- Валерий Михайлович, улон тубатэныды вакчияк тодматэ вал.
- Улон тубатэлэн кутсконэз - выжыез-дӥньыз улэ-вылэ жильыртыса бызись Киндэклы шур дурысь пичигес гинэ Нуркан гуртын. Ӵапак татын 1956-тӥ арын 5-тӥ мартэ мон вордӥськи та югыт дунне вылэ. Отын ортчиз зарни пинал дыры. Гуртамы школамы ньыль классъем гинэ вал, соин ик дасэтӥ классозь дышетсконме азьланьтӥ бускель Пештэрек (Барабановка) гуртын. Школаез йылпумъяме бере ик монэ Янаулын потӥсь «Заря коммунизма» газетлэн редакцияз ужаны кутӥзы вал. Но отын, гужемзэ сяна, ужаны ӧз кылды, монэ аслам школаям ӧтизы, куатетӥ классын удмурт но ӟуч кылъёсъя урокъёсты нуыны. Одӥг ар дышетэме бере монэ армие басьтӥзы. Отысь берытскыса куать ар Янаулысь газетлэн редакцияз ужай. Кин тодэ, мон али но, оло, отын ик ужасал на, витьымтэ шорысь 1983-тӥ арын мыным Дэбесэ ӧтён ӧй ке вуысал. Та ёросын потӥсь «Выль сюрес» газетлэн редакторез, качак музъемысь пиосмурт Илья Байметов монэ аслыз кивоштӥсе ӧтиз.
- Кӧня ар «Байгурезь» газетын ужады, кивалтӥды?
- «Байгурезь» газет потыны кутскиз 1991-тӥ арын январь толэзе. Сое быдэсак мон ачим кылдытӥ. Нимзэ но, концепцизэ но, шуом, ачим ик малпай. Тазьы лыдъяй: туала вакытэ, куке котькудӥз ик вала ни ӟуч сямен, малы кулэ на дубляж амалэн газет поттон?! Выль газетлэн тиражез нырысетӥ араз ик 1000-лэсь трос луиз. Собере ини милесьтым, дэбесъёслэсь, адӟем каризы Удмуртиысь мукет ёрос газетъёсын ужась эшъёсмы но. Озьы, 25 ар ӵоже, пенсие потытозям ик, мон «Байгурезьлэн» редакторез луыса ужай. Шумпотӥсько, та газет пыр Удмурт шаерысь гинэ ӧвӧл, солэн палэнысьтыз но аслым трос ӟеч эшъёс шедьтӥ шуыса.
- Кыӵе яркыт тодэ ваёнды герӟаськемын «Байгурезь» газетэн?
- Ма, соос вераса быдтонтэм! Соин ик мынам туж бадӟым мылкыды вань «Байгурезь» газет сярысь 25 люкетъем бадӟым книга поттыны. Отчы мон яркытэсь тодэ ваёнъёсме сяна, валамон ни, пыртысал газет бамъёсын потэм тужгес но устооссэ ужъёсты: аслэсьтымъёссэ но, лыдӟисьёслэсь но. Берло аръёсы троссэ соосты мон поттай ни: «Газетмылэн зарни шыкысысьтыз» рубрика улын.
- Туэ улон ӧрды чутрак воштӥськиз: газетысь культурае выжиды. Таӵе малпанды кемалась-а вал?
- Улон ӧре чутрак воштӥськиз шуыны луэ бен меда? Культура удысэн мон пыраклы люкиськонтэм герӟаськемын ни ук! Одӥг ужрадэз но уг кельтӥськы, ваньмаз ветлӥсько но, пыриськисько но. Сцена вылысь но ӧй ик васькалля кадь. Со сяна, «Байгурезь» газетлэн но направлениез сыӵе ик вал ук: культурно-просветительской. Бен, табере мон ужасько «Сибир сюрес» культурая но туризмъя центрын, кырӟанъя «Шудбур» ансамблэсь концертъёссэ нуись луыса.
- Тӥ туспуктэмъёсыныды котькинэ паймытӥськоды? Та тунсыкъяськонды борды ку басьтӥськиды? Оло кинлэсь ке адӟем кариды?
- Туспуктэмъёсын тунсыкъяськонэ туж пичиысен кутскиз. Огшоры учыр бордысен. Одӥг пол егит фотограф монэ туж ӝожомытӥз. Куке одӥг урамысь пичи эшъёсы атайёсынызы патретэ усьыны султӥзы, соосын артэ мон но султӥ вал. Но фотограф монэ соос пӧлысь палэнтӥз. Мынам уго атае ӧй вал. Соку мон аслым ачим шуи: будӥ ке, одно ик фотоаппарат басьто, вань мылкыд карисьёсты патретэ уськытъяло, нокинэ но уг ӝожомыты. Куке «Дась лу!» газетэн ялэм «Гужем нуналъёс» конкурсаз «Мон пичи мушкась» веросэным вормисе потӥ но монэ со понна «Смена-8М» фотоаппаратэн данъязы, мон вераны луонтэм шумпотэмын вал. Со дырысен фотоаппаратэн мон ноку но ӧй люкиськылы ни. Вылӥын верам учыр сярысь мон рос-прос мади вал «Кизили» журналлэн туэ потэм 3-тӥ номераз, «Бус пыр ворекъясь пичи дыры» гожтэмам-статьяям.
- Кема ӧвӧл тодӥ, Тӥ усто кырӟаськоды. Оло нош кыӵе ке, шуом, шараямтэ таланъёсты вань на?
- Ас поннам мон котьку но, котькытын но кырӟалляй. Пичи дырысеным ик. Ӵужае, аслэсьтыз секыт улон-вылонзэ малпаса, кырӟа-кырӟа но бӧрдэ вал. Собере мон но бӧрдӥсько. «Нош тон, пие, малы бӧрдӥськод?» - шуэ ке, «Ма, ачид бӧрдӥськод но...», - валэктӥсько вал мон. Бен, табере, выль уже выжыса, мон сцена вылысен но кырӟаны ӧдъяй. Огнам уг на, кырӟасько одно ик кинэн ке но. Башкир музъеме вуылыкумы кырӟай Евгений Соловьёвен. Али кырӟасько Алексей Тронинэн. Соин ми пыриськиськомы Дэбес ёросын ортчись «Кык кизилиос» конкурсэ. Та ӵошатсконлэн кык турез вал ни. Куинетӥез ортчоз 20-тӥ мае. Нош 12-тӥ июне кырӟаломы Гала-концертын. Кыкетӥ тураз озьы ик быдэстӥмы Лилиана Нуриахметовалэн репертуарысьтыз «Берто али вордскем гуртам» кырӟанзэ. Мыным со туж но туж яра! Шараямтэ талантъёсы шуиськод? Мынам туж кемаласен потэ ни вал Дэбесамы удмурт драмстудия усьтэме. Сӥзьыл малпасько та уж борды басьтӥськыны. Туж потэ ни спектакльёсын но шудэме.
- Пичи дырысь тужгес бадӟым малпанды. Быдэсмиз-а со?
- Пичи дырысь бадӟым малпанэ одӥг гинэ вал: удмурт газетын ужан. Кызьы адӟиськоды, быдэсмиз со малпанэ. Вакытаз - кылем даурысь укмыстонэтӥ аръёсы - монэ ужаны туж ӧтё вал Иже, Удмурт радиое но, телевидение но. Но мон ӧй мыны, сокугес гинэ тэтэ карись «Байгурезь» газетме куштэме ӧз поты.
- Улон девизды.
- Анаелэн туж трос кырӟанъёсыз пӧлысь малы ке но пель сьӧрам ялан кылӥське одӥгез: «Аткай мыным ӟеч вал сётӥз. Кытчы ке но мынӥд мын шуиз. Кытчы ке но мынӥд мын шуиз но, ӟеч калыклы ярась лу шуиз!» Кырӟанысь тани ӵапак та кылъёс ик - «Ӟеч калыклы ярась лу!» - мынам улон девизэ луизы кадь.
- Дырез берен берыктыны луысал ке, улон сюрестэс воштысалды-а?
- Ӧй, ӧй воштысал. Малы ке шуоно со выль улон сюресам мынам мукет янгышъёсы луысалзы ук! Мыным яра таиз но ортчем улон сюресэ. Одӥг уже понна но возьыт ӧвӧл. Собере, мон аслэсьтым улонме син азям ик пуктыны уг быгатӥськы яратоно адямиосытэк - Эля кузпалэтэк, Арина нылытэк, Руслан пиетэк, Тимур внукетэк. Муг усиз бере, одӥг-кык кылын ке но верало ни соос сярысь но. Кузпалы вань улонзэ Дэбесысь школаын тырше, Россиысь дышетон удысысь отличник луэ. Пие «Мынам Удмуртие» телекомпаниын ужа; Россиысь тележурналистъёслэн конкурсазы вормыса но со понна 170 сюрс манет Грант басьтыса, Москваын Познерлэн школаяз дышетскиз. Нылы кыкетӥ арзэ ни Санкт-Петербургысь гимназиын информатикая урокъёсты нуэ, отын кылдытэм «Удмурт Кенеш» огазеяськонлэн ужъёсаз мыло-кыдо пыриське.
- Выль Татышлыын ортчем концертын Тӥледыз шудмурт шуыса пусйизы. Та кыллэн кылдэм историез вань, дыр?
- Нырысь ик, мон асме туж шудо адямиен лыдъясько. Куатьтон арес тырмонэным герӟаськем юбилей ӝытме но «Мон шудо Валера» шуыса нимай. Нош трос аръёс талэсь азьвыл - ӵапак Башкириысь бертыкум вал со! - шуд сярысь малпаськыны кутски но, йырам малпан чилектӥз: «Счастье - пока ты в пути!». Шуд сярысь та формулае яраз монэным ӵош «Новый путь» газетын ужась эшъёсылы но. Та кылъёсын гожтэм футболкаосты нуллэм сяна, газетчиос троссэ проектъёссэс но соосын ик герӟало. Собере, мон дышемын та улон шоры пиналлэн синмыныз учкыны, улонэз шудонэн ӵошатыны. Малы пиналъёс сокем шудоесь? Малы ке шуоно соос шудыса будо. Озьыен: «Кин шудэ - со шудо!». «Байгурезь» газетын трос аръёс ӵоже улӥз таӵе нимын рубрика но. Табере тани, «Шудбур» ансамбльын ужаны кутскыса, мон концерт программаез но та темаен ик герӟай: «Улон - шудон. Шуд чебер!» (Жизнь - игра. Играй красиво!). Шудмурт - озьыен, со шудӥсь мурт но, шудо мурт но, удмурт выжыысь луись адями но.
- Улон сюрес кузя оген вамышъяны уг луы. Кинъёслы Тӥ тау кылъёстэс верасалды?
- Эше, та юанэд туж капчи но, со дыре ик туж секыт но. Капчи соин: мон дугдылытэк вераны быгатысал оло сю, оло нош сюрс но адямиослэсь нимъёссэс, кудъёсызлы мон тау кылъёсме верасал. Шуом, Григорий Фаршатовлы. Со школаямы ӧй ке вуысал, мон, оло, гожъяськон борды ӧй но кыстӥськысал. Озьы ик Андрей Гильмаевлы, Менсадык Гариповлы, кудъёсыныз мон туж пичиысен эшъяськи. Секыт соин: соослэсь нимъёссэс веран понна гинэ трос инты кулэ луысал. Соин ик ойдо та юанэдлы валэктонме кельтомы мынам вуоно книгаелы.
- Азьпал улондэс кыӵеен син азяды пуктӥськоды?
- Тодӥськод-а, Миляуша, кема ӧвӧл мон таӵе чебер вӧт адӟи. Но со сярысь мон нокинлы но ӧй на мадьы, тон нырысьсэ кылӥськод со сярысь.
- Табере газетэз лыдӟисьёс но со вӧтты сярысь тодозы ни…
- Вӧтэ таӵе: мон Тимур внукелэн сюаназ шулдыръяськисько! Юг-юг заллэн шораз ик ми - Тимур, солэн кышноез но мон - куиньнамы кутӥськыса бергаса-тыпыртыса эктӥськомы, нош куноосмы киоссэс жалятэк чабо милемлы. Тӥни озьы! Мед зэмалоз вылэм вӧтэ, мед кылдоз на вылэм Тимурелэн сюаназ шулдыръяськыны! Нош тодӥськод-а, кӧня арес мынам внукелы?
- ?
- Солы туэ 25-тӥ мае ваньзэ-ӧвӧлзэ 5 арес гинэ тырмоз ай!
- Бадӟым тау, Валерий Михайлович, юанъёсылы верамды понна. Выль вормонъёс Тӥледлы. Вань малпанъёсты, чебер вӧтты одно ик мед быдэсмозы.
- Асьтэлы тау.
Вераськиз Миляуша БУЛАТОВА.
Оставить сообщение: