Ужрадлэн практической люкетэз Бадӟым Качакысь машинно-транспортной паркын, хозяйстволэн ю тысь возён складъёсаз радъяськиз. Агроконференцие вуэмъёслы - ёросысь СПК-осын, КФХ-осын кивалтӥсьёслы но отысь ӧнерчиослы – кизён ужъёслы дасям агрегатъёсты возьматӥзы. Вераны кулэ, бадӟым качакъёслэн вуж техниказы но вань, кыӵеосыз пумисько мукет хозяйствоосын, озьы ик соос выль техникаосынызы но данъяськыны быгато. Ужрадэ лыктэмъёс тужгес тунсыкъяськыса эскеризы кукуруза кизён сеялкаез но сое утялтон, удобрение пазян агрегатэз. Куинь ужъёсты – культивация, кизён но каткование – огӵош быдэсъясь «Джондир» кизён комплекс но палэнэ ӧз кыльы. Туэ качакъёс кизёнын соин пайдаяськозы, пичиесь бусыосазы гинэ мукет агрегатъёссэс поттозы.
Семинар-совещанилэн теорияя люкетэз гуртысь культура юртын ортчиз. Ужрадлэсь пленарной люкетсэ усьтыса, Калтасы ёрос администрациен кивалтӥсь Ю. М. Садыров хозяйствоосын кивалтӥсьёслы вазиськиз, соосты кизён ужъёслы дасяськонлы но соосты быдэстонлы бадӟым саклык висъяны куриз. Юрий Минзарипович пусйиз: туэ тулыс кема кыстӥськемен, кизён дыр туж вакчи луыны быгатоз, тужгес мускыт пытсан вакыт.
Туж пуштросо вал «Победа» ООО-ысь валтӥсь агрономлэн Азат Назмутдиновлэн веранэз. Опыто ӧнерчи севооборотлы бадӟым саклык висъян сярысь малпанзэ шараяз. Солэн кылъёсызъя, бусыослэн 25%-аз кӧжыё (бобовой) культураос – кӧжы, вика, рапс - киземын луыны кулэ. Озьы музъем азотэн узырмоз, азьланяз со бусыосы тысё культураосты кизьыса, узыр ю тысь басьтыны луоз. Со сяна, А. Назмутдинов кидыслы кукуруза кизёнэз лыдэ басьтыны ӵектӥз. Качакъёс понна та выль амал ӧвӧл, кылем арын татын кидыслы кукуруза будэтӥзы ни.
Ужрадэз йылпумъяса вераськиз Калтасы ёросысь гурт хозяйствоя управлениен кивалтӥсь А. К. Хамидуллин. Кизён кампаниез со быдэсак дасьлыкен пумитаны куриз.
Дасяз Миляуша БУЛАТОВА.
Оставить сообщение: