Башкортостанын дауръёс ӵоже пӧртэм калыкъёс эшъяськыса уло. Соос пӧлын асьсэлэн кылынызы, лулчеберетэнызы, осконэнызы яркыт висъясько удмуртъёс. Берло аръёсы соослэн куаразы трослы паськытгес кылӥське. Асьмеды шаермылэн пӧртэм сэрегъёсаз тодо. Башкортостанысь удмуртъёс пӧлысь трос дано адямиос потэмын, кылсярысь, Пётр Шараев, Риф Насибуллин, Бибинур Загуляева, Роман Валишин, Фатихъян Пукроков, Менсадык Гарипов, Людмила Ахтариева, Валерий Нуриахметов, Касим но Кадим Галихановъёс, Люза но Ульфат Бадретдиновъёс. Соос выллем дано адямиосты будэтон, зэмос кивоштӥсьёсты дасян вылысь, Башкортостанысь удмуртъёслэн национально-культурной центрзы трос пӧртэм проектъёсты дася. Соос пӧлын бадӟым инты басьто нылпи творчествоя фестиваль, гужем олимпи шудонъёс, «Чеберина», «Ӝужась кизилиос» конкурсъёс, «Усточикар» лагерь но мукетыз.
Берло аръёсы, жаляса верано, удмурт кылэз дышетонэн сюлэмшугъяськытӥсь югдур пумиське: удмурт кыллы сӥзем часъёс кулэсмо, оптимизациен сэрен школаос ворсасько. Но огез пумысен шумпотоно, 2012-тӥ арын Татышлы ёросысь Улысь Балтач шор ёзо школаын удмурт гимназия усьтон муген «Педагогические условия формирования успешной личности в национальной (удмуртской) школе» экспериментальной площадка усьтӥськиз. 2015-тӥ арысь коньывуон толэзе школа та темая азинлыко утиськиз.
Республикаысьтымы удмурт огазеяськон историяя но культурая центрен (соин кема аръёс ӵоже кивалтӥз Т. Н. Шайбакова) ӵош бадӟымъёс понна но пӧртэм ужрадъёс ортчытъяны тырше. Озьы калык праздникъёс, фестивальёс, гуртъёслэн нуналъёссы ортчыло, ужало фольклор ансамбльёс. Тросэз ужрадъёс ӟеч сямлы пӧрмизы ни.
Удмурт центрлэн данъяськымон ужъёсыз пӧлы пыро на республикаысь удмуртъёс понна «Ошмес» газетлэн потэмез, Янаулысь центральной библиотекаын удмурт калыкен ужанъя Кенешлэн кылдэмез. Нимысьтыз саклык висъяське вунэтэм сям-йылолъёсты улӟытонлы. Огез сыӵе йылол – вӧсяськон. Туннэ нуналэ вӧсьёс котькуд ёросъёсысь гуртъёсын ортчыло.
Башкортостанысь удмуртъёслэн национально-культурной центрзы Вань удмуртъёслэн «Удмурт Кенеш» огазеяськонэнызы, Пермь шаерысь НКЦ-ен но мукетъёсын юн кусып возе. Со сяна, со республикаысь удмуртъёс тросэн улоно ёросъёсты но ужаз кыске. Озьы огъя кужымен НКЦ-лэн ужез паськыт азинске.
Дасяз Ольга
НИГАМАТУЛЛИНА.
Оставить сообщение: