Жин-жин, жин-жин вазиз гырлы. Со минутэ котькин тодаз ваиз, дыр, школаын дышетскем аръёссэ, дышетӥсьёссэ, школаен келяськем вакытсэ. Гырлыё школа сюрес кемалась мышке кылемын ке но, со ноку уг вуны, малпанъёсын ялан улэ.
Туэ Балтач ёросысь Асавка школаез кык пиос йылпумъязы: Радмир Галиев но Алик Зиятов. Соослы ӟечкылан кылъёсын вазиськизы школаен кивалтӥсь Дамир Рахимов, Тошкур гурт поселенилэн администрациеныз кивалтӥсь Булат Аглямов, ёрос центрысь «Шифа» аптекалэн кивалтӥсез Раушания Хазиуллина, гуртысь отставкаысь подполковник Владислав Шакиров но мукетъёс. Пиослы соос синпель кузьымъёссэс сётӥзы, нош Дамир Гайнелович Данъян грамотаосын пусйиз.
Ужрадэ выжыкылысь султанэн Шахерезада но вуылӥзы. Асавка школаын дышетскисьёс соосты тунсыко тодон-валан дуннеен тодматӥзы, школаын пиналъёсты котьмалы дышетэмзэс возьматӥзы: кырӟазы но, кылбуръёс но лыдӟизы. Выжыкылысь куноос выпускникъёслы выль вормонъёс, шудо сюрес сӥзьыса келяськизы.
Шуныт кылъёс туннэ нокинэ палэнтӥ ӧз ортче. Нылпиос дышетӥсьёссылы, анай-атайёссылы тау кылъёссэс веразы, анай-атайёс – дышетӥсьёслы, школаын ужась котькуд адямилы. Ужрад вальс эктонэн йылпумъяськиз.
Тямыс ар талэсь азьвыл, Радмирен Алик нырысетӥ классын дышетскыку, «Берпуметӥ гырлы» ужрадын 9-тӥ классэз йылпумъясьёсты 2016-тӥ арын ортчоно выпускноязы ӧтиллям вылэм. 2008-тӥ арын Асавка школаез быдтэмъёс со сярысь вунэтӥллямтэ: тросэз та нуналэ яратоно школаязы вуизы, выпускникъёслы азинсконъёс сӥзизы. Со сяна, дышетӥсьёссылы шуныт кылъёссэс веразы.
Школаез йылпумъян – котькуд адямилэн улонысьтыз одӥг валтӥсь люкетэз. Кайгуэз валасьтэм, сюлмаськонъёстэм пичи дыр ортчемын, азьпалан – выль сюрес, кытын шумпотонъёс но, шуг-секытъёс но пумисько. Со выль сюреслэн нырысетӥ вамышез – экзаменъёс. Соос бадӟым улон сюреслэн усьтонэз выллем луо.
Миляуша БУЛАТОВА.
Балтач ёрос.
Оставить сообщение: