Историенымы, калыкенымы данъяськыны дышетэ

Секыт ужез ас вылаз басьтыны солы бадӟым кужым сётӥллям дышетӥсьёс С. Х. Муксимов, А. Ф. Саетов, Г. Р. Тимиргазина. Озьы 24 ар ӵоже ни Ташкичиысь музеен А. М. Муксимова кивалтэ.

«Музей кылдытон сярысь малпанлы тужгес шумпотӥзы ожысь но ужысь ветеранъёс, - шуэ Аниса Марваровна. – Соос юрттыны мылкыдзэс веразы, доразы утиськем арбериоссэс сётъязы. Со ласянь Магира Гибадуллинаез, Бибиасма Муликоваез, Майниза Хайбрахмановаез, Садретдин Хуснутдиновез пусйыны луысал. Вераны кулэ на, Николай Уракбаев, кылсярысь, музейлы вашкала ыргон самоварзэ кузьмаз». Музейлэн пӧртэм экспонатъёсын узырмемез висъетлэн быдӟалаез бордын но шӧдӥськиз. 1992-тӥ арын со 19,6 квадрат метре интыяськиз, 1998-тӥ арын – 64,4 квадрат метре. Нош 2009-тӥ арын со 75,6 квадрат метрозь йылӥз. Туннэ нуналэ татын огъя 490 экспонатъёс лыдъясько. Соос пӧртэм ёзэтъёсы интыямын. Нырысетӥяз ёзэтын, кылсярысь, куноосты пумитало. Чылкак татын ик бадӟым альбом син шорам йӧтӥз. Со гуртлэн кылдэмезлы сӥземын вылэм. 1754-тӥ арын удмуртъёс башкир вотчинникъёслэсь договоръя музъемзэс басьтӥллям. Татчы нырысь вуиллям Асавбаш гуртысь Актимер, Акбире но Алтабай Ишбаевъёс. Нырысетӥ аръёсы татын 18 юртъёсын улӥллям. Нош 1840-тӥ арын Ташкичиын 270 адями улэм ни.

Тунсыкъяськыса учкисько куинетӥ ёзэтысь экспонатъёсты. Татын гурт калыклэн уж тӥрлыкъёсыз возьматэмын. Пиналъёс, музее экскурсиосы лыктыса, трос дыръя, пе, соосты туалаосыныз ӵошато, тунсыкъяськыса учко.

Вамыштӥськом ньылетӥ ёзэтэ. Со школалэн историезлы сӥземын. Ёзэт 1997-1998-тӥ дышетскон аръёсы кылдытэмын. Альбомез учкыса тодӥськом: Ташкичие нырысетӥез школа 1887-тӥ арын усьтӥськем. Отын покчи классъёсын гинэ дышетскиллям. Нош 1993-тӥ арын гуртын школа-сад вылэм. Туннэ Ташкичиын одӥгез но ӧвӧл ни. Берлозэ соос 2015-2016-тӥ дышетскон аръёсы ужазы.

Музеетӥ экскурсия Быдӟым Вормонлы сӥзем сэрегын йылпумъяське. Татын бадӟым инты висъяське ожысь ветеранъёслы. Ёзэтын, кылсярысь, тодматскыны луэ Шакерт Галямутдинович Давлетбаевлэн офицерской сумкаеныз, блокнот-песенникеныз, пӧртэм гожтэтъёсыныз. Таиз сэрег кылдэмез дырысен ни учкисьёсты бордаз тужгес юн кыске. Татын асьмелэн ожгарчиосмылэн вормонтэм кужымзы но вордскем шаеренызы данъяськонзы шӧдӥське.

Музейысь котькуд экспонатлэн аслаз ортчемез, нош вуонозы – одӥг. Соос асьмеды историенымы, калыкенымы но шаеренымы данъяськыны дышето.

Ольга НИГАМАТУЛЛИНА.

Илиш ёрос.