Кышномуртлэн ужез тазалыклы кышкытлык ваись ужен лыдъяське. Буяськисьёс ӵемысь кышкыт химикатъёсын выро. Кылсярысь, токсичной растворительёс, отбеливательёс. Механической ужан тӥрлыкъёс – смесительёс, конвейеръёс, моторъёс, ременьёс – луэм интыын, куара но мултэс луэ. Со но тазалыклы изъян вае. Буяськисьёс тросэз син висёнъёсын курадӟо: пӧртэм щёлочь, кислота шапыкъёс синъёсты быдто. Химикат паръёсын шокаса, ты, ньылон висёнъёс кылдо. Буям шортъёсты, басмаосты куасьтон интыын тепловой излучение но бадӟым луэ.
- Уже тазалыклы кышкытлык ваисен лыдъяськемен, мон пенсиын ини. Но дорын пукеме уг поты, одӥг дышем ужам ветлӥсько на. Туннэ нуналэ уже секыт шуыны уг луы. Улон азьлань вамыштэмен, ужан тӥрлыкъёс но выльмо, кнопкаосты шонер зӥбылыны гинэ быгатоно – ваньзэ машина быдэсъя. Уждун ласянь шугъяськонъёс уг кылдо, дыраз тыро. Азьло уж секыт вал, бадӟымесь рулонъёсты ачим ӝуткалляй. Озьы ке но ноку ӧй ӝожтӥськы. Кытын ке но ужано угось, коньдонтэк пукыны уг луы, - вера Роза Владимировна.
Кема аръёс ӵоже одӥг ужаз тыршем кышномуртлэн Данъян грамотатаосыз, Тау карон гожтэтъёсыз туж трос. Солэн нимыз котьку азьветлӥсь искожчиослэн Данъян пулазы луэм. Туннэ нуналэ но сое отысь адӟоно.
Пальпотӥсь ымныръем, задор мылкыдо Роза апайлэн тунсыкъяськонъёсыз трос. Тол ӝытъёсы со киужъёсын выре. Егит дыръяз тунсыкъяськем пужыятонзэ но уг вунэты, дырын-дырын, шулдыр гуръёс мытыса, со чебересь пужыос пӧрмытъя.
Шакирзяновъёс сад-бакча но утё. Гужем ваньмон дырзэ Роза апай отын ортчытэ. Солы котьку кузпалыз но пиосыз юрттӥсько.
Роза Владимировна туж шулдыр кырӟа. Со Нефтекамскысь «Выжыкум» ансамбле пыриське. Таӵе быгатонлык солы анаезлэсь, пе, пыӵам. Роза апайлэн кылъёсызъя, со матысьёссэ, эшъёссэ кунояны яратэ. «Дунне вылын одӥг пол улӥськом. Гумыр ӵоже ужаны но, шулдыръяськыны но быгатоно», - шуэ со.
Миляуша БУЛАТОВА.
Нефтекамск город.
Оставить сообщение: