Башкортостан Республикаысь Сельхозконсультированияя центрлэн лыдпусъёсызъя, валэс юосты кизён 1034 сюрс гектарын быдэстэмын, со пӧлысь 773 сюрс гектарын - тысё но тысё-кӧжыё культураос (58%), 33,8 сюрс гектарын – сакыркушман (68%), 141,6 сюрс гектарын – кумбагыш (71%), 4,3 сюрс гектарын – кукуруза (22%). Кылем арын та вакытэ юосты кизёно бусыослэн 12%-аз гинэ кидыс пыртэмын вылэм на.
Калтасы ёросысь «Новый путь» сельхозкооперативын кизён агрегатэн бусые нырысь потӥз механизатор Андрей Насипуллин. Кизисеныз Алексей Гафутдиновен соос Вылысь Тыхтем вӧзысь лымшорпал бусые вика кизён борды басьтӥськизы. Солэсь азьвыл татын ДТ-75 трактореныз мускыт пытсанэз быдэстӥз Роберт Минликаев, культивациез – Андрей Султанаев. Хозяйствоен кивалтӥсьлэн Рамиль Агзамовлэн кылъёсызъя, Андрей Насипуллин – опыто ужась, тракторын со 12 арлэсь ятыр тырше ни. Соин ик таӵе бадӟым ужез кутскыны солы оскиллям.
Оштолэзьлэн кутсконаз хозяйствоын ёрос агроконференция ортчиз. Ужрадэ вуэмъёслы кизён ужъёсты быдэстыны кулэ луись техника возьматӥзы. Соку ик кизён агрегатъёс, тракторъёс быдэсак дасямын ни вал. Туннэ нуналэ техникаен герӟаськем шуг-секытъёс татын уг пумисько. Кытын музъем куасьме, отчы усыян агрегат дыртэ, бӧрысь кизисьёс пото.
Туэ хозяйствоын 1025 гектар музъеме тысё культураосты кизьыны чакламын. Со сяна, кумбагыш но кукуруза кизёзы на. Кизён ужъёсы огъя тямыс техника кыскемын: куинь ДТ-75 тракторъёс, куинь Т-150 тракторъёс но кык МТЗ-82 тракторъёс.
Ленин нимо СХПК-ысь механизаторъёс но – Владимир Вачиев но Дмитрий Абдуллин – вазь ӵукнаысен ӝытозь бусыын тыршо: ДТ-75 тракторъёсын мускыт пытсан ужъёсты быдэсто. Ужан агрегатъёссэс соос бусые 17-тӥ оштолэзе поттӥзы ни вал. Нырысь гурезё интыосты усыязы, но зоръёс кутскемен, соослэн ужзы ӝегатскиз. Али дыре кизён кампания кужмысь азинске, шуыны луоз. Мускыт пытсанэн ӵош, хозяйствоын трос аръем турынъёсты, толйись ӟегез усыян ужъёс быдэстӥсько. Татын МТЗ-82 тракторъёсын тыршо Геннадий Мадыров но Вячеслав Миназев. Кематэк соос яровой культураосты кизён борды басьтӥськозы. Кема аръёс ӵоже гурт удысын ужам механизаторъёс котькуд ужлэсь радлыксэ ӟеч тодо. Кылсярысь, Дмитрий Абдуллинэн уж стажез 34 арлы ӵоша ни. Атаез но солэн колхозын азьветлӥсь механизатор вылэм. Владимир Вачиев но атаезлэн пытьыетӥз вамыштэм, гырон-кизён амалъёслы атаезлэсь дышетскем. Хозяйствоен кивалтӥсьлэн Дамир Мухаметшинлэн пусъемезъя, котькуд механизатор ас ужзэ тодыса быдэсъя, соос вылэ котьку, пе, пыкиськыны луэ, кизён ужъёсты но соос дыраз быдэстозы.
«Победа» ООО-ын ужасьёс бусыослэн кот луэмзылы ӝожтӥсько. Хозяйствоысь Бадӟым Качак участокен кивалтӥсьлэн Назиф Абдуллинлэн кылъёсызъя, суткаен ужан амал радъямын ке но, лыдпусъёс шумпотымон вылӥын ӧвӧл на. Бусыосын огъя куать тракторъёс ужало. Механизаторъёслэн Максим Салимовлэн, Егор Шакирзяновлэн, Алексей Минлибаевлэн, Юрий Шакирзяновлэн, Андрей Исанбулатовлэн, Владислав Гилязевлэн, Андрей Ахмадыршинлэн, кидыс, удобрение нуллӥсьёслэн Юрий Насипуллинлэн но Раис Садыровлэн тыршыса ужаменызы, хозяйствоын 108 гектаре чабей киземын, 301 гектаре – йыды, 55 гектаре – вика но 12 гектаре – суданка. Тракторъёслы дыраз ГСМ нуллон сярысь сюлмаське Виталий Минликаев.
- Кизён ужъёслэн ӝыныез быдэстэмын ни, - вера Бурай ёросысь «Дэмен» ООО-ысь валтӥсь инженер Виталий Шамсияров. – Сезьы, кӧжы, однолетка кизимы.
Туэ дэменъёс сьӧдчабей но кизьыны малпало. Азинлыко ужасьёс пӧлын лыдъясько Фидарис Тазетдинов но Алексей Саитов. Али дыре соос йыды кизё. Мускыт пытсан ужъёсты Руслан Суфияров, Альмир Валинуров но Захит Тимиргалиев быдэстӥллям.
Татышлы ёросысь «Агро-Танып» СПК-ын ужасьёс 30-тӥ оштолэзе кизьыны потӥллям. Валтӥсь агрономлэн Денис Мардамшинлэн кылъёсызъя, кизён ужъёсы огъя 10 техника кыскемын, кизёнлэн 60%-эз йылпумъямын: 105 гектар музъеме сезьы, 100 гектаре чабей, 180 гектаре йыды, 20 гектарлэсь ятыр музъеме кӧжы киземын. Ӧнерчи трактористъёслэсь Геннадий Валинуровлэсь, Рудик Рафиковлэсь, кизисьёслэсь Александр Туктамышевлэсь, Игорь Камаловлэсь, Альтаф Муратшинлэсь ужзэс вылӥ дунъя.
«Рассвет» СПК-лэн бусыосаз азинлыко тыршо трактористъёс Иван Рафиков, Геннадий Гайнияров, Григорий Шаймарданов, Сергей Хайдаров. Соослы дыраз кидыс вуттон сярысь сюлмасько Ефим Гильфанов, Олег Зидыганов, Вениамин Шайдуллин но Евгений Шарифуллин.
- Туэ кидыс, удобрение ласянь шуг-секытъёс ӧз кылдэ, 900 гектаре чабей, 550 гектаре сезьы, 300 гектаре йыды кизимы. Со дыре ик прикатывание ортчытӥмы. Пудо сиён культураосты кизён борды басьтӥським, соосты 750 гектаре кизьыны чакламын. Та дыре 200 гектаре кукуруза киземын ни, - вера валтӥсь агроном Андрей Шайхуллин.
«Колос» ООО-ын огъя 700 гектар музъеме тысё культураосты, 600 гектаре силосной культураосты, 220 гектаре турын кизьыны малпало. Туннэ нуналэ бусыын азинлыко ужало тракторист Алексей Гарифьянов, кизисьёс Рамиль Хатипов но Салават Шаймарданов. Соослы МТЗ-82 тракторен кидыс но удобрение нуллэ Ильшат Нурсалимов. Хозяйствоысь бригадир Фанис Валинуров пусъемъя, кизён ужъёслэн 50%-эз быдэстэмын ни.
«Дэмен» СПК-лэн бусыосаз но уж пӧзе. Хозяйствоын огъя 1569 гектаре тысё культураосты кизьыны чакламын,1287 гектаре – пудо сиён культураосты. Туннэ дэменъёсын 590 гектар музъеме кидыс пыртэмын: 330 гектаре чабей, 120 гектаре йыды, 80 гектаре сезьы, 60 гектаре вика.
- Кылем арен ӵошатон дыръя, туэ кизён уж азинлыко мынэ. Кидыс, удобрение, ГСМ тырмыт, тупатъян арбериос сярысь но ум сюлмаськиське. Ужасьёс понна нуназе но ӝыт сиськон радъямын. Музъемез дасян ужъёс 498 гектарын быдэстэмын. Татын пусйымон ужало Александр Николаев, Алик Суфияров, Альфир Фаузиев. 820 гектарын кульцивация ортчытэмын. Татын Дмитрий Галиаскаровлэн, Геннадий Садретдиновлэн но Сидор Камидуллинлэн ужъёссылы вылӥ дунъет сётыны луэ. Яков Рияновлэн но Николай Миннехузинлэн азинлыко ужаменызы, 380 гектарын каткование быдэстэмын. Озьы ик пусйымон ужъёссы кизисьёслэн Ильдар Шафиковлэн, Григорий Миннимухаметовлэн, Фёдор Мухаметзяновлэн, бусые кидыс нуллӥсьёслэн Андрей Хусаиновлэн но Артём Шайдуллинлэн, удобрение поттасьёслэн Игорь Абкадировлэн но Фидарис Шакировлэн, - вера кивалтӥсьлэн воштӥсез Рустам Галямшин.
Янаул ёросысь «Агрофирма «Урада» ООО-ысь валтӥсь агроном Александр Гарифьянов вера:
- Хозяйствоын кизён ужъёслы 1000 гектарлэсь ятыр музъем висъямын. Та дыре чабей, кӧжы, вика, йыды киземын. Кыле на кукуруза но однолетка кизьыны. Азинлыко ужасьёсты пусъёно ке, мускыт пытсанын висъяськизы Виктор Саляхов но Марат Шарипов, кизёнын – Фарит Хусаинов, Радик Хаязов, Айнур Мухаметшин. Кизисьёсмы – армие мынӥсь пиос: Виталий но Валерий Саляховъёс, Вячеслав Гарифьянов. Соослэн повесткаоссы киосазы ни – 24-тӥ мае армие басьтозы. Вераны кулэ, соос милемлы сӥзьыл бусы ужъёс вакытэ но трос юрттэт возьматӥзы.
«Победа» ООО-ын Шудек, Можга но Конигово гуртъёсын улӥсьёс тыршо. Хозяйстволэн бусыосаз К-700 тракторен (посевной комплекс) ужало Александр Суфиятов но Дмитрий Соломенко. Али дыре соос йыды кизён сярысь сюлмасько. Победаосын огъя 300 гектар музъеме чабей киземын, 126 гектаре – рапс, 265 гектаре кукуруза кизьыны чакламын.
«Колхоз Восток» СПК-лэн бусыосаз 12 техника ужа. Огъя 680 гектаре чабей но йыды киземын. Жадёнэз валатэк, бусы ужъёсты вакытаз йылпумъян сярысь сюлмаськыса ужало Борис Гарифьянов, Афанасий Насибуллин, Рахим Шайкышев, Валерий Мингараев. Культивациын тырше Артём Насибуллин, мускыт пытсанын – Николай Насибуллин. Пусйымон ужез КамАЗ машинаын ужась Алик Ахметгараевлэн но.
«Агро М» ООО-ын кизён ужъёс 4-тӥ куартолэзе кутскиллям. Та дыре 350 гектаре чабей, 110 гектаре йыды киземын. Та ужъёсты быдэсъяло Ринат Яруллин, Родислав Кунакбаев, Святослав Куснутдинов но Зиннур Валинуров. Мускыт пытсанын тырше Ильшат Кашапов.
Дасяз
Миляуша БУЛАТОВА.
Оставить сообщение: