icon_gotop
18+
autorisation
Войти | Регистрация
Время в Татышле
16:40
Пятница, 29 Марта
Рекламный баннер 990x90px top

Ужез солэн – кузь сюрес

09:16 03.11.2016

- Водительлы Бирскысь ДОСААФ-ын дышетски, военкомат ыстӥз, - вера Володя агай. Солэн трудовой книжкаяз мукет уж сярысь гожтэмез ик ӧвӧл: сюрес солэн ужез луэм. Машина нуллыны удостоверение басьтэм бераз, гужем, со райнарсудэ ужаны пырем, судьяез нуллэм.

- «Москвич-408» машина сётӥзы. Али но син азям на: гуртэ бертӥ но, вань пиос капка азе люкаськиллям, машинаез эскеро. Москвичен кема ворттылыны ӧз кылды, сӥзьыл армие басьтӥзы, - тодаз вае Володя агай.

Служба аръёсыз Германиын ортчиллям. Армиысь бертэм бераз ёросысь эмъюртэ водителе ужаны интыяськем, валтӥсь эмчиез Фанави Газизовез нуллэм. Татын ужакуз ик со аслэсьтыз шудзэ – Лида апаез – пумитам. 1978-тӥ арын яратӥсь сюлэмъёс семья кылдытӥллям. Озьы Майск гуртысь пияш Вылысь Татышлые выжы лэзем. Кузпалъёслэн шуд бугоръёссы - нылзы но пизы - вордӥськиллям. Жанна нылзы школаез йылпумъяса, Бирскын вуриськисьлы дышетскем. Али семьяеныз Свердловск улосвылын улэ. Нош школазэ «витьёслы» гинэ йылпумъям пизы, Роман, Октябрьскийысь коммунально-строительной техникумын тодон-валан басьтэм. 2004-тӥ арын диплом басьтэмез бере, ИжГТУ-лэн Чайковскийысь филиалаз дышетскем. 2008-тӥ арысь толшор толэзе Романлы «инженер-строитель» квалификация сётэмын. Туннэ нуналэ Роман Чайковскийын улэ, «Мастер окон» ООО-ен кивалтэ. Кузпалыныз но кык нылъёсыныз со анай-атай юртаз ӵем вуылэ. Володя агаен Лида апай соосты котьку шумпотыса пумитало. Гужем нуналъёссэс нунокъёссы песяй-песятайзы вӧзын ортчыто.

Редакцие ужаны вуытозяз, Володя агай ёросысь культура ёзэтын, «Райпотребсоюзын» ужам на, казначействоын но тыршем.

- «Ошмесын» мон сизьым ар ужасько ни. Татын мыным туж кельше. Уже тунсыко, пӧртэм ёросъёсы, тодмотэм гуртъёсы вуылӥськод, палэнын улӥсь удмуртъёсын тодматскиськод. Коллективын аслад удмурт кылыныд вераськиськод, - вера В. Нуриев.

Милям, журналистъёслэн, ужмы сыӵе – сюрес вылэ потатэк уг луы, командировкаосы ӵем ветлӥськом. Ми котьку тодӥськом: Володя агай котькытчы но нуоз, ваёз но. Милемлы мӧзмыны но со уз сёты. Соин котьку тунсыко. Володя агаез тодӥсьёс пӧяськыны уз сётэ: сое кылызлы бырись адями уд шуы, но интыяз верам кылыныз котькинэ паймытыны но, серекъятыны но быгатэ. Вераськоназ со лэчытверанъёсты, фразеологизмъёсты ӵем кутэ. Кылсярысь, тупатымтэ сюрестӥ ортчыку со одно ик шуоз: «Ветлӥськом ук пуны сюрестӥ».

…Командировкамы йылпумъяськиз. Бертыны потӥськом. Ми тодӥськом ини, кыӵе кылъёс вералоз милемлы Володя агай машинае пуксеммы бере. «Эх, мисканме басьтӥськымтэ ук!» - шуэ со. Уго Володя агаймы усто арганчи но. Котькыӵе крезьгурез усто нёжтэ. Таӵе быгатонлыкез солы атаезлэсь выжемын. Файзылхан агаез ёросамы усто тальянчиен тодо.

Кӧня ар Володя агаез тодӥсько, ноку но солэсь урод мылкыдо дырзэ адӟеме ӧвӧл, зӥбыт сямо воргорон ноку, нокинлы куаразэ уз ӝуты, уз но пумитъяськы. Кыӵе уж ӵекто – ваньзэ быдэстоз. Редакцилэсь ужзэ быдэстон сяна, со национально-культурной но историко-культурной центръёслэн ужъёссыя но трос ветлэ. «Ноль проблем», - шуэ но машинаяз пуксьыса ширтэ. Вольыт сюрес тыныд, Володя агай.

Миляуша БУЛАТОВА. 

6079

Оставить сообщение: