icon_gotop
18+
autorisation
Войти | Регистрация
Время в Татышле
01:59
Пятница, 29 Марта
Рекламный баннер 990x90px top

«Сюресъёс пӧртэм луо. Нош тужгес кузез - астэ утчан сюрес»

08:17 25.08.2016

Толон «Усточикар» лагерьын нуналме ортчытӥ. «Шудо сюрес», «Капчи сюрес», «Вӧё сюрес», «Паллян сюрес», «Кырыж сюрес», «Дынгыр-дангыр сюрес» (усточикаръёс отрядъёссэс озьы нималлям) кузя вамышъяса, выжыкылэ вуылӥ! Пиналъёс понна ужась мастерскойёсы кожылӥ. Вожатойёсын тодматски: Валентина Васильева, Ольга Садретдинова, Эдуард Шайдуллин, Евгений Александров но валтӥсь вожатой Яна Широбокова котьку пиналъёсын артэ, ужтэк, мӧзмыса пукыны соослэн дырзы ӧвӧл. Со сяна, лагерьын арганчи Александр Галиев но «туп агай» Руслан Камалитдинов ужало.

Устоесь ӧнерчиос, таланто пиналъёс

«Фольклор»

Ми пукимы гуртын

Веньык керттыса.

Веньык керттыса

Муское лэзим,

Солы дун басьтӥм…

Котырын шулдыр гур кылӥське. «Фольклор» ӧре ветлӥсьёс удмурт калык кырӟан бордын ужало, лэся. Кивалтӥсьсы Валентина Фёдорова котькуд пиналлэсь куаразэ кылыны вуэ. Янгышъёссэс но тупатэ, ушъя но. Марлы тросгес саклык висъянозэ пусъе, сценаын астэ кызьы возьыны дышетэ. Движениосты быдэстон но палэнэ медаз кыльы. Угось дышетэм кырӟанъёссэс, быгатонлыкъёссэс соос Вязовка гуртын ортчоно концертын возьматозы. Учкисьёс азьын гордэктоно медаз луы.

«Эстрада»

Та ӧре туэ вить пиналъёс ветло. Соин Удмурт Элькунысь вуэм крезьгуръя дышетӥсь Валентина Аверкиева кивалтэ. «Усточикарен» кивалтӥсьлэн И. М. Самигуловалэн кылъёсызъя, Валя туж, пе, шумпотэ, котькуд нылпиен нимысьтыз  ужаны быгатэмезлы.

«Эстрада» ӧре ветлӥсь Мариалина Нуриахметова малпанъёссэ шараяз:

- «Усточикаре» мон туэ сизьыметӥ ползэ вуи. Кылем арын «Шундыкарын» шутэтски, «фольклоре» ветлӥ. Кык лагерьёсты ӵошатоно ке, татын умойгес. Дышетӥсьмы Валентина Аверкиева ас ужзэ умой тодэ, ми азе юн куронъёс пуктэ. Куать нунал куспын трос выль тодон-валан басьтӥмы ни. Нырысетӥ занятиямы ми асьмелы нимысьтыз ужан программа кылдытӥм. Трос саклык висъяськом артикуляцилы, шоканлы упражнениос лэсьтонлы. Собере гинэ кырӟаны кутскиськом. Азьвыл аръёсы минусовкаен ужаськом ке вал, туэ дышетӥсьмы ачиз крезьгуръя инструментъёсын шудэ. Мыным туж кельше татын!

«Журналистика»

- «Журналистика» ӧрез кызь одӥг пинал бырйиз. Соосын ми пӧртэм жанръёсты эскериськом. Туннэ журналистикалэн обществоын интыез сярысь вераським. Берло дыре инфографикалы бадӟым саклык висъяське. Толон со бордын ужамы. Вераны кулэ, пиналъёс пӧлын усто гожъяськисьёсыз но вань, вань сыӵеос но, кудъёсыз лагере нырысьсэ вуиллям – кыӵе ӧрез бырйыны шугъяськиллям. Валамон ини, соослэн гожъяськыны мылкыдзы ӧвӧл. Нылпиослы конкурс ялэмын луысал ке, соос татчы вуэмзылэсь азьвыл тодысалзы, кыӵе мастерскойын тодон-валан басьтэмзэс, - вера мастерскоен кивалтӥсь Мария Векшина.

«Лидер»

Та мастерскоен Марина Сергеева кивалтэ. Ужзы сярысь веразы та ӧрез быръем пиналъёс.

Диана Арманшина:

- Мон ньылетӥ арзэ ни «Усточикарын». Котькуд ар «Лидер» мастерскоез бырйисько. Арлы быдэ мар ке но выльзэ аслым басьтӥсько. Туэ адямилэн психологиез бордын ужаськом, пӧртэм ситуациосты эскериськом, ужпумъёсты сэрттӥськом-пертчиськом. Мыным туж кельше лагерьын. Отрядмы – супер! Ваньмы - огкылысь, котьмае ӵошен кариськыса быдэстӥськом.

Нинель Биктимирова:

- Ӧнерчимы туж кельше. Кылем арын «Зарни куро» мастерское ветлӥ. Туэ валай, «Лидерын» трослы тунсыкогес вылэм шуыса.

Мирослав Паркутдинов:

- Лагерьын мон нырысетӥ арзэ ӧвӧл. Но та ӧрын – нырысьсэ. Эшъёсы вазизы, отын, пе, туж заук (тунсыко – авт.) шуизы но, лидеръёс доры мыноно кариськи. Вераны кулэ, чик янгышаськымтэ. Занятиослэсь ортчемзэс шӧдытэк но кылисько. Нырысетӥ нуналаз анай жингыртӥз. Соку ик солы шуи: «Анай, мон татчы улыны кылисько».

«Кызьпу туй»

Та ӧрен Алексей Шагиев кивалтэ. Пусъёно, кивалтӥсь понна та выль уж ӧвӧл. «Усточикарын» со дас одӥг ар ужа ини. Туэ дас тямыс нылпиос кызьпу туйен лэсьтӥськыны мылкыд кариллям, соос пӧлысь куатез – нылъёс. Мар гинэ соос уг пӧрмытъяло! Туесок но лэсьтӥллям, шулан но тупатӥллям, нылъёс асьсэ киосынызы быдэстэм заколкаосынызы, чеберъяськонъёсынызы ушъясько.

- Арысь аре кужмоесь, устоесь пиналъёс вуо. Соослы бадӟым юрттэт луэ интернет. Татчы вуытозязы, кызьпу туйен лэсьтӥськон амалъёс сярысь лыдӟо, видео учко, - вера А. Шагиев.

Куноын –

«Кизили»

Лагере та нуналэ Россиысь писательёслэн союззылэн ёзчиез, «Кизили» журналлэн валтӥсь редакторез Ульфат Бадретдинов вуылӥз.

Усточикаръёс со муген шулдыр концерт возьматӥзы: эктӥзы-кырӟазы, «Ойдо кузпалъяськом» телепередачаез адӟытӥзы, пиос огдырлы «Брангуртысь песянайёслы» пӧрмизы, кылбур гожъяны яратӥсь Надя Уракова аслэсьтыз гожтэм удмурт, ӟуч но англи кылын кылбуръёссэ лыдӟыса возьматӥз.

- Дас куинь ар дасяськи «Усточикаре» вуылыны, дас ньылетӥ араз вуи, - шуиз Ульфат Шайхутдинович пиналъёслы вазиськыса. – Отрядъёстэс сюресъёсын герӟаса нималлямды. Туж тунсыко. Мынам но вань повесте, кудӥз нимаське «Сюреслы кулэ сюресчи» шуыса. Зэм, сюресъёс пӧртэм луо. Нош тужгес кузез – астэ утчан сюрес.

Пиналъёс гожъясьлы юанъёссэс сётъязы. Соос пӧлысь тросэз У. Бадретдиновлэн творчествоезлы сӥземын вал. Дуно куно «Усточикаре» кузьымъёсын вуиз – «Кизили» журналлэсь юбилейной номеръёссэ вуттӥз. Угось туэ нылпи журналлы - 30 ар. Мылкыд карисьёс писательлэсь «Ӵушъял вордӥське веньёстэк» книгазэ басьтӥзы.

Викторияен Мирослав

«паръяськизы»

Зэм, лагерьын улон «пӧзе». Татын пиналъёслэн шутэтскыны дырзы ик ӧвӧл - котькуд нунал малы ке но сӥземын луэ. Та нуналэ «Удмурт сюан» йылолэз возьматӥзы. Виктория Зариповалы но Мирослав Паркутдиновлы валтӥсь рольёсты ӵектӥзы – соос жених но невеста луизы.

Удмурт дӥськутъёссэс дӥсяса, нылпиос кык группалы люкиськизы: огез - ныллэн матысьёсыз но эшъёсыз, кыкетӥез – пилэн.

«Ой, италмас, италмас» кырӟанэз быдэстыса, пияш анай-атаеныз но матысьёсыныз ныллэн дораз мынӥз. Юртэ шедён понна, кыӵе гинэ эскеронъёс пыр соос ӧз потэ! Секытлыкъёсты вормыса, Мирослав Виктория доры вуиз. Бӧрысь соос ЗАГС-сэ мынӥзы. Эсьмаса, егитъёслы зундэсъёс но дасяллям. Нош кырӟан гуръёс? Соос та нуналэ ӧз ик чалмытске. Егит кузпалъёс, кудо-туклячиос но куноос кема шулдыръяськизы на.

Миляуша БУЛАТОВА.

7475

Оставить сообщение: