«Школае пиналъёслэсь мӧзмыса вуисько»

Виталий Сабирьянович Самигуловлэн улонэзлэн 22 арез школаен, нылпиосын герӟаськемын. Пыр-почгес тодматскоме туэ «Учитель года» ёрос конкурсэ пыриськыса, «За преданность педагогической профессии» номинациын вормисе потэм, Татышлы ёросысь Уразгильды школаын ӟуч кылъя но литературая, крезьгуръя урокъёсты нуись дышетӥсьлэн, классэн кивалтӥсьлэн улон сюресэныз.

- Виталий Сабирьянович, дышетӥсь луон сярысь малпанды ку «вордӥськиз»?

- Пичиысен. Атай дышетӥсь вал, соин, лэся, мукет удыс сярысь ӧй малпаськы. Ми - куинь агай-вынъёс – куиньнамы но дышетӥсь. Кузпалыным кык нылпи будэтӥм, соос но Бирскысь пединститутэз йылпумъязы.

- Кызьы Тӥ дышетскиды школаын?

- Тямысэтӥ классозь витьёслы гинэ дышетски. Уразгильдыын шор ёзо школа луымтэен, 9-10-тӥ классъёсын Вылысь Татышлыысь нырысетӥ номеро школаын тодон-валан басьтӥ, четвертьлы быдэ одӥг ньыль потэ вал - «химия» предметъя.

- Иське, химия яратонтэм предметты вал, нош яратоноосыз?

- Озьы, химияез ӧй яраты, нош яратоно урокъёсы ӟуч литература но физика вал.

- Яратоно гожъясьёсты но вань, дыр.

- Иван Тургенев но Геннадий Красильников.

- Быръем удыстыя кытын тодон-валан басьтӥды?

- УдГУ-ын, филологияя факультетын.

- Тодӥсько, улон сюресты школаен сяна, крезьгуро дуннеен но юн герӟаськемын: арганэн усто шудӥськоды, крезьгуръёс гожъяськоды, школаын крезьгуръя урокъёс но нуиськоды. Сыӵе быгатонлык кинлэсь ке выжемын, лэся.

- Аткай тальянкаен усто шудэ вал. Со сяна, школаын дышетскыкум Вылысь Татышлыысь нылпиослы крезьгуръя школае ньыль ар ветлӥ.

- Азьло ужам аръёстэс туалаеныз ӵошатоно ке, мар верасалды?

- Азьло нылпиос трос вал. Кылсярысь, одӥг класс ӟуч кылъя урокын кык группалы люкиське вал. Нош пионерской отрядъёс? Кыӵе тунсыко ужало вал вожатойёс! Жаляса верано, туала нылпиос сое уг ни тодо.

- Нырысетӥ куарусёнэ школае кыӵе мылкыдын вамыштӥськоды?

- Школае пиналъёслэсь мӧзмыса вуисько.

- Мар сӥзьысалды коллегаостылы, нылпиостылы?

- Аслам кивалтоно классысьтым яратоно нылпиосылы газет пыр ӟырдыт салам вераме потэ, сӥзисько соослы тазалык, шуд, умой мед дышетскозы. Нош дышетӥсьёслы – творческой вормонъёс, кузь гумыр, тросгес усто дышетскисьёс.

- Виталий Сабирьянович, бадӟым тау вераськемдылы. Матэктӥсь праздникеныды ӟечкыласько, выль вормонъёс но азинсконъёс сӥзисько.

- Тау.

                            Вераськиз

       Миляуша БУЛАТОВА.