icon_gotop
18+
autorisation
Войти | Регистрация
Время в Татышле
04:32
Пятница, 29 Марта
Рекламный баннер 990x90px top

«Удмурт нылкышно - лякыт сямо адями, нылпиосызлы дуно эш, сюлмаськись анай»

09:51 14.07.2016

Семья – со улонлэн инъетэз, со пичи государство. Вапумъёс ортчыса, семьялэн кулэлыкезлэн дунлыкез эшшо но будэ, сое котькин но вала. Семьяын бадӟым инты басьтэ нылкышно-анай. Туала нылкышнолэн рольёсыз трос: анай, кузпал, общественной улонэ пыриськись, усто ужбергатӥсь, кивалтӥсь но мукет.

Нырысь ик вераме потэ гуртысьтымы трос нылпиё семьяос сярысь. Шумпотымон, соос гуртамы трос. «Материнская слава» гадьпусэн данъямын Ильвира Шакрисламова, Лариса Зайнокова, Галима Шафикова, Наталья Садиева, Нина Султаншина. Куинь нылпиё семьяос но гуртамы уно. Соос - школалэн данъяськымон пиналъёссы, школалэн азьпал улонэз, гуртлэн осконо поколениез.

Гурт калыктэк школа но ӧвӧл. Школаын устоесь, ужзэс ӟеч тодӥсь дышетӥсьёс ужало. Наталья Андреевна Гарифуллина БР-ысь дышетон удысысь отличник нимен пусъемын. Индира Хасиятовна Зинатуллина туж кибашлы, ужаз выль технологиосты быгатыса кутэ. Нина Демьяновна Шайхаттарова шаертодонъя музеен усто кивалтэ, пӧртэм конкурсъёсы пыриське, уно ужъёсыз грамотаосын пусъемын. Илиана Фёдоровна Мухаметзянова пиналъёсты киужлы быгатыса дышетэ. Бадӟым уж нуиз данъяськымон дышетӥсь Анита Дельмухаметовна Зидымакова. Школамы «Лучшие учителя России» быдэсросси конкурсэ пыриськыса, со но мон Грант утӥмы.

Гуртамы удмуртлыкез утисьёс – со дышетӥсьёс гинэ ӧвӧл, культура удысын ужасьёс но. Кема аръёс ӵоже та удысын тырше Зульфира Хатипова. Ёросын гинэ ӧвӧл, со республикаямы но тодмо аслаз чебер жингрес куараеныз. Озьы ик та ӧрын кема аръёс ӵоже ужам дано гуртоосмы – со Мадина но Саляхетдин Нуртдиновъёс. Соос кыкназы быдэс концерт возьматыны быгатозы. Гуртысь фольклор ансамбль но соосын кылдытэмын. Кузпалъёс вить нылпи будэтӥзы. Ваньзы но соос кибашлыесь, визьмоесь, сабырлы, гурт калыклы адӟем карымонэсь.

Туала улонын вожъяськыса учконо сыӵе семьяос шоры, кытын тупаса уло кӧня ке поколениос: песяй-песятай, ӵужанай-ӵужатай. Милям гуртамы но вань сыӵеос: Зайноковъёс, Аллаяровъёс, Зидымышевъёс, Мардамшинъёс, Нуриахметовъёс, Абкадировъёс, Насибуллинъёс.

Гуртын удмуртлыкез, сям-йылолъёсты утьыны но азинтыны юрттэ гурт вӧсь. Со бадӟым сэбет выллем луэ. Пиналъёс но отчы шумпотыса пырисько, арысь аре соослэн лыдзы йылэ. Вӧсез радъянын юрттӥсько Анфиса Шафикова, Зинаида Гильмиярова, Анфиса Хамидуллина но мукетъёс.

Котькуд ӵукна гурт калык уждураз дыртэ. Милям гуртысь нылкышноос тросэз ёрос центре ветлыса ужало: нылпиоссы сярысь сюлмасько. Илюса Шарафисламова, Орхия Шайсламова нянь пыжо, Вероника Шайсламова но Вероника Минигараева пӧрасько. Кема аръёс ӵоже ини эмъюртысь нылпи ёзэтын медсестра луыса ужа Елена Игнатьева. Нылпиосты яратӥсь, лякыт, сабырлы сюлэмо нылкышноез ёросын тодӥсьтэм адями ик ӧвӧл, дыр.

Кирпич поттон заводын трос нылкышноос ужазы. Кылсярысь, секыт пиосмурт ужез быдэсъяно луизы Наталья Садиева, Татьяна Байситова, Лилия Насибуллина, Галина Гильмаева но мукетъёс.

Гурт удысын тыршем нылкышноослэн но ужзы туж данъямон. Орден нуллӥсь скал кыскисьёсмы – Флюра Миндиярова но Раиса Султаншина. Усто ужасьёс пӧлын лыдъясько Мензайда Ярмиева, Фидалия Адуллина, Зоя Риянова, Зульфия Шакирьянова, Мунира Батраева, Виталина Бадртдинова, Лариса Мардамшина, Галима Шафикова, Надежда Шарафисламова. Кема аръёс ӵоже быръем ужазы жадёнэз валатэк тыршизы кунян утисьёс Лида Адисанова, Раиса Байрамгулова, пудо врач Нина Султаншина, бухгалтер Валентина Нуртдинова.

Нылкышноос кышкатэк басьтӥсько пиосмурт уж борды но. Усто бергато соос машина рулез но. Пусъёно Наталья Садиевалэсь ужзэ. Со кема аръёс ӵоже кирпич поттон заводын сварщик луыса ужаз. Гур поттон уж но капчи ӧвӧл. Сое котькин пиосмурт ужен лыдъя. Но гуртамы вань сыӵе нылкышноос, кудъёсыз та веран пумысен пумитъяськозы. Ираида Хасанова гуртамы гинэ ӧвӧл, котыр ёросъёсын но усто уженыз тодмо луэ: чебересь гуръёс шукке-поттэ со. Та ужен ик выре школаямы кема аръёс ӵоже повар луыса ужам Лена Исламова но. Та кышномурт туж кибашлы - керттӥськыны, вуриськыны усто. Пӧръёсыз макем ческытэсь! Нош сюлмысьтыз потэм кылбур чуръёсыз котькинлы кельшымонэсь.

Вераны кулэ, улон азинскемъя, нылкышноос кивалтон уж борды но кышкатэк басьтӥсько. Сыӵеос пӧлысь одӥгез - Лариса Зайнокова. Со гуртысь нылпи садын кивалтӥсь луыса ужа. Данъяны луэ сое кибашлы луэменыз но. Со кулэ луисьтэм кагазъёслэсь но чебересь арбериос пӧрмытъя, мукетъёслы мастер-классъёс возьматъя. Пӧръёсыз но паймымонэсь пӧрмо солэн.

Нылкышно маин гинэ уг выры, ма гинэ уг лэсьты! Зарни солэн киосыз. Флюра Миндиярова, кылсярысь, мунёослы удмурт дӥськут вурыны яратэ. Кытчы гинэ со уг вутскы. Арлыд шуыса уг улы, капчи мылкыдо со.

Галима Шафикова, кызьы пусйи ни вал, скал кыске, вить нылпи будэтӥз, дышетӥз. Пиосыз солэн кибашлыесь, пуэн лэсьтӥськыны ярато, нылыз - вуриськись. Куинь пиосыз Булькайпанысь профессиональной училищеын дышетскизы, училищелэн коллективез данъяське соосын. Дышетӥсьёс тау кылъёссэс верало.

Школаын техперсонал пӧлын ужа Рита Гафиуллина. Куинь нылпиоссэ со огназ будэтӥз-дышетӥз, профессия басьтыны юрттӥз. Вань нылпиосыз семья кылдытӥзы ни, ужало.

Туала улонын корка но, быдэс юртъер но, семья но кышномурт вылын возиське, шуыны луоз. Удмурт нылкышно – лякыт сямо адями, вордэм нылпиосызлы дуно эш, сюлмаськись анай.

Нина ЗИНАТУЛЛИНА.

Татышлы ёросысь Уразгильды гурт.

10021

Оставить сообщение: