Суккулово гурт поселенилэн администрациеныз кивалтӥсьлэн Тимерзян Хакимовлэн верамезъя, таӵе воштӥськонъёсты купченейёс кемалась возьмазы ни. Уго татын арысь аре егит семьяослэн лыдзы йылэ. Озьыен, гуртын пиналъёс но ӧжыт ӧвӧл. Соос быдэс нылпи сад тыр люкаськизы. Туннэ татчы ветлӥсьёс пӧлын тужгес пичиен лыдъяське Настя Иванова. Эшъёсыз пӧлын со ассэ шумприч возе, пӧртэм шудонъёсты киосаз шумпотыса бергатэ. Со вакытэ ик бадӟымъёсын ӵош бызьылыны но вутске. Уго татын пӧртэм аресэн пиналъёс одӥг группае ветло. Кивалтӥсьсы сяна, соосын трос дырзэ ортчытэ воспитательзы Клавдия Николаевна Константинова. Солы ас удысаз бадӟым юрттэт возьматэ Белебейысь педучилищеын (кивалтӥсьсы но со пыр потэмын) тодон-валан басьтэмез. Клавдия Николаевналы дышетскон юрт пинал сюлэмез ӟеч шӧдыны дышетэм. Озьы ке но воспитательлы ужез капчи уг йӧты, куддыр нылпиос сьӧры вуыны ик, пе, уг луы. Та ласянь со котьку юрттӥсезлы Надежда Ивановалы оскыны быгатэ. Нош пиналъёсты ческыт сиёнэн сюдон сярысь пӧзьтӥсь-кисьсы Елена Макарова сюлмаське.
Нылпиос туннэ кыкетӥюртазы шумпотыса вуо, трос вылезлы дышетско. Та ласянь соослы удалтӥз: выль нылпи сад трос пӧртэм шудонъёсын тырмытэмын. Со сяна, татын компьютерзы, телевизорзы, магнитофонзы вань. Висъетъёссы но туала куронъёсты лыдэ басьтыса дасямын. Соин, вылды, гуртысь котькудӥз анаймурт пиналзэ нылпи садэ сётыны тырше. Нош туннэ, жаляса верано, татын ваньзэс шумпоттыны уг быгато – интыоссы уг тырмо. Гуртысь одӥгез анаймурт Аида Кузнецова со пумысен шуэ: «Мон куинь нылпи будэтӥсько. Кыкез бадӟымесь ни, соослэн пичи дырзы дорын ортчиз. Пичиезлы гинэ садикен удалтоз. Матысь дыре солы но, пе, отчы инты шедьтозы». Озьы пичи Ксюша но эшъёсыныз ӵош выль нылпи садын шудыса будоз.
Ольга НИГАМАТУЛЛИНА.
Ермекей ёрос.
Оставить сообщение: