Оскон пыӵаз сюлэме, крезьгур вӧлмиз котыре

Элен вӧсь

Вашкала дырысен удмурт калык Инмарлы оскыса улӥз. Шудбуро улон, тазалык, шуныт зоръёс курыса, ю-нянь мед удалтоз шуыса, солы вазиськылӥз. Туннэ нуналэ но удмуртъёс Инмарлы осконзэс уг ышто, вӧсьёсы люкаськыло.

Тодосчиослэн гожъямъёссыя, Элен вӧсе Уфа но Пермь губерниосысь Бирск но Оса уездъёсысь удмуртъёс пыриськиллям. Асьсэды соос, огвыжыысь потэмзэс лыдэ басьтыса, Эль шуыса лыдъяллям. Элен вӧсь уездъёсысь бадӟымгес гуртъёсын – Алтаевоын, Вуж Варяшын но Киргаын ортчылэм. Отчы туж трос калык люкаське вылэм. Совето вакытэ Элен вӧсь таркамын вал. 2008-тӥ арын со выльысь улӟиз. Со нырысьсэ Алтаевоын ортчиз. Нош туэ удмуртъёслэн бадӟым вӧсьсы Киргаын луиз. Та нуналэ вӧсяськем ӝукез котькуд мылкыд карись веръяны быгатӥз.

Туэ Инмарлы куинь ыж но одӥг ветыл вӧсязы. Выль корказылы сӥзьыса, тазалык, шудо улон курыса Киргаысь Куснияровъёс вӧсе ыж сётӥллям, нош Мусинъёс - коньдон. Алтаевоысь Александр Зайнуллин кузпалызлы тазалык курыса ыж сётэм. «Удмуртиысь вуэм куноос но 3500 манет тыр коньдон понӥзы, «Выль сюрес» крестьян хозяйствоослэн огазеяськонзы ветыл сётӥз. Люкаськем ӟугесез хозяйстволэн кассаяз сётомы. Татышлы ёросысь выль татышлыос но вӧсе лыктӥзы. Соос одӥг ыж басьтыса ваиллям», - вера Киргаысь вӧсясь Леонид Зартинов.

Тани котыре вӧсясьёслэн – Алтаевоысь Анатолий Галихановлэн, Киргаысь Леонид Зартиновлэн, Выль Татышлыысь Раис Рафиковлэн но Салим Шакировлэн, Удмурт Элькунысь Ува но Алнаш ёросъёсысь Василий Траткановлэн но Алексей Лекандровлэн - куаразы чузъяськиз. Соос, киязы тусьтыен ӝук кутыса, Инмарлы вазиськизы. «Оминь!» - вазиз соос бӧрсьы йыбырттэм калык. Куриськем кылъёс, кыдёке шуккиськыса, быдэс дуннее вӧлмизы кадь, котькуд адямилэн сюлмаз ӟечезлы оскон пыӵатӥзы. Вӧсь кылъёс йылпумъяськем бере, люкаськем калык шунды бергамъя интыяз куинь пол котырскиз. Дыр вуиз тыл вылын пӧзем сӥлен ӝукез веръяны. Ческыт ӝукез котькин ас понназ куриськыса сииз. Берло, вӧсяськемъёс кабыл мед луозы шуыса, выльысь йыбырттӥзы, куинь пол котырскизы. Собере калыкез вуэн пылатӥзы, Инмарлэсь шуныт зоръёс куризы.

«Чакара»

Элен вӧсе люкаськем калык ӝутскем мылкыдын, азьпалэзлы кужым басьтыса, бускель Бадӟым Гондыр гуртэ дыртӥз - «Древние напевы удмуртов «Чакара» регионъёс куспысь фестивале.

«Чакара» ке шуиськом, пель сьӧрамы соку ик кылӥсько йӧно гурезь сярысь вашкала жингрес кырӟанъёс но веранъёс. Возиськем легендая, трос аръёс ӵоже калыкъёс Чакара гурезе вуыло, отысен кылало-бурало, Инмарлы вазиськыло, солы тау каро, тупаса улэмзы понна. Ойдолэ, эшъёс, улон но ужан понна, будӥсь пиналъёслы вашкаосмылэсь визьнодзэс сётон вылысь, ваче ки кутӥськыса ӵошен капчиен вамыштоме Чакара гурезь йылэ.

Угось Чакара гурезь – со удмуртъёслэн огазьын, огкылысь луыса улэмзылэн символэз!» - таӵе кылъёсын ужрадэз нуисьёс усьтӥзы фестивалез.

Туэ фестиваль сизьыметӥ ползэ радъяськиз. Азьвыл аръёсы выллем, таяз ужрадэ но шаермылэн пӧртэм сэрегъёсаз улӥсь, калык сям-йылолъёссэс, пересь песянай-песятайёссылэсь кырӟанъёссэс утьыса возись удмуртъёс вуизы: Удмурт Элькунысь, Башкортостан, Татарстан но Марий Эл Республикаосысь, Киров, Свердловск, Тюмень улосвылъёсысь, Пермь шаерысь удмурт калык фольклор коллективъёс. Фестиваль Удмурт Элькунысь Камсьӧр удмуртъёслэн мер огазеяськонзылэн кичӧлтэмезъя радъяське, УР-ысь Йӧскалык министерстволэн но УР-ысь Кун Кенешлэн юрттэт возьматэмзыя. Со сяна, ужрадэз ортчытонэ трос кужымзэс понӥзы Пермь шаерысь Губернаторлэн администрациысьтыз внутренней политикая департамент, Пермь шаерысь Культурая министерство, «Пермский дом народного творчества» КГАУК, Куеда ёрос администрация но Пермь шаерысь удмуртъёслэн национально-культурной центрзы.

Та нуналэ гондыр музъеме люкаськем калыкез бадӟым праздникен ӟечкыланы вуизы Пермь шаерысь Губернаторлэн администрациысьтыз внутренней политикая департаментлэн йӧскалык кусыпъёсъя ёзэтэныз кивалтӥсь Анастасия Субботина, Удмурт Элькунысь Йӧскалык политикая министрлэн нырысетӥ воштӥсез Павел Орлов, Удмурт Элькунысь Камсьӧр удмуртъёслэн огазеяськонэнызы кивалтӥсь Флюра Чибышева но Куеда ёрос администрациен кивалтӥсь Александр Горбунов.

Фестивалез дасянэ азинлыко пыриськемъёслы – Пермь шаерысь культурая министрлы Игорь Гладневлы, «Пермский дом народного творчества» КГАУК-лэн генеральной директорезлы Татьяна Санниковалы, Пермь шаерысь Губернаторлэн администрациысьтыз внутренней политикая департаментэн кивалтӥсьлы Леонид Политовлы, Бадӟым Гондыр но Вуж Шагирт гурт поселениослэн администрациосынызы кивалтӥсьёслы Фидаиль Гайтиевлы но Вадим Муллаяровлы, Пермь шаерысь удмуртъёслэн НКЦ-енызы кивалтӥсьлы Станислав Гадиятовлы, Бадӟым Гондырысь культура юртэн кивалтӥсьлы Вячеслав Менликаевлы, культура юртысь методистлы Роллер Ахметгалиевлы, Бадӟым Гондырысь школаен кивалтӥсьлы Анна Смирновалы но солэн воштӥсезлы Светлана Мелляхматовалы – Павел Анатольевич Орлов УР-ысь Йӧскалык политикая министерстволэсь тау карон гожтэтъёссэ сётӥз. Сюлмысь верам ӟеч кылъёс котыре кыдёке вӧлмизы.

Тани люкаськем калык азе гондыр но воргорон потӥзы, нюръяськыны кутскизы. Адями усто кужымзэ возьматӥз, гондырез вормиз – театрализованной постановка пыр культура юртын ужасьёс гуртсылэн кылдэмез сярысь легендаез возьматӥзы. Озьы усьтӥськиз фестиваль.

Сцена вылэ потӥз Марий Элысь Мари-Турек ёросысь удмурт фольклоръя «Ӟардон» калык ансамбль. Жингрес арган куара но кырӟан гур люкаськем калыклэсь мылкыдзэ бурдъяз. «Ӟардон» ансамблез Бадӟым Гондырысь «Тюрагай» калык ансамбль воштӥз. Учкисьёс тюрагайёсты кужмо кичабонъёсын пумитазы. Ансамблез тодӥсьтэмез ик ӧвӧл, лэся. Асьсэлэн устолыкенызы соос котьку адӟем карымон луо.

Ижевскысь Камсьӧр удмуртъёслэн огазеяськонзылэсь «Ӟаныкай» фольклор ансамбльзэ но учкисьёс шуныт пумитазы. Аслэсьтыз малпанъёссэ кырӟан пыр котыре вӧлмытӥз Киров улосвылысь Вятские Поляныысь «Чипчирган» удмурт калык ансамбль.Татышлы ёросысь Вязовкаысь «Уӵы ныл» калык ансамбль «Армие келян» сям-йылолэз возьматӥз. Кылан-буранъёсын, жингрес кырӟанъёсын но эктонъёсын узырмытэмын вал адӟытонзы. Нош Ермекей ёросысь Купченей гуртысь вуэм куно Анастасия Вождаева фестивалез такмакъёсыныз шулдыртӥз.

Котькуд аре выллем, фестивале Екатеринбургысь куноос но вуизы. Георгий Шамшияров арганэн шудыса калыклэсь мылкыдзэ ӝутӥз. Со сяна, учкисьёслы капчи мылкыд кузьмазы Набережные Челныысь «Ӟардон», Куеда ёросысь Гожанысь, Киргаысь, Вуж Шагиртысь, Кипчакысь но Бадӟым Гондырысь «Пинал сюлэм», «Уӵы», «Инвожо», «Зангари» но «Купанча», Чернушкаысь «Эшъёс», Бурай ёросысь Алтаевоысь «Инвожо», Калтасы ёросысь Бадӟым Качакысь «Зангари», Янаул ёросысь Вуж Варяшысь но Андреевкаысь «Югдон» но «Зангари», Нефтекамскысь «Выжы-кум», Дегтярскысь «Италмас», Тюменьысь «Оскон», Чайковскийысь «Зарни сӥзьыл», Завьял ёросысь Подшиваловоысь «Марӟан» ансамбльёс. Ужрадэ пыриськем коллективъёсты дипломъёсын пусйизы.

Фестивальын пичиос но бадӟымъёс, егитъёс но арлыдоос шулдыръяськизы. Кырӟан-эктон гуръёс сяна, татын калык творчествоя мастер-классъёс ужазы, нылпиослы тунсыко шудонъёс радъяськизы, аттракционъёс ужазы. Пермь шаерысь удмуртъёслэн, ӟучъёслэн, чувашъёслэн, бигеръёслэн но башкиръёслэн национально-культурной центръёсынызы калык юртъёс дасямын вал.

Удмурт калык сабырлы, тыршыса ужась, куно пумитаны быгатӥсь. Нош кутскем уж кырӟан улсын капчиенгес быдэстӥське. Улон, кырӟан выллем, котьку шулдыр мед луоз.

Та нуналэ задор, мылкыдэз бурдъясь, сюлэмез буйгатӥсь, куддыр синвуаськытӥсь кырӟанъёс трос чузъяськизы. Котькуд ансамбль учкисьёсты аспӧртэм дуннее вуттӥз. Вашкала ӵыжы-выжыосынымы герӟась крезьгуръёсты выльысь но выльысь кылзэм потэ. Оскисько, вуоно «Чакара» фестивальын соосты одно ик кылзомы на.

Миляуша

НИГАМАТУЛЛИНА.

Пермь шаерысь Куеда ёрос.