Семён Карповез тросэз тодо кылбурчи луэмезъя но. Со – Россиысь писательёслэн огазеяськонзылэн ёзчиез, дас вить книгаослэн авторзы. Пиналъёслы но, бадњымъёслы но гожъя. Башкортостанысь удмурт гуртъёсы но трос пол вуылћз. Алтау гуртын мон сярысь телепередача дасяз.
Семён Карпович телевидениын ужакуз мынэсьтым трос пол интервью басьтылћз. Туннэ мон аслыз юанъёсын вазиськоно кариськи.
– Семён Карпович, ку тон астэ писателен шќдћд?
– Нырысетћ книгае потэм бере (со вал 1986-тћ арын) осконэ кылдћз – писательёслэн радазы султыны быгато. Удмурт писательёсты умой тодћсько вал нимын, тросэныз пумиськылыны-вераськылыны кылдћз. Гожъясьёс пќлын улћ, шуыны луэ.
Кыкетћ книгае югыт дуннеез адњемез бере валай: мон – писатель. Ушъяськыса верам ќвќл со. Литературае кыстћськон Можга педучилищеысен кутскиз ни. Литературно-художественной кружоке ветлэме гожъяськон удысэз њечгес валаны юрттћз. Григорий Данилов писательлэсь верам кылъёссэ вунэтыны уг быгатћськы. Одћг пол со тазьы шуиз вал: «Писатель луон – со огшоры гожъяськон ќвќл. Со – вуоно улонэз, огшоры адямиосын, џошатыса, азьпала ог-кык вамышлы ке но адњыны быгатон».
– Начальной классъёсын дышетскыкум, чистописание урокъёсын мыным «витьёс» гинэ пуктылћзы. Кин чебер но чылкыт гожъяське, со писатель луэ – сыџе малпанэн соку улћ. Нош тон пичи дыръяд кин луыны малпаськод вал?
– Куинетћ-ньылетћ классъёсын дыръям арганчи луон сярысь малпаськылћ, витетћ классын – артист, кырњась сярысь. Нырысетћ кылбуре газетэ печатласькиз но, кылбурчи кариськеме потћз ни.
Педучилищеез йылпумъян азьын но йырам пќртэм малпанъёс бергазы: дышетсконме Ижевск пединститутлэн спортфаказ-а (спортэз яратћсько вал угось), Глазов пединститутлэн крезьгуръя ёзэтаз-а азьланьтоно? Училищеысь дышетћсьёсы пќлысь я сояз, я таяз џектћсьёс вал. Нош Григорий Данилов филологи факультетэ пырыны дэмлаз, гожъяськись, пе, луод. Солэсь мон кылзћськи.
– Озьыен, Семён Карпович, тынад вань малпанъёсыд быдэсмизы. Бобья-Уча школаын физрук луыса ужад, арганэн усто шудћськод. Крезьгурчи но луид, даслэсь уно кырњанъёс кылдытћд. Тон артист но: чебер кырњаськод, чагыр экран вылын астэ котьку быгатыса возьматылћд. Спортсмен кариськыса, пќртэм џошатсконъёсы пыриськылћд. Шахматэн усто шудћськод. Табере Полина внучкаед но шахмат школае ветлэ, тон солэн одћгез юрттћсез но тренерез…
– Тодам лыктэ художественной самодеятельносте пыриськеме. Пќртэм смотръёсы, фестивальёсы ветлћм. Одћг пол мыным Всероссийской смотре – Перме мыныны шуд усиз, ява. «Поръялоз, поръялоз» кырњанэз быдэстћ. Тодмо кырњась Николай Зубков мынам кивалтћсе вал. Сцена вылысен баянист витёнтэм шорысь кырњанэз љыны тонлы вылће карыса шудыны кутскиз. Ќнерчиос валало, мар со сыџе кырњась понна. Шуак луэмме ќй возьматы, кырњанэз быдэстћ. Валамон ни, баянистлы Николай Зубковлэсь соку сюриз. Мыным кыкетћ инты сётћзы. Мон понна со бадњым вормон вал.
Нош ик Можга педучилище сярысь веранме азьланьтэме потэ. Отын мон спорт секциосы но, кружокъёсы но ветлыны, эктыны-кырњаны но вутскылћ. Ваньмыз со мыным, џош дышетскем эшъёсылы сямен ик, улонам туж юрттћз. Котькытчы вутскыны, котькуд ужез рос-прос быдэстыны тыршон – њеч сям. Педучилище юрттэмен ик вань малпанъёсы быдэсмизы, шуыны луэ.
Ачид тодћськод, уж дурын кылбур гожъяса уд пукы. Љытъёсы, шутэтскон нуналъёсы басьтћськиськод йылпумъямтэ чуръёсме сэрттон-пертчон борды, выльёсызлы но югыт сюрес сётћсько вал. Та вакытэ мон эрико художник. Уж дуре дыртоно ќвќл. Нош дыр озьы ик уг тырмы: я отчы, я татчы ветлоно, внучкаосын выроно, Тыло гуртысь бакчаям ужано…Губияны мыныкум но сьќрам блокнот кутћсько. Чебер чуръёс нюлэскын но кылдыны быгатозы угось.
– Нылпиослы-а, бадњымъёслы-а гожъяны секытгес?
– Мон телевидениын нылпиос но бадњымъёс понна нимаз возьматонъёс дасялляй. Отчы кылбуръёсты но пыртылыны тырши. Џемысь аслым выль чуръёс кылдытъяно луиз. Мќйыослы но пичиослы гожъямъёсы артэ мынћзы. Соосты мон ог-огзылэсь ќй висъясал. Зэм, покчиослы валамон, капчи лыдњымон карыса гожъяно. Писателен малпам суредэз соос син азязы яркыт мед пуктозы.
– Гожтэм книгаосыд пќлысь кудћз аслыд матынгес но дуногес потэ?
– Нырысетћ книга котьку дуно. Солэн сюресэз шонер быръемын ке, мукет книгаос но отћ капчигес мыно.
Бадњымъёслы поттэмъёсыз пќлысь «Малпанъёс» бичетэ аслым дуногес потэ. Ачид шоры мукет синмын учкон – книгаелэн одћгез валтћсь малпанэз.
– Лыдњисьёсын пумиськонъёсы писательёс та вакытэ, Совето Союз дырен џошатыса, шергес потало. Оло, сыџе пумиськонъёс кулэ ќвќл ни? Асьмеос мукет вакытэ улћськом ни ук.
– Писательлэн улэп кылыз котькыџе вакытэ кулэ. Писательёсын пумиськонъёс тросэз адямиос понна вунонтэм кылё. Соос куддыр пиналъёслэсь малпанзэс но вошто, улон сюрес бырйыны но юртто. Нылпиослэн синъёсазы учкыса валаськод аслэсьтыд кулэлыктэ. Лыдњисьёсын артэ вамышъямдэ но шќдћськод. Ог-огдэ валан вордћське. Пумиськонъёс уродзэ вормыны кужым сёто.
– «Уг поты жадеме». Озьы нимаськоз выль бичетэд. Нимыз вера: тон жадьытэк ужаськод. Кылбурчи пенсие уг поты угось. Мылкыдыд уг пересьмы. Вакчияк гинэ вера книгаед сярысь.
– Выль книгае бадњымъёслы шуыса дасямын. Бичетам берло аръёсы гожтэм выль кылбуръёсме пыртћ. Отын – туала улон шоры выль синмын учкон, учыръёс пыр адямиосты валаны тыршон, яратон но гажан. Книгаям частушкаосме (такмакъёсме) но пыртћ. Њуч кылысь удмуртэ берыктэм чуръёсы но вань.
– Шур кузя пыжен арлы быдэ сямен уяськод. Нош чорыганы уд яратћськы.
– Мон Карплэн пиез ук. (Пальпотэ). Кызьы мон аслэсьтым џыжы-выжыосме кутылом?
Чебер чуръёсты «кутылон» – мынам яратоно уже.
* * *
Семён Карповлэн кылбуръёсыз сярысь трос гожъямын ќвќл. Солэн ужъёсаз малпаськон, сюлмаськон, вќсь, шумпотон, пальпотон пќлэстћськыса кадь артэ уло. Кылбурчи, вакытлэсь пќртэмлыксэ сюлэм пыртћз поттыса, чуръёсаз сое пыџатэ. «Вакытъёслэн тубатъёссы кузя» кылбураз со пусъе:
Кызьы меда, кызьы мон вамышъяй
Вакытъёслэн тубатъёссы кузя?
Мар лэсьтылћ, кытын янгышалляй –
Юанъёсы весь тэбинё, лэся.
Берло дыре котькуд учыръёсы
Вань нодлыке юмша кадь соосын.
Кыџе веран вань, мар выльзэ усьто,
Аслым ачим ке но шонер-а валэкто?
Автор котырысьтыз чеберез адњыны быгатэ, сое дунъяны тырше, Њечезлы но со оске. Озьы кылбурчи лыдњисьёсызлы но џуказе нуналлэсь оскон ќсъёссэ усьтыны сюлмаське. Умоезлы оскытэк та дунне вылын улыны туж секыт угось. Со вакытэ ик кылбурчилэн кин ке дышетэмъя улэмез уг поты:
Шурдыт, куке тонэ ялан
Кин ке но дышетэ.
Њабыль! каре ас тодэмъяз,
Сизьдэ йырсазь гердэз…
Котьмар медло, ас тодэмъям
Мынам улэме потэ.
«Эн жадь, лулы», – аслыз ачиз вазиське кадь автор.
Эн, эн жадьы, лулы,
Вќлмытак сюрессэ азинлык
Мед на, мед ай усьтоз асьмелы,
Эн, эн жадьы, лулы.
Ульфат Бадретдинов.
Оставить сообщение: