icon_gotop
18+
autorisation
Войти | Регистрация
Время в Татышле
11:34
Sunday, 17 Октября
Рекламный баннер 990x90px top

«Кытын вордӥськи – отын ик кулэ луи»

2016-06-16

Котькуд адямилэн улоназ учкымон, данъяськымон но адӟем карымон адямиез луэ. Станислав Идиятовичлэн сыӵе адямиез – дышетӥсез, Николай Иванович Фазиуллин. «Николай Ивановичлэн урокъёсаз шумпотыса пырисько вал. Солэн верам котькуд кылыз мыным, шуом, пыӵа вал. Тямысэтӥ классэз йылпумъям бере со вӧзам лыктыса, пельпумме вешаса, тонэ, пе, дышетӥсен адӟеме потэ шуиз. Со кылъёс монэ бурдъязы, малы ке шуоно ачим но сыӵе малпанэн улӥ. Озьы мон Можгаысь педучилищее дышетскыны пыри. Сое йылпумъям бере сюресэ одӥг вал – аслам школаям дышетӥсь луыса берытски. Мыным черчение, физкультура но суредаськонъя урокъёсты сётӥзы», - вера Станислав Идиятович.

Гадиятов кузпалъёсты улон сюрессы нылпи дуннее вуттэм, шуыны луоз. Ирина кузпалыз нылпи садын ужам. Бӧрысь солэн визьнодам пиналъёсызлы Станислав Гадиятов тодон-валан сётэм. Станислав Идиятович вылӥ тодон-валан басьтон сярысь но сюлмаськем, Пермьысь кун пединститутын дышетскем, математикая факультетэз йылпумъям. «Математикаез школаын дышетскыкум ик яратӥсько вал. Соин со ӧрез бырйи», - шуэ С. И. Гадиятов.

1990-тӥ ар. Дышетӥсез райкомпартилэн нырысетӥ секретарез Александр Глушко ас дораз вазем. Со Станислав Идиятовичлы Киргаын сельсовет кылдытон сярысь верам. Солы кивалтӥсе пуксьыны дэмлам. «Школаысь кошкеме ик уг поты вал, но… Куддыръя улонлэн ӧрезъя но мынытэк уг луы», - ортчем аръёсаз берытскыса сямен вера Станислав Идиятович.

Котькуд адямилэн улон, уж сюресэз аспӧртэм луэ. С. И. Гадиятовлы калыкен ужаны гожтэм, лэся. Кирга гуртэ сельсовет кылдэм дырысен со отын ужам: 15 ар ӵоже кивалтэм. 2005-тӥ арын сельсоветэз быдтӥллям. 2000-тӥ арын С. И. Гадиятовез шаерысьтызы удмурт огазеяськонэн кивалтӥсе бырйиллям. Со дырысен Станислав Идиятович та ужаз азинлыко тырше. «Сюлмы куремъя ужасько. Удмурт калыке мед азинскоз, аслэсьтыз быгатонлыкъёссэ мед возьматоз. Калыкеным мон данъяськисько. Удмуртъёс – туж тыршись калык. Ёросысь гурт хозяйствоосты ке но басьтоно, соос удмуртъёс улэм интыосын гинэ ӟеч возиськемын. Пыд йылазы йыгмыт сылӥсь хозяйствоос пӧлысь тросэз – удмурт гуртъёс луэм хозяйствоос», - вера со.

Кема ӧвӧл Станислав Гадиятовичлы 60 арес тырмиз. Та дыр ӵоже солэн усто ужъёсыз понна данъян грамотаосыз, дипломъёсыз, тау каронъёсыз туж трос люкаськемын. Малпасько, соос вӧзы выльёсыз ватсаськозы на. Азьланезлы малпанъёсыз сярысь юанэлы со шуиз: «Тазалыке, кужыме луиз ке, ужаны малпасько. Артём пие 8-тӥ классын гинэ дышетске на. Со сяна, мынам одӥг малпанэ вань: ас киосыным юртъер котырме шулдыртэме потэ. Туж яратӥсько лэсьтӥськыны. Яратоно уже борды басьтӥськыны дыр гинэ уг шедьы».

Миляуша БУЛАТОВА.

Пермь шаерысь Куеда ёрос. 

2337

Оставить сообщение:

НАШИ ПАРТНЕРЫ