icon_gotop
18+
autorisation
Войти | Регистрация
Время в Татышле
17:30
Четверг, 28 Октября
Рекламный баннер 990x90px top

Калыклы мӧзмыны дыр ӧз луы, крезьгур ӧтиз шулдыръяськыны

2016-06-16

Дан тыныд, гурт калык!

«Дэмен» СПК туэ гырон-кизён ужъёссэ дыраз йылпумъяз. Хозяйстволэн кивалтэтэз но бусы ужасьёс вань шуг-секытъёсты вормыны быгатӥзы. Пудоосты толйытонын но соос ӟеч лыдпусъёс возьматӥзы. Со понна дэменъёсты ёрос сабантуйын кыкетӥ интыен данъязы.

Выль Татышлыысь гырон быдтонэ трос калык люкаськиз. Соосты ӟечкыласа вераськизы Татышлы ёрос администрациысь гурт хозяйствоя управлениысь валтӥсь зоотехник И. Ф. Булатов, Выль Татышлы гурт поселенилэн администрациеныз кивалтӥсь Н. В. Рахимьянов но «Дэмен» СПК-ен кивалтӥсь Р. Х. Зиннатуллин. «Вань вормонъёс тӥляд тыршеменыды басьтэмын. Со понна котькуддылы тау карон кылъёсме верасько», - шуиз хозяйствояз тыршисьёслы вазиськыса  Радис Ханифович. Собере со устооссэ ужасьёсты кузьымъёсын пусйиз. Нош культура удысын тыршисьёс соосты чебересь кырӟан-эктонъёсынызы шулдыртӥзы. Со сяна, та нуналэ жингрес гуръёссэс кисьтӥзы на Николай Анисимов (Татышлы ёросэ со экспедициен вуэмын вал) но Алёна Тимерханова.

Вӧсясьлы – премия

Газетмылэн 12-тӥ куартолэзе потэм номераз Татышлы ёросысь Бальзюгаысь Назип Садриевлы Камсьӧр удмуртъёслэсь йылолъёссэс утемез но азинтэмез понна «Древо мира» премиез сётэмзы сярысь ивортӥмы ни вал. Та нуналэ со кузёез доры вуиз. Данъян кылэз но коньдон премиез тодмо тодосчи Ева Тулуз вуттӥз. Со Назип агайлы но республикаысьтымы удмурт калыклэсь сям-йылолъёссэ утисьёслы тау карон кылъёссэ вераз. Тодады вайытӥсько: Назип Садриев 60 арлэсь кема дыр ӵоже ни гуртазы ортчись вӧсьёсын Инмарлы куриське. Вӧсь лудэ со нырысьсэ 1954-тӥ арын 24 аресаз лыктэм. Туннэ Назип агай удмурт калыклэсь осконзэ егитъёслы выжтон сярысь сюлмаське. Табере солэн Данъян кылызлэн копиез Выль Татышлыысь вӧсь коркан утиськоз.

Назип агайлы та премиез басьтыны юрттэт возьматӥзы Парижысь но Уфаысь тодосчиос Ева Тулуз но Ранус Садиков, Эстониысь Тарту университетысь докторант, Татышлы ёросысь Уразгильдыысь Анна Байдуллина. Соос  БР-ысь удмуртъёслэн НКЦ-зылэн тау карон гожтэтэныз пусъемын.

Лыдӟисьёслы – кузьым

Куартолэзе газетмылэн редакциез «Счастливое авто» акция ялӥз. Отчы пыриськон понна «Ошмес» газетлы 2016-тӥ арысь кыкетӥ паларлы гожтӥськем квитанциослэсь копизэс лэзёно вал. Акцие Илиш, Калтасы, Татышлы, Янаул ёросъёсысь, Ижевскысь, Москваысь, Парижысь лыдӟисьёсмы пыриськизы. Соос пӧлын кузьымъёсты шудытонын «Автомобильный компрессор» утӥзы Янаул ёросысь Шудекысь лыдӟисьмы Касим Уранбаев но Илиш ёросысь Ташкичиысь Сильвия Шайдуллина. Нош «Аварийный набор» Калтасы ёросысь Пичи Качакысь Разифа Мениевалы шедиз.

Та нуналэ ик лыдӟись-ёсмы пӧлын редакцилэсь синпель кузьымзэ шудытӥмы. Солы кузё луиз Татышлы ёросысь Калмиярысь Раиса Байрамшина.

Кырӟан гуръёс но спорт шудонъёс

Сабантуй шулдыръяськонъёс кема кыстӥськизы. Люкаськем калык сцена вылын кырӟаз-эктӥз, пӧртэм спорт ӵошатсконъёсы пыриськиз. Трос учкисьёс люкаськизы волейболэн шудон площадкае, мешокен нюръяськисьёс котыре. Та нуналэ пичиос но мӧзмыса ӧз улэ. Соос понна пӧртэм шудонъёс радъямын вал. Гурт калыклы но лыктэм куноослы дырын-дырын усись зор шапыкъёс но ӧз люкетэ шулдыръяськыны.

Ольга ГИЛЬМУРАНОВА.

Татышлы ёрос.

2226

Оставить сообщение:

НАШИ ПАРТНЕРЫ