Янаул ёросысь «Колхоз Восток» СПК-ын, кылсярысь, ужасьёс бусые 27-тӥоштолэзе потӥллям.
- Куазь зорыса улэмен, туэ бусы ужъёс ӝегазы. Нырысь ик трос аръем турынэн бусыосты усыян борды басьтӥським, собере подкормкае потӥм. Пусйыны кулэ Евгений Тимиргалиевез, со 970 гектар музъеме удобрение пазяз. Мускыт пытсанын но культивация лэсьтонын кужмысь тыршиз Артём Насибуллин. Туннэ нуналэ хозяйстволэн бусыосаз 10 пӧртэм техника ужа. Кизисьёс сярысь верано ке, пусйымон ужъёссы механизаторъёслэн Рафим Шайкышевлэн, Юрис Тимирзяновлэн но Андрей Насибуллинлэн, - вера хозяйствоысь валтӥсь агроном Фёдор Тимирзянов.
Туэ востокъёс, Фёдор Сабирзяновичлэн кылъёсызъя, 30 гектар музъеме сезьы кизиллям, огъя 1000 гектар чабей, 350 гектар йыды, 100 гектар суданка, 120 гектар кумбагыш, 240 гектар кукуруза, 75 гектар однолетка кизьыны малпало.
- Кидыс тырмыт дасямын, ГСМ сярысь но туннэ нуналэ сюлмаськонэз ӧвӧл. Техника тӥяськиз ке, слесарь, токарь, сварщик котьку юрттэт возьматозы. Куазь зорыса ке ӧз улы, кизёнэз вакчи дыр куспын йылпумъяломы, - шуэ валтӥсь агроном.
«Колхоз Восток» СПК-ын бусы ужъёс пыр-поч радъямын, котькуд ужась – аслаз интыяз.
* * *
Бурай ёросысь Алтау гуртын улӥсьёс но «Победа» ООО-лэн бусыосаз жадёнзэс валатэк ужало. Ӵукнаысен бер ӝытозь тракторъёслэн гуретэм куараоссы кылӥсько. Усыян ужъёсты дыраз быдэстон сярысь сюлмаськиллям Олег Гайдуллин но солэн пиез Андрей. Табере соос кизьыны потыны дасясько: куазь вошъяськыса улэмен, гурт котырысь бусыосы пырыны уг луы на.
Кизён дыръя котькуд нунал гинэ ӧвӧл, котькуд час но дуно луэ. Соин ик хозяйствоын кык сменаен ужало. Алтауысь Бадретдиновъёс та ӟырдыт уж борды семьяенызы басьтӥськиллям, шуыны луоз. Илюс Бадретдинов Алексей пиеныз «Кировец» тракторен кизён агрегатэн ужало: ог-огзэс соос сменалы быдэ вошъяло. Нош Дмитрий Бадретдинов бусые кидыс поттон сярысь сюлмаське. Вераны кулэ, Бадретдиновъёс хозяйство кылдэм дырысен – оскымон ужасьёс. Илюс Бадретдинов арлэн котькыӵе вакытаз но корт эшеныз уг люкиськылы. Кема ӧвӧл усто ӧнерчиез, 50 арес тырмемез улсын, хозяйство кузьымен пусйиз.Алексей толалтэ фермаын ужа, кормораздатчикен пудоослы сиён пырта, нош Дмитрий вылын – амбар котырысь ужъёс.
Мыло-кыдо ужасьёс пӧлын ик лыдъяське Роберт Шаймухаметов но. Та хозяйствоын со кема аръёс уг ке но ужа, ассэ тыршись ужасен возьматӥз. Али со Т-150 трактореныз культивация лэсьтэ, бусыосты кизьыны дася.
Ужын пӧртэм дыръёс пумисько, техника но тӥяське. Соку ини механизаторъёслы хозяйствоысь инженер-механик Сидор Шангараев юрттэ. Ас ужез понна кыл кутӥсь, тыршись ӧнерчиез котьку бусы ужасьёс дорысь пумиталод. Со ик ужасьёсты уждуразы нуон-ваён сярысь сюлмаське, нуназе но ӝыт бусы ужасьёслы сиён нуллэ. Жадёнэз валатэк ужасьёс луэмен, зарни пырыос дыраз музъеме пыро.
Миляуша БУЛАТОВА.
Оставить сообщение: