Бадрислам Садритдинович вордскемын 1934-тӥ арын Янаул ёросысь Выль Кирга гуртын, удмурт семьяын. Татын ик ортчем солэн пичи дырыз. Туннэ нуналэ но со яратоно вордскем гуртаз улэ. Садритдиновъёслэн семьязы бадӟым вылымтэ: соос Антонида дыдыеныз кыкназы гинэ будӥллям. Пичи дырзэ тодаз вае ке, нырысь ик дышетӥсьлэн син азяз пуксе гуртысьтыз семилетней школаез. Отын дышетскыкуз ик Бадрислам Садритдиновичлэн дышетӥсь луон малпанэз кылдэм. Таӵе малпанэзлы луонлык сётэм нырысетӥ дышетӥсез Куеда ёросысь Кирга гуртысь Мингали Милликаев. Пичи пияшлы дышетскон капчиен сётӥськем, школае со котькуд нунал шумпотыса вамыштэ вылэм.
1949-тӥ ар - малпанлэн быдэсмон вакытэз. Егит пияш Николо-Берёзовкаысь педучилищее дышетскыны пырем. Отын солэн матысь эшъёсыз луиллям Татышлы ёросысь Вылысь Балтачысь Рафаэль Шайсламов но Уразгильдыысь Нина Фаршатова. Али ке но Бадрислам Садритдинович соосты уг вунэты, улэм-вылэменызы, тазалыкенызы тунсыкъяськыса улэ.
1953-тӥ арын южтолэзе Бадрислам Садритдинович гуртаз, яратоно школаяз, практикае бертэм. Нылпиосын ужан солы туж кельшем, пиналъёс но егит ӧнерчи борды соку ик «биниськиллям». Практикантлы ивортӥллям: школаязы математикая дышетӥсь, пе, кулэ. Инвожо толэзе Бадрислам Садритдинович диплом басьтэм. Пӧсьтолэзе сое Бирскысь пединститутэ математикая дышетӥсьлы тодон-валан басьтыны ыстӥллям. Отын дышетӥсьлы толэзьлэсь кема дышетсконо луэм. Выль Кирга школаын Бадрислам Садритдиновичлы кема ужаны кылдымтэ, одӥг арскын школазэс Барабановкае выжтӥллям, гуртазы покчи классъем школа гинэ кылем. Барабановка школаын со огъя кызь вить арлэсь ятыр тыршем.
Аръёс ӝог ортчо. Бадрислам Садритдинович Выль Кирга, Барабановка, Каймашабаш, Арлян школаосты пыр потэм. Котькыӵе школае со мед мыноз, коллективен но, нылпиосын но капчиен огкыл шедьтыны быгатэм. Азьвыл ужам дышетӥсьёслэсь адӟем карыса, пичи «пырыосты» люкаса, со узыр тодон-валан шыкыс кылдытыны быгатэм. Дышетӥсь котьку улонлэн куронъёсыныз артэ вамышъям. Школа улон сяна, ёрос ужрадъёсы азинлыко пыриськылэм, спортын но со кужмо вылэм.
- Бускель гуртъёсысь школаосын ужано луи бере, трос дыръя олокӧня иськемъёсты пыдын ортчылӥсько вал. Сюрес вылэ ӵукна вить часын потэм дыръёс но луылӥзы. Толалтэ куас вылэ султӥсько вал. Соин мыным куасэн ӵошатсконъёсы пыриськон капчиен сётӥськылӥз, ужрадъёсысь вормонъёсын берытскылӥсько вал. Капчи атлетикая ӵошатсконъёслэсь но ӧй палэнскы. Мон котьку тазалыко улонэн эшъяськи, - вера Бадрислам Садритдинов.
Нуналъёс, толэзьёс, аръёс бере кылемын. Дышетӥсьлэн котькуд нуналъёсыз нылпиос, школа сярысь сюлмаськонэн тырмыса ортчиллям. Солэсь тыршемзэ синйылтытэк улӥллямтэ. Аръёс ӵоже Бадрислам Садритдиновичлэн Данъян грамотаосыз, дипломъёсыз, тау карон гожтэтъёсыз трос люкаськемын. Арлыдо дышетӥсь «Победитель социалистического соревнования в 1975 году» гадьпусэн, «Старший учитель», «Ужысь ветеран» нимъёсын пусъемын.
Котькуд дышетӥсь понна бадӟым кузьым – со дышетэм пиналъёслэн верам тау карон кылъёссы. Бадрислам Садритдиновичлэн сыӵе пиналъёсыз трос, практика ортчем нылпиосыз солы тау карыса, улэм-вылэмез, тазалыкез сярысь юалляськыса, солэн уженыз данъяськемзэс вераса трос гожтэтъёс келяллям. Со гожтэтъёсты дышетӥсь туннэ нуналэ но уте. Школаын ортчем аръёссэ ӵемысь тодаз вайыто туспуктэмъёсын альбомъёс но. Соосты Бадрислам Садритдинович ачиз тупатэм. Уго со котьку туспуктонэн тунсыкъяськем. Та сямыз али дыре но сӥямтэ на. Пӧртэм ужрадъёсын, вӧсьёсын, юбилейёсын со туспуктэмъёс мед луозы шуыса сюлмаське. Туспуктэмъёсын историлэн бадӟым люкетэз, пе, возиське.
Лякыт дышетӥсь луон сяна, Бадрислам Садритдинович – яратоно атай. Миннур кузпалыныз соос кык ныл но одӥг пи будэтӥзы. Ирина нылыз атаезлэн удысаз кыстӥськем. Кема аръёс ӵоже ни со нылпи садын ужа.
Та дыре арлыдо воргорон огназ улэ, солы юрттӥсько нылпиосыз. «Нылъёсы нуналлы быдэ сямен дорам вуыло. Номырлы ёрмыса уг улӥськы», - шумпотыса шуэ атаймурт.
Л. Н. Толстой гожтэм: «Дышетӥсь быръем ужзэ но нылпиосты огвыллем юн яратэ ке, со - зэмос дышетӥсь». Та кылъёсын ик Бадрислам Садритдинович сярысь но вераны луэ. Нылпиосты визьноданы солэн нимысьтыз тӥрлыкез ӧвӧл, со лякыт вазиськыса, быдэс сюлэмзэ гинэ адямиослы усьтэ. Соин ик пичиос со борды капчиен кыстӥсько, луоз. Бадрислам Садритдинович – вазиськись, адямиослы ӟечсэ сӥзись воргорон. Солэн небыт куараяз, умой синъёсаз – шунытлык. Соос котькинэ бордазы кыско.
Миляуша БУЛАТОВА.
Янаул ёрос.
Оставить сообщение: