Апаез сьӧры - школае
Куать аресаз пичи Альберт но апаез сьӧры школае ветлыны кутскем. Бадӟымъёслэсь адӟем карыса, ваньзэ сак эскерыса улэм. Дышетӥсьсы Рафаил Султанович берло солэсь визьзэ эскерыны малпам. Пиналъёс азе султытыса лыдъяськыны косэм. Арлыдыз пичи ке но, пияш ӝот-ӝот лыдъяськыны быгатэм. Озьы сое школае дышетскыны кельтӥллям. Дорысьёсыз пизылэн нырысетӥвормонэзлы шумпотӥллям:
- Мед ветлоз школае, оло, зӥбытгес но луоз, дартэз ортчыт трос, - малпаллям анаез но атаез. Озьы пичи Альберт школае ветлонзэ азьланьтэм. Дышетскон аръёсыз сярысь тодэ ваёнъёсыз али ке но солэн сюлэмаз утисько. Эшъёсыз трос луиллям, ӵошен дышетскем пиосынызы дырзэс шулдыр ортчытъяллям.
Альберт Минисламовичлэн пичи дырысьтыз тужгес сюлэмзэ вӧсь карись тодэ ваёнэз но вань. Одӥгаз арын соос классэнызы экскурсие мыныны вераськиллям. Но Альбертлы эшъёсыныз ӵошен городэ вуылыны кылдымтэ. Атайтэк будӥсь пияшлы, коньдонэз тырмымтэен, дораз кылёно луэм. Ӵапак соку, эшъёсызлэсь палэнэ ӝожомыса кыльыкуз, йыраз малпан лыктэм: ужаны тыршо, малпам ужъёсме коньдонлы ёрмыса улонэ пыӵатытэк кельтоно медаз луы.
«Вордскем гуртад ачид кузё кариськод»
Бигиней школаез 1976-тӥарын йылпумъяса, егит адями колхозэ ужаны лыктэм. Татын со уж дураз нырысетӥвамышъёссэ лэсьтэм. Кык арлы матэ комбайнерлэн, трактористлэн юрттӥсез луыса ужам. Нош бӧрысь Чернушкаысь автошколаын шофёрлы дышетскем. Автошколазэ йылпумъяса егит пи Армие кошкем. Солдат луэмез сярысь Альберт Минисламович пальпотыса тодаз ваиз:
- Мугоры лапег бере, весае ке но султӥ, секталае уг тырмы, стройлэн но пумаз гинэ сылоно луиз. Озьы ке но штабе шофёрен басьтӥзы. Армиысь бертытозям командирез нуллӥ.
Вордскем гуртаз бертэмез бере, «Социализм» колхозын ужзэ азьланьтэм, шофёр луыса ужам. Нош 1985-тӥарын, куинетӥтолшоре, нюлэс хозяйствоын тыршыны кутскем. Альберт Минисламовичез леснике юнматӥллям. Инкуазен, нюлэсэн, улонзэ герӟаса, Альберт Минисламович кызь ар та удысын ужам. Со аръёсы лесотехникумез, Уфаысь аграрной университетысь лесной факультетэз йылпумъям.
Котькуд адямилы улон пӧртэм воштӥськонъёс вае. Соос ог дышем сюресысь тэтчытыса, выль сюрес вылэ но султыто. Альберт Минисламовичлэн улоназ сыӵе воштӥськонъёс 2005-тӥарын кутскиллям. Со дыре Татышлы ёросэн кивалтӥсь Ф. Т. Гайнаншин Альберт Минисламовичез ас дораз ӧтем. Вераськонзы Улысь Балтач гурт поселениен кивалтон сярысь луэм:
- Ас гурттэ, калыктэ тон вить чиньыез кадь тодӥськод. Вордскем гуртэд понна тыршоно луод, уж борды туннэ нуналысен ик басьтӥськы, - курем Альберт Минисламовичез ёрос администрациен кивалтӥсь. Нош А. М. Минлебаевлэн гурт поселениен кивалтонэз сизьым толэзь гинэ кыстӥськем. Собере сое выльысь ёрос центре ӧтиллям. Ёрос администрациен кивалтӥсьлэн кабинетысьтыз Альберт Минисламович «Рассвет» АО-лэн кивалтӥсез луыса потэм.
- Тыршыса ужа, тон городын улэм адями ӧвӧл. Улысь Балтач гуртын вордскемед, будэмед, отын ужаса кыдамед. Бусыосыд мед гыриськозы-кизиськозы, калыкед гуртысь медаз кошкы, – верам солы Филарит Тимерханович.
Улон ӧрезлэн выль сямен кошкемез ӧжытак паймытэм ке но, Альберт Минисламович азяз пуктэм куронъёслэсь кышкаса чигнамтэ. Хозяйствоен кивалтон борды сюлмысь басьтӥськем. Со дыръёссэ тодаз вайыса кивалтӥсь шуиз:
- Нырысь секыт вал, пӧртэм пумо ужъёс зӥбизы. Тужгес секыт дыръёсы асме буйгатыны тырши: ог куинь ар ужало но, собере мар карыны учко. Нош куинь ар шуэм дас арлы кыстӥське ни.
Та дыр ӵоже трос ужъёс лэсьтэмын: выльдӥськонъёс, ӝутӥськонъёс, дас одӥг бригадалэсь сылӥсь хозяйстволэсь ужзэ нуон. Ужаз визь-кенешъёсын юрттэмзы понна Альберт Минисламович Ренат Галямшинлы но Ханиф Баймиевлы пумтэм тау кылъёссэ вера. Россиысь гурт хозяйствоос шоры учкон кӧня пол воштӥськемын ни? Выльдӥськонъёсын, воштӥськонъёсын ӵош кивалтӥсьёслы пӧртэм шуккетъёсты чидано луэ. Сыӵе дыръя ас азяд но, ужасьёс азе но бадӟым куронъёс пуктоно. Со вакытэ ик ужась киосты ыштонтэм пумысен сюлмаськоно-бызьылоно. Кивалтӥсьлэн пӧртэм сюлэмшугъяськонъёсыз, секытлыкъёсыз вераса быдтонтэм. Соосты вормыны Альберт Минисламовичлы аслаз кужмызлы бадӟым осконэз юрттэ. Калыкын юнме вераллямтэ: аслад кужымыдлы оскид ке, адямиос но оскыны кутскозы.
Басьтэм вормонъёсаз – улонэзлэн емышез
Мон азьын радэн-радэн пӧртэм папкаос сыло. Соос пӧлы Альберт Минисламовичлэн вормонъёсыз ватскемын. Нырысетӥрадын нюлэс хозяйствоын ужан аръёсаз басьтэмъёсыз. Нош кыкетӥяз - гурт хозяйствоын ужан дыръёсызлэн. Учкисько ке, кык палан но соос огмында тыремын. Соос пӧлысь БР-ысь Нюлэс хозяйствоя министерстволэн грамотаез (1995-тӥар), БР-ысь Президентлэн М. Г. Рахимовлэн Тау Карон Гожтэтэз (2006-тӥар), РФ-ысь Гурт хозяйствоя министерстволэн грамотаез (2010-тӥар), БР-ысь Кун Собранилэн-Курултайлэн грамотаез (2010-тӥар) но 2014-тӥарын БР-ысь Гурт удысысь сӥё-дано ужась ним басьтэмез сярысь верась чуръёс Альберт Минисламович понна тужгес дуно луо. Ужъя опытэн вошъяськон вылысь, 2006-тӥарын Альберт Минисламович Дание но вуылэм.
Писпу кужмо вайёсыныз, адями – семьяеныз
Альберт Минисламовичлэн семьяяз Алёна, Алесия но Алина нылъёсыз будӥзы. Атаймуртлэн бадӟым данъяськонэз но шумпотонэз соос бордын луэ. Алёна Ижевскысь аграрной университетлэсь экономикая факультетсэ горд дипломен йылпумъяз. Али дыре со УР-ысь Нациосын ужанъя министерствоын тырше. Дышетсконзэ аспирантураын азьланьтэ. Нош Алесия УдГУ-эз горд дипломен йылпумъяса, кыкетӥвылӥтодон-валан басьтӥз. Али дыре судебной пристав луыса ужа. Пичиез Алина нылзы ИжГТУ-эз йылпумъяса экономистын тырше.
Альберт Минисламович 34 ар ӵоже ни улон сюрестӥСания кузпалыныз артэ вамыштэ. Соос куинь нылъёссылэн, кык эмеспиоссылэн но Платон внуксылэн яратоно но гажано адямиоссы луо. Улон сюрес вылаз султыны юрттэм, визь, кенеш, ужаны кужым сётэм понназы Альберт Минисламович анаезлы, песятаезлы, аслаз семяезлы но матысьёсызлы тау карон кылъёссэ вера.
Альберт Минлебаевлэн улонэзлэн бадӟым люкетэз инкуазьын ортче: азьвыл – нюлэскын, нош туннэ – паськытэсь бусыосын. Озьы ке но кивалтӥсьлэн сюлэмыз уж дураз чылкыт омырен шокаменыз гинэ уг буйгатскы. Ӝытазе яке шутэтскон дыръёсаз со ог дышем сюрестӥз яратоно нюлэсъёсаз вамыштэ. Альберт Минисламович сӥзьыл губияны ветлэ, гужем инкуазьлэн шулдыр сэрегъёсаз пукыса кужым люка. Нош кырысь бертыкуз ю-нянен, пудо сиёнэн узыр бусыосыз пыр ортче. Тӥни кытчы ватӥськемын гурт калыклэн быронтэм узырлыкез.
Кивалтӥсь котьку аслаз кужымезлы, калыкезлы оскиз. Озьы ке но солэн сюлэмаз Инмарлы вазиськонэз но вань. «Мон куриськытэк сюрес вылэ но уг потӥськы,- шуэ со. - Нокыӵе ужме но уг кутскиськы».
Ирина САМИГУЛОВА.
Оставить сообщение: