icon_gotop
18+
autorisation
Войти | Регистрация
Время в Татышле
11:06
Sunday, 17 Октября
Рекламный баннер 990x90px top

Юртын шуд, ог-огдэ гажан но оскон кузёясько ке

2016-07-07

«Выль кенлы монэ мотоциклэн ваизы»

Зоя Нафиковалэн пичи дырыз Калтасы ёросысь Вылысь Тыхтем гуртэ кылемын. Та вакытэ со чик ӧз малпаськы, вылды, пересьмон дырыз Илиш ёросысь Ташкичиын ортчоз шуыса. Татчы со ӵужапаез доры куное гинэ вуылыны яратэ вылэм. Нош Гаяз Хазимовичлэн сюлмыз егит ныллэсь мылкыдзэ шӧдымтэ. Со куно ныллы синмаськем…

Арлыдо кузпалъёс егит дырзэс туннэ серем пыр гинэ тодазы ваё. «1963-тӥ арысен ни мон Ташкичиын улӥсько, - вера Зоя Армагиновна. – Выль кенлы монэ мотоциклэн ваизы». Зоя апай 1940-тӥ арын вордӥськемын. Одӥг ар ортчыса Быдӟым Атыкай ож кутскем. «Мон атаез уг тодӥськы», - шуэ Зоя Армагиновна. Солэн анаез куинь нылъёсыныз огназ кылемын. Соин соослы пичиысен ик ужлэсь шӧмзэ валаса будоно луэм. Зоя апай колхозазы ыж, скал утем. Ташкичие вуэмез бере но солэн удысэз воштӥськымтэ. «Татын но ыж ути, гектарен кушман будэтӥм, картофка трос мерттозы вал,- тодаз вае со. – Али огез но ӧвӧл ни».

1995-тӥ арын Зоя Армагиновнаез пенсие келязы. Шутэтскы вылэм киостэ ал вылад поныса, но сюлэм уг вала на буйгатсконэз. Со али ке но юрт котыраз шаплы берга.  Гаяз агаен ӵошен бакча будэто, ыж, курег вордо. Быдэс улонзэс гурт удыслы сӥзем адямиос чидалозы шат ужтэк пукыны? Гаяз агай кема аръёс ӵоже тракторын ужамын. Соин со ю-нянь будэтонлэсь но, пудо утёнлэсь но дунзэс ӟеч вала. «Трактористлы Бакалыын дышетски. Соку трактористъёсты Бакалыын, Бирскын, Николо-Берёзовкаын гинэ дасяло вал, - вера Гаяз Хазимович.- Пенсие потытозь трактористын ужаны ӧз кылды. Берло слесарьын ужай».

Нафиков кузпалъёс кибашлыесь нылпиос будэтӥзы. Юрт пушказы котькытын Рая нылзылэн (со сярысь газетмылэн 28-тӥ оштолэзе потэм номераз гожъямы вал) сюлмаськемез шӧдӥське. Солэн усто киосыныз керттэм ужъёсыз синъёсты мальдыто. «Агидельын улӥсь нылмы но бертыны кулэ», - кыдёке учкыса вера Зоя апай. Со ӵемысь озьы укное кариськылэ: анай но атай котьку нылпиосыз понна шумпотэ но сюлмыныз соосты вите.  

Мылкыдын егит ке но,аресэз уд ваты

Минетдинов кузпалъёс 50 ар ӵоже трос узырлык люкаллям. Зэм, соослэн ваньбурзы тросэзлы адӟонтэм но валантэм. Кузпалъёс угось дворец но ӝутӥллямтэ, бадӟым  машиназы но ӧвӧл. Нош узырлыксы – бадӟым семьязы, яратоно ужзы но калыклэн гажанэз.

Тимергази Ахматдинович палэнысь кузпал утчамтэ. Гуртысьтызы ик Фагиля Гарифулловнаен семья кылдытэм. Али гинэ вылэм кадь соослэн ӵошен улыны кутскемзы,  пичи нылпиоссылэн нырысьсэ верам кылзылы, лэсьтэм вамышсылы шумпотэмзы. Кузпалъёс шӧдытэк но кылиллям куинь пиналъёссылэсь будэмзэс. Дыр бызись ву сямен туж ӝог ортче вылэм. Табере ни соос асьсэос песяй-песятай луэмын. «Туннэ Ирина кенэным но Раис пиеным улӥськом. Соослэн кык нылъёссылэн вормонъёссы понна шумпотӥськом», - вера Фагиля апай.

Минетдиновъёслэн бадӟым семьяязы чылкыт, чебер удмурт кыл кузёяське. «Мон ньылетӥ классозь удмурт кылэз дышетӥ», - шуэ со пумысен Ирина кензы. Вераны кулэ, Ирина апаен ми нырысь гуртазы ортчем «Вӧй келян» ужрадын пумиськылӥм. Со культура юртысьтызы «Пинал сюлэмъёс» ансамбльлэн ужаз пыриське. «Ми, гуртын улӥсь котькуд адями сямен ик, пудо вордӥськом, - вера Ирина апай. – Скалмес, ыжъёсмес но чипы-курегъёсмес сюдон-утялтон сярысь анай-атаймы сюлмасько». Минетдинов кузпалъёс гид котырын берганы дышемын: соослэн быдэс уж сюрессы гурт удысын тыршыса ортчемын. «Мон 35 ар ӵоже фермаын парсь ути, - вера Фагиля апай. - Одӥг собранилэсь но ӧй кыльы. Кык ар ӵоже сельсоветын депутат луи, ёросын одӥг ар депутат вал».

Тимергази Ахматдиновичлэн но уж сюресэз синмаськымон. Со 40 ар ӵоже гусеницаё тракторен ужам. «Толалтэ нюлэс ворттӥмы, корлы Нефтекамске но ветлэме вань», - тодаз ваёнъёсыныз люкиське со. Тимергази агайлэн тыршемез трос пӧртэм грамотаосын данъямын. Со – ужысь ветеран. Нош дораз – гажано кузпал, оскымон атай но яратӥсь песятай.

Ольга НИГАМАТУЛЛИНА.   

Илиш ёрос.  

1919

Оставить сообщение:

НАШИ ПАРТНЕРЫ