Республикаысьтымы школаос нылпиосты пумитаны дась. Со пумысен трос вераськизы гудыришкон толэзьлэн пумаз ортчем педсоветъёсын но. Бурай ёросын, кылсярысь, туэ 2,5 сюрс пиналъёс тодон-валан басьтозы. Соос пӧлысь 230 сюрслэсь тросэз нырысьсэ школае вамыштӥзы. Татысь куинетӥ номеро школа но туэ трос пичыльтокъёсты ас бурд улаз басьтӥз. Та дышетскон юрт огъя 240 нылпилы чакламын. Нош отын кык поллы тросгес пиналъёс дышетско. Школалэн директорезлэн учебно-воспитательной ужъёсъя воштӥсез Л. Р. Фархутдинова со пумысен вера: «Выль микрорайонын егитъёс трос. Куд-ог семьяосын 3-4 нылпиос будо». Куинетӥ номеро школаын нылпиослы ӟеч тодон-валан сётыны, соослэсь тазалыксэс юнматыны ваньмыз вань: компьютеръёс, электронной доскаос, тренажёръёс. Со сяна, татын бакча сиён будэтон сярысь но сюлмасько.
Нылпиосты ӟеч сиёнэн сюдон сярысь Татышлы ёросысь школаосын но юн сюлмасько, бакча сиён будэто. Со ласянь туэ шумпоттӥзы Улысь Балтач но Выль Татышлы школаос. Соос ёросын кыкетӥ но куинетӥ интыосты люкизы. Нош нылпи садъёс пӧлын кызылъяръёслы вуисьёс ӧз луэ. Дышетскон юртъёсты дасянын Вязовка школа но Улысь Балтач нылпи сад висъяськизы.
Татышлы ёросын ортчем педсоветын троссэ дышетӥсьёсты Данъян грамотаосын пуйизы. Соос пӧлын ӧжыт ӧй вал удмурт школаосын ужась дышетӥсьёс но.
Янаул ёросын ортчем педсоветэ БР-ысь Кун Собранилэн-Курултайлэн депутатэз Константин Толкачёв пыриськиз. Татын но устооссэ дышетскон юртъёсты висъязы. Выль дышетскон арлы ӟеч дасяськиллям Барабановкаысь «Малыш» нылпи садын ужасьёс. Соосты коньдон премиен данъязы.
Дышетӥсьлэн ужез нылпиослэн вормонъёсазы шӧдӥське. Соин, лэся, Янаулын ортчем педсоветын трос пол чузъяськизы таӵе кылъёс: «Дышетскисьёст мед кузьмалозы дан». Бадӟым вормонъёс тӥледлы, дышетӥсьёс но дышетскисьёс, выль дышетскон арын!
Дасяз Ольга НИГАМАТУЛЛИНА.
Оставить сообщение: