icon_gotop
18+
autorisation
Войти | Регистрация
Время в Татышле
03:26
Пятница, 29 Марта
Рекламный баннер 990x90px top

«Ми – кужмо республика»

09:17 27.07.2017

 

Р. ЗАРАФУТДИНОВ: Гужемлэн шорыз – ӝыны ар ӵоже быдэсъям ужъёслы йылпумъянъёс лэсьтон дыр. Статистикалэн огъя лыдпусъёсыз тодмо. Ми, журналистъёс, статистикалэн лыдпусъёсыныз лачмыт, туж эскериськыса пайдаяськиськом ке но, республикамылэсь улонзэ, солэсь азинскемзэ но калыклэсь кызьы улэмзэ лыдпусъёс возьмато. Тӥ кыӵе ужъёслы вылӥ дунъет сётысалды, нош кыӵеосыз бордын ужано луоз на?

Р. ХАМИТОВ: Ӝыны арлы статистика вань. Пусъеме потэ, мон но нырысь лыдпусъёс шоры уг учкиськы, лыдэ басьтӥсько калыклэсь кызьы улэмзэ. Лыдпусъёслы но саклык висъятэк уг луы.

Лыдпусъёсты эскероно ке, куать толэзь куспын республика оскымон ужам, экономикая лыдпусъёс будэмын. Промышленной производстволэн индексэз 103,4 %-лы ӵоша. Со сяна, налоговой доходъёс вань. Гурт удыс но, ар секыт ке но сётӥське, азинске: нырысетӥ паларез аграриосмы плюсэн йылпумъязы. Ӝутӥськонын но лыдпусъёс шумпотто. Зэм, улон юртъёс ӝутон азьло аръёсын ӵошатон дыръя кулэсмемын, нош промышленной объектъёс, агрообъектъёс ӝутӥсько. Оптовой но розничной вузкаронын но лыдпусъёс ӟеч возисько. Макроэкономической лыдпусъёс уродэсь ӧвӧл. Но шуг-секытъёс но вань. Нырысь ик – демография. Нырысетӥ паларын республикаын нылпиос 12%-лы ӧжыт вордӥськиллям. Одӥгез шумпоттэ – кулӥсьёслэн лыдзы кулэсмемын.

А. САЛИХОВ: Рустэм Закиевич, Тӥ кылпум поттӥды гурт удыс сярысь. Куазь зорыса улэмен, уж азьло кадь уг азинскы. Та пумысен пӧртэм малпанъёс кылдэмын. Дунъёс будозы шуисьёс но вань. Потребительской рынокын воштӥськонъёс луизы ке, республикаын улӥсь калык вормонтэм шуг-секытъёсын уз пумиськы-а?

Р. ХАМИТОВ: Берло аръёсы куазь зорытэк улэмен секытлыкъёсын пумиськоно ке луим, туэ зоръёс гурт удыслы трос шуг-секытъёс ваё. Дас куинь ёросъёсын чрезвычайной ситуация ялэмын. Музъем мултэс кот, бусыосын будосъёс быремын. Валаськом, со ёросъёсын номыр карыны уг луы ни. Со дыре ик тодӥськом, республикалэн бусыосаз 3 млн тонналы матэ ю тысь будэ. Сое октыны быгатомы шуыса оскиськом. Пудо сиён но кулэ. Шундыё нуналъёс ӧжыт луэмен, сенаж, силос трос дасяськом. Турын дасян секытэн сётӥське. Берло аръёсы ми валамы, шуг-секытъёс кылдыку милемлы юртто, шуом, страховой культураос – толйись ӟег но толйись чабей. Соос 400 сюрс гектаре киземын. Туэлы ужпум - 600 сюрс гектаре кизьыны. Огкылын вераса, гудырикошкон толэзе куинь бадӟым ужпумъёс пуктэмын: нырысетӥез - пудо сиён дасянэз азинтоно, кыкетӥез - толйись культураосты кизён кампанилы дасяськоно, куинетӥез – ю тысь октон борды кужмысь басьтӥськоно. Продовольственной безопасностен герӟаськем шуг-секытъёс республикаын уз луэ. Няньмы но, йӧлмы но, сӥльмы но луоз.

Р. ЗАРАФУТДИНОВ: Улонын валтӥсь инты басьто семья, тазалык. Озьы ик тунсыкъяськонъёс но. Малпасько, республикаын улӥсьёс пӧлысь тросэз спортэз азинтонэн герӟаськем ужпумъёсты сэрттон-пертчонлы бадӟым саклык висъяло.

Р. ХАМИТОВ: Семья сярысь верано ке, мынам олокӧня пол пусйылэме вань – асьмелы Семьяя министерство кулэ. Матысь дыре одӥгаз министерство бордын нимысьтыз ведомство кылдоз, кудӥз семья кусыпъёс бордын ужалоз. Али программа кылдытон бордын ужаськом. «Путь к счастливой жизни начинается в семье» тезисэз улонэ пыӵатоно. Та уж капчиен уз сётӥськы. Ужез кутскомы секытлыкъёсын пумиськемъёслы юрттон бодысен.

Спорт сярысь. Спортэз азинтонлы коньдон висъяськоз. Финансированиез кулэсмытон сярысь малпан но ӧвӧл. Ми – кужмо республика. Кин, Башкортостан сяна, сыӵе кужмоесь клубъёс возе? Корпорациос гинэ. Нош Россия Федерациысь субъектъёсты басьтоно ке, киысь чиньыосын лыдъямон гинэ соос, кинъёс огдыре футбольной, хоккейной, волейбольной, гандбольной командаосты утё, кудъёсыз высшей лигаын шудо. Сыӵе субъектъёс туж ӧжыт – куинь-ньыль, дыр, солэсь трос ӧвӧл. Соин ик ми, кужмо республика луэмен, азьланяз но спортэз азинтонэ трос кужыммес пономы, Со калыклы кулэ угось.

Вакчиятыса дасямын glavarb.ru сайтъя.  

Быдэсак интервьюен тодматскыны быгатоды сайтъя: http://glavarb.ru/rus/press_serv/intervyu_news/68946.html

5867

Оставить сообщение: