icon_gotop
18+
autorisation
Войти | Регистрация
Время в Татышле
12:55
Вторник, 19 Октября
Рекламный баннер 990x90px top

Дышетӥсьлэн кужмыз пиналъёсыз бордын

2016-06-30

Светлана Ахматнуровна Вылысь Барабановкаысь покчиосты дышетон, визьнодан бордын тыршиз. «Дышетскемея мон математикая дышетӥсь,- вера со. – Пермьысь кун пединститутлэсь математикая факультетсэ йылпумъяй». Вылӥ тодон-валанэн ӧнерчиез нырысь Максим школае физикая дышетӥсен ужаны кутӥллям. Но солы отын кема ужаны кылдымтэ, Вылысь Барабановкае дышетыны выжтӥллям. Дышетӥсьлы ваньмызлы выльысь дышетсконо луэм, покчи классъёслы куронъёс но мукетэсь угось. «Пинал дыръя проверкаослэсь туж кышкано вал, - тодаз вайыса шуэ Светлана Ахматнуровна. – Нош берло ваньмызлы дышиське. Тодӥськод: быгатонэд вань, секытъёсты вормод». 

Светлана Ахматнуровна покчи классъёсын ужакуз тросгес саклык висъяллям нылпиоссэ гожъяськыны, лыдъяны-чотаны дышетонлы. Соин, вылды, пиналъёсыз Максим школае дышетскыны выжемзы бере но ӟеч тодон-валанэнызы висъяськылӥзы. «Берло нылпиослэн лыдзы кулэсмиз. Соин куинь классъёсты ӵошен дышетоно луиз. Но сыӵе амалэн ужан туж секыт», - дышетӥсь ортчем аръёсаз берытскыса кадь вераз.

Берлось классэ Светлана Ахматнуровна 2009-тӥ арын келяз. Соку гуртысьтызы школазэс пытсазы. Кыкетӥ классэз йылпумъям  Светлана Набиуллинаез но Виктор Хайдаровез куинетӥ классэ дышетскыны Максиме выжтӥзы. Нош Светлана Ахматнуровналы дышетон удысэн люкиськоно луиз. Озьы ке но дышетэм пиналъёсыз сое али ке но уг вунэто, дышетӥсьсылы шунытэн вазисько.

«Дышетӥсьмы милемлы анай кадь вал, - верало солэн азьвыл дышетскисьёсыз Светлана Набиуллина но Альбина Мардамшина.- Со тужгес переменаосын шӧдӥськылӥз. Нош урокъёсын Светлана Аркадьевна котькудмылы мур куронъёс пуктыны быгатылӥз. Соин урокъёсын солэн ушъяса верам кылыз ми понна бадӟым шумпотон вал. Солэн тросэз верам кылъёсыз туннэ но милям тодамы на. Бадӟым классъёсын тодон-валан басьтыкумы но Светлана Аркадьевналэн  дышетэмезлэн емышез шӧдӥськылӥз».

Дышетэм нылъёсыныз пумиськон Светлана Ахматнуровналэн синъёсаз тылгизьы кенжытӥз. Озьыен, юнме ортчымтэ солэн покчи классъёсын ужан аръёсыз. Тӥни кыӵе визьмоесь, быгатӥсесь но шаплыесь солэн нылпиосыз. Дышетӥсьлэн ужезлы со тужгес бадӟым дун.

Ольга ГИЛЬМУРАНОВА.

Янаул ёрос.

2157

Оставить сообщение:

НАШИ ПАРТНЕРЫ