Шулдыр гурзэ кисьтэ «Тюрагай»

Ужрадэз усьтыса ӟечкылан кылъёсынызы вазиськизы Куеда ёрос администрациен кивалтӥсьлэн нырысетӥ воштӥсез Алексей Горбунов, ёросысь удмуртъёслэн национально-культурной центренызы кивалтӥсь Станислав Гадиятов, Россиысь удмурт диаспораосъя координатор Флюра Чибышева, БР-ысь удмуртъёслэн ИКЦ-енызы кивалтӥсь Ирина Самигулова, Чернушкаысь удмурт огазеяськонэн кивалтӥсь Салават Гизатуллин но мукетъёс. Ваньзы соос кузьымъёсын вуизы. Ансамбле пыриськисьёс та нуналэ Данъян грамотаослы, тау карон гожтэтъёслы узырмизы. Бадӟым Гондыр гурт поселенилэн администрациеныз кивалтӥсь Фидаиль Гайтиев тюрагайёслы костюм вурыны 100 сюрс манет тыр сертификат сётӥз. Сое Бадӟым Гондыр гурт поселенилэн администрациысьтыз Депутатъёслэн кенешсы висъяз.

Куамын вить ар. Трос-а со, ӧжыт-а? Трос, малы ке шуоно ансамбльлэн историез узыр, вормонъёсыз но уно ни. Ӧжыт, малы ке шуоно сое выль сюресъёс витё на, кытын лыдъянтэм трос луозы на выль творческой вормонъёс. Нырысьсэ сцена вылэ потыкуз ансамбльлэн нимыз но ӧй вал на. Бергес ансамбльлы «Тюрагай» ним сётӥзы. Соин 21 ар ӵоже кивалтӥз Флюра Курбанова. Жаляса верано, туннэ нуналэ со пӧламы ӧвӧл ни. Ансамблез кылдытӥсьёслэсь нимъёссэс пусъёно ке, соос пӧлын Райда Сакриева, Тайфа Тухватова, Людмила Хайбиева, Елена Ахмадыльшина но трос мукетъёс. Туннэ нуналэ ансамблен быгатыса, усто кивалтэ Физа Гарифуллина.

Ансамбль калык кырӟанъёсты но эктонъёсты, сям-йылолъёсты гажась гуртоосты огазеяз. Ваньмыз одӥг вамышысен кутскиз – учкисьёслэсь тау кылъёссэс, кужмо кичабонъёссэс кылон бордысен. Тюрагайёслэн тыршемзы юнме ӧз луы, 1985-тӥ арын Быдӟым Атыкай ожын вормонлы 40 ар тырмонлы сӥзем Калык творчествоя быдэсросси смотрын «Тюрагай» лауреат луиз. 2001-тӥ арын коллективлы «Народный коллектив» ним сётӥзы. 2013-тӥ арын ансамбль «Играй, гармонь. Звени частушка!» фестивальын лауреат нимлы кузё луиз. Огкылын вераса, ансамбльлэн вормонъёсыз трос, вылӥын пусъемъёсыз – тужгес бадӟымъёсыз. Нош кытчы гинэ тюрагайёс ӧз вуылэ ни! Кылсярысь, Москваын радъяськем «Гербер» празднике, Юрлаын ортчем «Играй, гармонь, Прикамья» калыккуспо фестивале, «Древние напевы удмуртов «Чакара» регионъёс куспысь фестивале, Новосибирскын ортчем Геннадий Заволокин нимо «Играй, гармонь» калыккуспо фестивале пыриськизы. Со сяна, тюрагайёс гуртын, ёросын, шаерын ортчись котькуд ужрадъёсы вуыло, вормонъёслы кузё луо.

Ансамбль улоз шат арганчитэк? Куамын арлэсь ятыр тюрагайёслы крезьгурен юрттэ арганчи, крезьгурчи Фёдор Мухаяров. Туннэ но со эшъёссэ, учкисьёсты шулдыресь крезьгуръёсыныз шумпоттӥз.

Куамын вить ар ӵоже ансамбль вошъяськытэк ӧз улы. Со пӧртэм удысъёсысь кырӟанэз яратӥсь калыкъёсты, пӧртэм аресъемъёсты огазеяны быгатӥз. Юбилей нуналэ но сцена вылын арлыдоос но, егитъёс но, пичиос но кырӟазы-эктӥзы.

Улон шулдыр эшъёс ке вань, шуо. Тюрагайёслэсь юбилейзэс шулдыртыны вуизы матысь эшъёссы – крезьгуро дуннеын улӥсьёс: Бадӟым Гондырысь «Купанча» ансамбль, Кипчакысь – «Зангари», Ижевскысь - «Ӟаныкай»,Татарстан Республикаысь Зинаида Антонова, Татышлы ёросысь Выль Татышлыысь но Уразгильдыысь культура юртъёсын кивалтӥсьёс Зифина Фархутдинова но Зульфира Хатипова, Кызыл-Ярысь «Марӟан» калык ансамбль, ёросысьтызы бигеръёслэн но башкиръёслэн национально-культурной центрзы бордысь «Сандугач» ансамбль. Вераны кулэ, «Тюрагай» бордын нылпиослэн «Уӵыпиос» фольклор ансамбльзы кылдытэмын. Та нуналэ со коллективе азьвыл пыриськем нылъёс, пиос но тюрагайёсты ӟечкыланы вуизы, задор эктонзэс кузьмазы.

Юбилейлы сӥзем ужрадэ зал тыр учкисьёс люкаськемын вал. Ужрадысь соос ӝутскем мылкыдын кошкизы. Праздник «Вылысь пумиськытозь!» кылъёсын йылпумъяськиз.

Миляуша БУЛАТОВА.

Пермь шаерысь Куеда ёрос.