«Ӧрӟилэн» зарни крезьгур пырыосыз - «Элькуновиденилэн» шыкысаз

Удмурт крезьгуро лулчеберетэз узырмытӥсь, выль нимъёсты шараяны юрттӥсь конкурсысь ӧрӟиос но, ми но, учкисьёс, ӝутскем мылкыдын бертӥм. Угось «Элькуновидение» пыр потэм усточиослэн нимъёссы паськыт вӧлмо. «Моя удмуртия» радио пыр но соосты быдэс ар кылзыны луэ на. Конкурсэ пыриськыса, «Ӧрӟи» ансамбль аслэсьтыз нимзэ сяна, республикаямы улӥсь удмуртъёслэсь но данзэс ӝутӥз, «Элькуновиденилэн» шыкысаз зарни крезьгур пырыоссэ кельтӥз.

«Элькуновидение» конкурс «Евровидение» амалъя ортче, но радлыкез мукетгес. Кыкетӥ этаплэн нырысетӥ люкетаз концерт луиз. Отын котькуд ёрослэн дунъясез кырӟасьёслы баллъёс пуктылӥз. Тужгес трос баллъёс люкам 15 кырӟасьёс финалэ потӥзы. Конкурслэн кыкетӥ люкетаз соослы учкисьёс куара сётозы: финал 4-тӥ шуркынмонэ «Моя Удмуртия» ТК-лэн эфираз радъяськоз. Конкурслэсь финалзэ интернет пыр но учкыны луоз. Озьы ик эфир «Моя Удмуртия» ТРК-лэн сайтаз но Ютуб-каналаз возьматӥськоз. Бӧрысь жюрилэсь но учкисьёслэсь сётэм куараоссэс ватсаса, вормисьлэн нимыз шараяськоз.

«Элькуновидениын» устоез кылбурчи но устоез крезьгурчи бырйисько на. Конкурслэн кыкетӥ этапаз нимысьтыз жюри ужаз. Соос финалын йылпумъянъёс лэсьтозы. Вормисьёс пӧлын луыны быгато авторъёс, кудъёссылэн кырӟанъёссы 15 устоосыз пӧлы ӧз пыре. Чидатэк витёмы 4-тӥ шуркынмонэз. Куара сётоме асьмелэнъёслы!

Миляуша БУЛАТОВА.

Ижевск город.