс зол кичабонъёсын келязы. Шӧдске, «Ошмес» ансамбльысь кырӟасьёс вормонлы оскыса вуиллям.      

Шӧдытэк но ӧйлась, кызьы ужрадлэн тужгес валтӥсь дырез вуиз. Смотр-конкурсэ пыриськисьёсты данъян понна кыл сётӥськиз Улысь Балтач гурт поселенилэн администрациеныз кивалтӥсьлы Эдуард Рахимзяновлы. Со усто концерт дасямзы понна, ужрадэ вань пыриськемъёслы тау карон кылъёссэ вераз. Со сяна, Эдуард Бурханович смотр-конкурсын учкисьёсты шулдыртэмзы понна коллективъёсты дипломъёсын пусйиз. Соос пӧлын луизы Улысь Балтачысь нылкышноослэн «Рябинушка»,  пиосмуртъёслэн «Ӧрӟи» (кивалтӥсез А. Кайранов), дышетскисьёслэн «Русский сувенир» но нылпи хореографической ансамбльёссы. Таӵе ик дипломен данъязы Вылысь Татышлыысь культурая но шутэтсконъя центрысь «Забава» (кивалтӥсез А. Гарифуллина), «Жидеген чишмэ» (кивалтӥсез С. Шаехова) ансамбльёсты.

Нимысьтыз номинациосын ӟечкыланы кыл сётӥськиз Татышлы ёросысь культура ёзэтэн кивалтӥсьлы Альфия Шайнуровалы. «Та чебер праздник ньылетӥ ползэ ни радъяськиз. Туннэ выль нимъёс усьтӥськизы, ӝытмы шулдыр ортчиз», - пусйиз Альфия Ураловна. Со сяна, А. Шайнурова Улысь Балтач гурт поселенилэн администрациеныз но «Рассвет» СПК-ен кивалтӥсьёслы Э. Рахимзяновлы но А. Минлебаевлы ужрадэз ортчытыны юрттэмзы понна, смотр-конкурсэ пыриськисьёслы но жюриослы тау каронъёссэ вераз.

Ёрос конкурс-смотрлэсь лауреатъёссэ Улысь Балтач гурт поселенилэн администрациеныз кивалтӥсь Эдуард Рахимзянов данъяз. Куинетӥ степенё дипломлы кузё луиз Калмиярысь «Инвожо» ансамбль (кивалтӥсез И. Шайсламова), кыкетӥ степенё дипломлы - Выль Татышлыысь «Надежда» ансамбль (кивалтӥсез М. Низамова) но нырысетӥ степенё дипломлы – Вязовкаысь «Вуюись» ансамбль (кивалтӥсез Д. Камалтдинов). Нош ужрадлэсь Гран-призэ Бальзюгаысь «Ошмес» ансамбль утӥз. 

Та ӝытэ трос шулдыр но задор кырӟанъёс, сюлэме пыӵась, калыкез огазеясь гуръёс чузъяськизы. Котькудӥз со люкаськем калыклы, вуэм куноослы ӟеч но капчи мылкыд кельтӥз.  

Марина НИКОЛАЕВА.

Татышлы ёрос.