icon_gotop
18+
autorisation
Войти | Регистрация
Время в Татышле
23:45
Пятница, 23 Июля
Рекламный баннер 990x90px top

Юбилей но сабантуй одӥг бугоре биниськизы

2016-06-16

Ужрадэз гуртысьтызы дышетӥсь Ульяна Яппарова Ирина Самигуловаен гожтэм «Ми – Камсьӧр удмуртъёс» кылбурез лыдӟыса усьтӥз. Тани сцена вылэз туала удмурт чебер дӥськутъёсын инвожоос - Светлана Галиева (кивалтӥсьсы), Эвелина Сайфиева, Римма Галимзянова, Ольга Шакирова, Елизавета Мухтарова, Надежда Зияева, Ульяна Яппарова, Тальгия Чикурова, Альфия Ахметова - шулдыртӥзы. Соос, ӟеч мылкыдзэс кырӟан пыр возьматыса, вуэм дуно кунооссэс шуныт пумитазы.

«Инвожо» ансамбльлэн аресэз сокем бадӟым ӧвӧл ке но, сое тросэз тодо. Тани туннэ но соосты ӟечкыланы вуизы Истяк гурт поселенилэн администрациеныз кивалтӥсь Винарис Хузин, Истякысь ужбергатӥсь, депутат Физанур Валиев, Башкортостанысь удмуртъёслэн историяя но культурая центренызы кивалтӥсь Ирина Самигулова, БР-ысь удмуртъёслэн национально-культурной центренызы кивалтӥсьлэн воштӥсез Юрис Саитов. «Ваняос кыкетӥзэ бадӟым ужрад ортчыто. 2011-тӥ арын соос гуртсылэсь нуналзэ туж чебер пусйизы. «Инвожо» ансамбль котькуд ужрадэ пыриськыны тырше. Люкаськыны клубзы ке но ӧвӧл, ӵошен ваньзэ быдэстыны быгато. Сыӵе соос визьмоесь, тыршисесь, - шуиз Юрис Саитович. – Туннэ сабантуй ортче. Вӧзтӥмы кӧня поездъёс ортчизы ни, соос но ужрадлы аспӧртэм шӧм пыӵато». Озьы ик инвожоослы  ӟечкылан кылъёссэс, кырӟан-эктонъёссэс вуттӥзы Татышлы ёросысь Кызыл-Ярысь «Марӟан», Янаул ёросысь Вуж Варяшысь «Югдон», Шудекысь «Зангари», Можгаысь «Инвожо» ансамбльёс, Ахтиял гуртысь куноос но мукетъёс. Ӟеч мылкыд кузьмазы на Ваня гуртысь нылъёслэн но пиослэн задор эктонъёссы.     

Та нуналэ инвожоос асьсэос но сцена вылын яркыт воректӥзы. Учкисьёслы соослэн «Дед Федот» сценказы но туж кельшиз. Апай-кенакъёс кырӟаны-эктыны быгатэмзы сяна, песятаен песянайёслэсь рольёссэс но туж тунсыко шудӥзы.

Та нуналэ ваняослы бадӟым посылка вуиз на. Со тужгес восьтэтэзлы ыстэмын вал. Сое Шудекысь Роман Хазипов басьтӥз. Но посылкалэн кузёез коробка пушкысь выль посылка шедьтӥз. Со тужгес пилешезлы келямын вылэм. Солы Янаулысь Фарит Зайдуллин кузё луиз. Со но коробка пушкысь коробка шедьтӥз. Таиз ю букваен кутскись тужгес арлыдоезлы кышномуртлы ыстэмын вылэм. Тазэ кузьымез Ваняысь Юля Мустафина басьтӥз. Солы но ӧз кылды посылкалы быдэсак кузё луыны. Коробкаез тужгес кема ӵошен улэм кузпалъёслы сётыны куриллям. Солы Ваняысь ик Туктабей но Минкаир Миншакировъёс кузё луизы. Нош берпуметӥез коробка гуртысь тужгес пичиезлы келямын вылэм. Сое Софья Тимиряевалы басьтыны шуд усиз.

Ужрадэз «Ум люкиське» кырӟан йылпумъяз. Сое ӵошен быдэстон – со ачиз бадӟым эшъяськон. Уго огъя кужымен быдэс гурезез но берыктод. Тани тазэ но бадӟым ужрадэз дасянын юрттэмзы понна гуртысь староста Вениямин Галимзянов гурт калыклы, Физанур Валиевлы, Винарис Хузинлы но мукетъёслы бадӟым тау карон кылъёссэ вераз. Со сяна, кузёос соосты гажаса но яратыса ужрадэ вуэм ансамбльёсты синпель кузьымъёсын пусйизы. Шулдыръяськон таин гинэ ӧз йылпумъяськы, люкаськем калыкез пӧртэм спорт шудонъёс витизы на. 

Марина НИКОЛАЕВА.

Янаул ёрос.  

1443

Оставить сообщение:

НАШИ ПАРТНЕРЫ