Андреевкаысь зангариос

- Пичиослы шудонъёс, пӧртэм ӵошатсконъёс бускель Югамаш гуртысь библиотекарен Гульшат Сармановаен радъяськом. Татчы лыктыкуз со бӧрсяз школаысь нылпиосты но вае. Гуртамы пичиосмы трос ӧвӧл угось, - вера 22 арлэсь ятыр та ужаз тыршись Гузалия Закиевна.

Гузалия апайлэсь улон сюрессэ клублэн, «Зангари» калык коллективлэн сюресэзлэсь люкыны ик уг луы. Ансамбле ветлӥсьёслэн кылъёссыя, со клубе ужаны вуэмен ансамбль дано луэм. Культура удысэ со 1994-тӥ арын вамыштэм. Капчи мылкыдо, тыршись кивалтӥсь нырысь ик со дыре «ышем» ансамблез улӟытон сярысь сюлмаськыны кутскем.

- Ансамбль нырысь «Ложкари» нимаськем, сое 1987-тӥ арын Флюса Ахметова кылдытэм вылэм. Коллектив люкаськем бере, ӵошен сое «Зангари» ниманы кенешимы. 2012-тӥ арын коллективмылы «калык ансамбль» ним сётӥзы. Та вормон оген утэмын ӧвӧл, ансамбле ветлӥсьёслэн тыршемзылэн емышез со. Шумпотымон, ансамбле пыриськисьёс пӧлын арлыдоосмы но вань. Анастасия Валиевалы, Муслима Байдуллиналы, Замфира Куштанаевалы, Зуляйха Назмутдиновалы, Райхана Минияхметовалы, Фируза Гафиуллиналы, Лилия Хаерламановалы, Зиния Садрисламовалы, Хасима Мардановалы, Фаниля Гаязовалы, Рида Хасфатуллиналы пумтэм тау кылъёсме верасько. Котькытчы мед вазёзы, соос пумитъяськыса уг уло. Ужзы, арлыдзы шоры учкытэк, ужрадъёсы азинлыко пырисько. Гуртын, ёрос центрын, бускель ёросъёсын, республикалэн палэназ ортчись фестивальёсы, конкурсъёсы но вуылӥськом. Нимысьтыз тау кылъёсме вераме потэ на арганчимылы Фанус Газизовлы. Со сяна, ансамбле пыриськись Анастасия апаймы но арганэн усто шудэ, репециосты солэн шудэмезъя радъяськом, - вера кивалтӥсь.

Зэм, зангариос фестивальёсы, праздникъёсы трос пол вуылӥллям ни. Ансамбльлы сётэм кызьлэсь ятыр данъян грамотаос но, тау каронъёс но со сярысь верало. Удмурт Республикаын но, Пермь шаерын но, татышлы музъемын но соосты туж шуныт пумиталлязы. Нош ёросысьтызы удмурт гуртъёс сярысь веранэз ик ӧвӧл: татын соос - гажано куноос.

Тол ӝытъёссы но зангариослэн тунсыко ортчо. Нуналлы быдэ сямен соос клубе люкасько, киужъёсын выро.

- Туэ роза сяськаос керттыны дышетскимы. Ӵошен ужаны туж шулдыр ук. Киужез но лэсьтӥськом, ужрадъёс дасян сярысь но вераськиськом. Ог-огмылэн юбилейёсамы но ӵошен дасяськиськом. Куно сектаны пельнянь но ӵошен пӧраськом, - шуэ Рида Хасфатуллина.

Огкылын вераса, «Зангари» ансамбле ветлӥсьёс туж тупаса уло, соослэн мӧзмыны дырзы ик ӧвӧл.

- Милям озьы огӵош кариськыса улэммылэн секретэз мар бордын шуыса малпаськоды? Ваньмыз кивалтӥсь бордысь потэ. Гузалия Закиевна котькыӵе уж борды капчиен басьтӥське. Ужзэ но лэсьтэ, со дыре ик выль ужрад сярысь но малпаське. Солэн ноку но дыр ӧвӧл шуэмез ӧвӧл. Со сыӵе бере, ми но – ансамбле ветлӥсьёс – ужрадъёсы пыриськыны котьку дась, - ансамблен кивалтӥсьлы вылӥ дунъет сётэ гуртысь депутат Фаниля Гаязова.

Уж луэм бере, шумпотонэз но, сюлмаськонэз но луэ. Туэ Гузалия апай клублэсь корказьзэ тупатон сярысь малпаське.

- Тупатъян ужъёс лэсьтонэн герӟаськем юанэн Ямады гурт поселенилэн администрациеныз кивалтӥсьлы Гузалия Магдановна Талиповалы вазиськи ни. Юрттыны тыршо шуиз. Тау солы, котьку малпанъёсмылы, ужъёсмылы дурбасьтэмез понна, - вера Г. Губаева.

Гузалия апаен вераськонъя ик валаны луэ: ас ужзэ со туж яратэ. Сюлмыныз со клуб, зангариос понна «ӝуа». Солэсь тыршемзэ кивалтэт но адӟе. Туэ Культура удысын ужасьёслэн нуналазы сое ёрос администрацилэн данъян грамотаеныз но коньдон кузьымен пусйиллям. Со сяна, Гузалия апайлэн азьвыл аръёсы утэм данъян грамотаосыз, дипломъёсыз но трос.

- Лыдъяса но уд быдты, - пальпотыса вера со кагазъёсын папказэ возьматыса.

Фольклор ансамбльёс туалаез вашкалаен герӟась сюрес выллем луо. Соос калык сям-йылолъёсты, культураез выжыысь выжые вутто. «Зангари» удмурт калык ансамбль но со бордын ужа. Кылсярысь, тодысалзы шат пичиос но егитъёс андреевкаослэсь вашкала дыръя кырӟам такмакъёссэс, соосты зангариос ӧй быдэстысалзы ке?

Миляуша БУЛАТОВА.

Янаул ёрос.