icon_gotop
18+
autorisation
Войти | Регистрация
Время в Татышле
19:36
Пятница, 29 Марта
Рекламный баннер 990x90px top

Вормон вылэ вормон – ӝуатско «кизилиос»

14:13 19.05.2016

Ӵошатскон торжественной построение бордысен кутскиз. Командаос азьын вераськизы БР-ысь удмуртъёслэн национально-культурной центренызы кивалтӥсь, «Ошмес» газетлэн валтӥсь редакторез Салимьян Гарифуллин, Татышлы ёрос Кенешлэн секретарез Радик Рахимов, ёросысь егитъёсын ужанъя но спортъя ёзэтэн кивалтӥсь Эльза Валиева, Улысь Балтач гурт поселенилэн администрациеныз кивалтӥсь Эдуард Рахимзянов, «Рассвет» СПК-ен кивалтӥсь Альберт Минлебаев, Улысь Балтач школалэн директорез Людвиг Зидымаков. Ваньзы соос пиналъёслы азинсконъёс но вормонъёс сӥзизы.

Котыре Россилэн гимнэз чузъяськиз. Флаг ӝутыны потӥзы кылем арын олимпи шудонъёсын вормисе потэм Бадӟым Качак командаысь Анастасия Гиндуллина но Валерий Галиахметов.

Улысь Балтач школаын дышетскисьёс куноосты шулдыр концерт номеръёсын пумитазы. Удмурт, башкир, ӟуч но туала эктонъёсты быдэстӥсьёсты, кырӟаны усточи Яна Фазлыеваез ужрадэ вуэмъёс шуныт пумитазы, киоссэс жалятэк чабизы.

Старт - финиш

Ӵошатсконлэн валтӥсь судьяез Радмир Губаев олимпи шудонъёслэсь радлыксэс валэктэм бере, ӟырдыт нюръяськонъёс кутскизы. Уйпалась пельтӥсь кезьыт тӧл но ӧз люкеты спортсменъёслы вылӥ лыдпусъёс возьматыны. Соос таӵе ужрадэ нырысьсэ вуиллямтэ угось. Ӵошатскисьёс пӧлын ёрос, зональной ужрадъёсысь вормонъёсын берытскемъёс но трос.

60 метре бызьылон. Та ӧрын пиос пӧлын Улысь Балтач школаын дышетскисьёслы вуисьёс ӧз луэ: финише нырысетӥ пыриз Мансур Давлетбаев, кыкетӥ – Влад Кайранов, куинетӥ – Влас Кайранов. Нылъёс пӧлын котькинлэсь ӝог бызиз Бадӟым Качак школаысь Анастасия Гиндуллина, кыкетӥ интыын - Улысь Балтач школалэн филиалаз – Кызыл-Яр школаын дышетскись Виктория Зарипова, куинетӥ – Выль Татышлы школаысь Ангелина Садиева.

Кросс. Пиос 1000 метръем дистанциез ортчизы. Татын тӧллэсь но ӝог бызиз Влас Кайранов. Солэсь ӧжытлы бергес финише вуиз Улысь Балтач школаысь Олег Шайдуллин. Куинетӥ интыын Вуж Варяш школаысь Максим Галиакберов. Нылъёс 500 метре бызизы. Татын ӝоглыкеныз висъяськиз Выль Татышлы школаысь Виктория Даваева, кыкетӥ интылы кузё луиз Улысь Балтач школаысь Вилена Султаншина, куинетӥ интылы – Бадӟым Качак школаысь Анжелика Алетдинова.

Кузьдалае тэтчан. Нырысетӥ интыын луизы качакъёс – Валерий Галиахметов но Анастасия Гиндуллина, кыкетӥ интые потӥзы выль татышлыос - Виктор Даваев но Ангелина Садиева, куинетӥ интыын - кузёос: Влад Кайранов но Виктория Зарипова.

Тупез лэзьян. Пиос пӧлын тупез тужгес кыдёке «лобиз» Выль Татышлы школаысь Валдис Нуртдиновлэн, кыкетӥ но куинетӥ интыосын луизы Бадӟым Качак школаын дышетскисьёс – Илья Галиуллин но Никита Галиахметов. Нылъёс пӧлын тупсэ тужгес кыдёке лэзиз Выль Татышлы школаысь Лилия Абдуллина. Солэсь ӧжытлы гинэ матэгес лэзиз Вязовка школаысь Алиса Арсланова, куинетӥ интыын луиз Бадӟым Качак школаысь Виктория Давлетбаева.

Эстафета. Кутскиз пиналъёслэн яратоно ӵошатсконзы. Татын котькуд командаысь кык пи но кык ныл кужымзэс мертазы. Вормисе потӥзы кузёос, кыкетӥ интыын луизы качакъёс, куинетӥ – выль татышлыос. Таин олимпи шудонъёслэн нырысетӥ люкетэз йылпумъяськиз. Вуиз нуназеян вакыт. Котькуд команда татчы поваръёсын вуиз. Тылскем вылын пӧзьтэм шыд, чай чылкыт омырын туж ческыт кошкиз.

Тужгес тунсыкоез шудон

Волейболэз пиналъёс чидатэк витизы. Ужрадлэн кыкетӥ люкетэз быдэсак солы сӥземын вал. Жаляса верано, Вуж Варяш школалэн командаяз шудӥсьёс тырмыт луымтэен, соос спортъя фестивальлэн кыкетӥ люкетаз ӧз ни кыле. Волейболын, пиос пӧлын но, нылъёс пӧлын но, ньыль командаос нюръяськизы. Учкисьёслэн но лыдзы трослы йылӥз. Нылъёс пӧлын «пӧсь» шудон пуромиз Выль Татышлы но Улысь Балтач школаосысь командаос куспын. Быдэс возь огдырлы муш палэплы пӧрмиз кожалод. Висисьёс кесясько, шулало, шудӥсьёсты бурдъяны выро. Нокинлэн сётӥськемез уг поты. Командаослэн кужымзы огвыллемгес, счёт одӥг-кык очколы гинэ висъяське. Вормон туннэ выль татышлыослы пальпотӥз. Озьыен, улысь балтачъёс кыкетӥ, куинетӥ – качакъёс. Пиос пӧлын вормисе потӥз Улысь Балтач школалэн командаез, кыкетӥ интыын – Выль Татышлы школалэн, куинетӥ – Бадӟым Качак школалэн.

Огъя утэм интыосты лыдэ басьтыса, туэ олимпи шудонъёсын вормисе потӥз Выль Татышлы школалэн командаез. Киысь кие выжись кубок соослы шедиз. Кузёос кыкетӥ интые потӥзы, куинетӥ интыын – Бадӟым Качак школалэн командаез. Вормисьёсты ваньзэс интызылы тупась медальёсын но НКЦ-лэн данъян грамотаосыныз пусйизы.

Йылпумъян интые

Фестивале котькуд пинал шумпотыса вуиз, кужымзэ жалятэк нюръяськиз, ӟеч лыдпусъёс но усто быгатонлыкъёссэ возьматӥз. Ӵошатсконлэн радлыкез но пыр-поч малпамын вал. Судьяос но, мандатной комиссия но ужзылы бадӟым саклык висъязы. Огкылын вераса, Улысь Балтач школалэн коллективез фестивалез вылӥ дунъет сётымон ортчытӥз. Ужрад удалтӥз. Пиналъёслэн пумтэм пальпотонъёссы но нуналлэсь пайдаё но тунсыко ортчемзэ возьматӥзы. Одӥг арскын соос выльысь та ужрадын пумиськыны вераськизы. Вуоно арын но фестиваль луоз, луозы выль сюлмаськонъёс, выль вормонъёс. Туэ вормисьёс пӧлы пырымтэос вуоноын нырысетӥ интыос понна нюръяськозы. Ваньмыз соослэн пӧрмоз. Кызьы шуо, спорт – со индунне (вселенная) выллем, отын но «кизилиос» ӝуатско.

        Миляуша БУЛАТОВА.

Татышлы ёрос. 

8208

Оставить сообщение: