icon_gotop
18+
autorisation
Войти | Регистрация
Время в Татышле
11:16
Sunday, 17 Октября
Рекламный баннер 990x90px top

Анае кадь мусо но дуно

2016-10-06

Мынам вордскем шаере Татышлы ёросысь пичи Бальзюга гурт. Со Башкортостанлэн тужгес шулдыр, нюлэсо сэрегаз итыяськемын. Гурт вӧзтӥмы жингрес кырӟанзэ кисьтыса читыр-чутыр бызе пичи Погшурмы. Шур дурын асьсэлэсь бабылес вож йырсизэс тӧлъя веттаса сыло бадьпуос, лулпуос. Пересьёслэн верамзыя, вашкала дыръя соос та шур дурысь бусыын ужакузы кӧжыпог пӧзьтыса сиылӥллям, мукет сямен вераса, кӧжы ӝук.Со дырысен сое Погшур нималлям. Нош кызьпу арамаямы пыриды ке, кошкыны но уд ӵыдэ ни. Трос милям сыӵе кызьпу арамаосмы. Отын веськрес кызьпуос будо. Соослэн вайёсазы ог-огзэс вормыны турттыса кадь, асьсэлэсь жингрес кырӟанъёссэз кисьто тылобурдоос. Гужем ке вуэ, гурт пумысь бусыын кисьма, гыа ю-нянь.  Лыз инбамын аслэсьтыз гурзэ кисьтэ тюрагай. Вань бадӟым тыметмы, сое нимаськомы Бальзюгадур. Гужем пӧсь ке луэ, ваньмы бызиськомы шуре пыласькыны. Нош малы сое озьы нималлям? Малы ке шуоно со гуртмылы туж матын луэ, гурт вӧзы интыяськемын. Тулыс но гужем гуртмы уката но чебер адске.Тулыс льӧмпуос пурӟо, нош гужем - чебер сяськаос улӟо. Гуртмы бадӟым ке но ӧвӧл, туж шулдыр! Гужем куазен музъем вож дӥсен шобырскыку но, толалтэ котырысь ваньмыз тӧдьы дӥсьсэ дӥсяку но.

Анае кадь мусо потэ вордӥськем шаере, озьы ик юн яратско мон сое. Яратон кутске пичи дырысен но улэ пересьмытозь. Со арлыд будэмъя кужмоя но кужмоя. Соин ик вордскем шаерез яратон но кутске анаез яратон бордысен. Анаедлэсь тон дышиськод вераськыны, тодӥськод аслэсьтыд калыктэ. Анайлэн юрттэменыз султӥськод музъем вылэ. Соин ик вордскем шаер но анай – одӥг. Соин но, дыр, вордскем шаер анай кадь ик мусо потэ.

Вордскем шаере! Тон будэтӥд трос дано адямиосты: крезьгурчиосты но кылбурчиосты, кырӟасьёсты но суредасьёсты, гурт удысын тыршись калыкъёсты.Соос пӧлысь тужгес тодмоез но дуноез Менсадык Гарипович Гарипов. Со-милям улосчимы, сӥё-дано суредасьмы. Башкортостанын но Удмурт Элькунын сяна, суредасьмы тодмо на кунгож сьӧрын но. Солэн ужъёсыз Третьяковской галереяын асьсэлэн пӧртэмлыкенызы висъясько.

Менсадык Гариповичмы асьме пӧламы ӧвӧл ни ке но, со котьку улэ  милям сюлэмамы. Малы ке шуоно солэн нимыныз милям одӥгез ульчамы нимамын. Со сяна, солэсь нимзэ нуллэ на Бигиней школа. 2003-тӥ арын отчы Менсадык Гариповичлэсь бюстсэ пуктӥзы. Бальзюга гуртын школа луымтэен, со вакытэ бускель гуртэ дышетскыны ветлӥллям. Милям гуртысьтымы калыкмы котьку  данъяське суредасен.

Данъяськисько мон гурт калыкеным, соослэн усто луэменызы.Котькытчы мынӥ ке но, гуртэлэсь, дуно адямиослэсь мӧзмо. Котькуд адямилэн, котькуд калыклэн вордӥськем шаерез – тужгес чеберез но дуноез. Бадӟым дунне вылын вордскем музъем котьку одӥг гинэ. Отчы ватӥськемын асьмелэн ишкалтыны луонтэм выжыосмы. Отын котькуд нюкез-гопез, котькуд шурез, пичи но бадӟым сюресэз, нюлэсъёсыз но возьёсыз тодмо. Соин ик котькытчы ке но мынӥд, сюлэмад котьку улоз вордӥськем палъёстэ яратон мылкыд. Маин ӵошатыны ик уг тодӥськы вордскем Бальзюгаме, удмурт кылме, мусо аныкайме. Кыӵе соос ваньмыз мусо!

Нуналысь нуналэ, арысь аре  выльдӥське шаере. Озьы ик нуналысь нуналэ, арысь аре мон юнгес ярато ас шаерме но бадӟым сюлэмо калыкме.

Данил Кабипянов.

Татышлы ёросысь Бальзюга гурт. 

2803

Оставить сообщение:

НАШИ ПАРТНЕРЫ