Мукет городъёсын, гуртъёсын выллем, Улысь Балтач гурт поселениын но вань сыӵе адямиос, кудъёсыз шахматтэк улыны уг быгато. Сыӵеос пӧлысь тужгес кужмоесь но гажамонэсь вал Борис Шакирович Шакиров но Виктор Шагиевич Шайдуллин. Жаляса верано, улонысь соос вазь кошкизы. Но соослэн шахматэн шудонэз азинтонэ, вӧлмытонэ понэм кужымзы туннэ нуналэ но улэ.
1996-тӥ арын «Социализм» колхозэн кивалтӥсь Ханиф Баймиев колхозлэн Кубокезлы шахматъя турнир радъян сярысь положение кутӥз. Со Татышлы ёросысь шахматъя чемпионъёсты В. Ш. Шайдуллинэз но Б. Ш. Шакировез буре ваёнлы сӥземын вал. Со дырысен ужрад арлы быдэ Улысь Балтачын радъяське.
Туэ дано шахматистъёсты буре ваён ужрадэ укмыс командаос вуизы. Бадӟымъёсын ӵош 17 нылпиос нюръяськизы.
Турнир кема кыстӥськиз. Кубоклы кузё луиз Нефтекамскысь вуэм команда. Агидельысь вуэм команда кыкетӥ инты утӥз. Куинетӥ интыын Вылысь Татышлыысь команда. Ужрадэ пыриськемъёсты котькудзэс синпель кузьымъёсын пусйизы, Нылпиосты-вормисьёсты грамотаосын данъязы. Личной зачётын вормисе потэм пиосмуртъёсты но нылкышноосты грамотаосын но медальёсын пусйизы. Шудӥсьёсты дунтэк сюдӥзы. Турнире вуэмъёс ужрад пумысен ӟеч малпанъёссэс шараязы, сое радъясьёслы тау кылъёссэс веразы.
Зэм, шахмат – со «мудрецъёслэн шудонзы» шуыса юнме верамын ӧвӧл. Та турнире гажано адямиос вуэмын вал: Фарит Валинурович Ахатов, Фангат Ахметович Кашапов, Галимьян Шагиевич Шайдуллин, Дамир Хузиевич Ахметов но мукетъёс. Оскиськом, азьпалан турнире пыриськыны мылкыд карисьёслэн лыдзы будоз, ужрадэ ёросысь котькуд гурт поселениысь шахматэн шудӥсьёс вуозы.
Кызьы тодмо, та выллем ужрадъёсты оген радъяны уг луы. Турнирез ортчытон сярысь сюлмаськизы Сергей Сафиуллин, Владимир Шайдуллин, «Рассвет» СПК-ен кивалтӥсь Альберт Минлебаев, Улысь Балтач гурт поселенилэн администрациеныз кивалтӥсь Эдуард Рахимзянов, Валерий Афризонов, Радмир Губаев. Улысь Балтач школалэн директорезлэн Людвиг Зидымаковлэн кивалтэмез улсын, школалэн коллективез но бадӟым юрттэт возьматӥз.
Гуля РАХИМЗЯНОВА.
Татышлы ёрос.
Оставить сообщение: