icon_gotop
18+
autorisation
Войти | Регистрация
Время в Татышле
13:05
Пятница, 29 Марта
Рекламный баннер 990x90px top

Дано нимыз калык пӧлын утиське

10:14 24.03.2016

2000-тӥ ар, толшор толэзь. Татышлы ёросысь Кызыл-Яр гуртэ кышкыт ивор вуиз: Чечняын бырыны шедиз Сергей Самиев. Со дырысен дас куать пол ни вуиз толэд, сое трос пол ни воштылӥз тулысэд, со бӧрсьы вуизы шулдыр гужем, зарни сӥзьыл. Озьы ке но анай уг вунэты, туннэ кадь тодэ кышкыт ивор вуэм нуналэз. Анай сюлмын - ноку бурмисьтэм яра. Куддыръя солэн йыраз малпан кылдэ: ваньмыз та уйвӧт гинэ. Со дыре ик валатске, Чечняын тынад пиеныд но солэн эшъёсыныз луэм учыр – со кышкыт зэмлык. «Кӧня егит пиос быризы Чечен ожын?! Мар сюлэмо адямиос ыстӥзы меда соосты вирен пожаськем музъем вылэ ожмаськыны? Висиз меда со дыре соослэн сюлэмъёссы улыны но вуытэк бырыны шедем солдатъёс понна?» - малпаське анаймурт. Дырын-дырын пиезлэсь берпуметӥ гожтэтсэ лыдӟе.

«Ӟечбуресь яратоно песяй, атай, анай, матысь туганъёс, кӧрышъёс, - гожтэ солдат. – Саламен тӥ доры дыртэ Чечняысь пиды Сергей. Кызьы улӥськоды-вылӥськоды? Уд-а висьылӥ-ське? Ужаськоды-а? Уждун тыро-а?

Пичияк ас сярысьтым гожто. Ми али Шелковской станция вӧзын улӥськом, куинетӥ арнязэ ини. Солэсь азьло Гудермес городэз басьтӥм, Терек шур дурын сылӥм. Картаез учкиды ке, сое шедьтыны луэ. Али сылон интымы но Гудермеслэсь кыдёкын ӧвӧл. Милям асьмелэн блиндажмы вань. Татын шуныт, югыт. Гурын каллен гинэ пу ӝуа. Музыка шудэ…

Матысьёсы, табере мон валай ини, кин со солдат. Со – кужмо, таза, ужез яратӥсь пияш. Тани командирмы дораз отпуске бертыны дасяське. Со сьӧры гожтэт келясько. Со – контрактник, афган оже но пыриськем. Соин милемлы капчи, командирмы ваньзэ тодэ, ваньзэ валэктэ. Милемыз улыны дышетэ. Милям фотоаппаратмы но вань. Тани командир фотоос лэсьтӥз ке, мон сое тӥледлы лэзё. Каспийской море дурын, Дагестанысь гурезьёсын трос фотое усьылӥм.

Милемыз, оло, телевизорысь но адӟиды ни, дыр. Чабанмахиын, Карамахиын телевидениысь журналистъёс вуылӥзы вал. Но ымныръёсмес возьматэммы ӧз поты. Сиён сярысь ке верано, эн кайгыре, сиён тырмыт сёто, кӧтмы тыр. Али боевой действиос дугдӥзы. Куинь толэзь секытгес вал. Самой кышкытсэ ортчим ни. Шумпотыса ивортӥсько тӥледлы, танкистъёс пӧлысь нокин но бырыны ӧз шедьы. Тӥ эн кайгыре мон понна, асьтэдыз утелэ, эн висе. Может милемыз кематэк татысь поттозы ни. Дивизиез поттон сярысь приказ, пе, гожтэмын, шуо.

Гожтэт гожтыны вакыт вань, лэзьыны гинэ сое туж секыт. Мынам личной номере вань: ВС СССР «ф-045134». Сое кытчы ке гожтыса кельтэ, эн ыштэлэ, яке тодады возе…»

Анаймуртлэсь бамзэ ӵушкаса вияло курыт синвуос. Пиезлэсь тусбуйзэ тодаз возён сяна, солы мар кыле на? Кулэмъёсты уг луы берыктыны.

Буре ваён ӵошатскон

Школаын дышетскыкуз Сергей спортэн эшъяськиз. Нош нырысетӥ интые пуктылӥз куасэн бызьылонэз. Ёрос ӵошатсконъёсы вуылыку, трос пол кылылэме вань, «кужмо соперникмы – Сергей – татын, иське, нырысетӥ интые потыны уз кылды» шуэмзэс.

Шаерез утёнын бырыны шедем солдатлэн нимыз калык пӧлын улэ. Бадӟымъёс сюлмасько: сыӵе геройёсты пиналъёс но мед тодозы шуыса. Арлы быдэ Кызыл-Ярын солдатэз, кужмо куасчиез буре ваён ӵошатсконъёс радъясько. Туэ биатлонэ ёросысь тямыс командаос вуизы.

Ужрадэ Сергейлэсь анай-атайзэ Лидия но Вениамин Самиевъёсты вазизы. Озьы ик чечен ожын бырыны шедем Балтач ёросысь Асавкаысь Эдуардлэсь анай-атайзэ Райда но Рафкат Миниахметовъёсты ӧтизы. Ужрадэз усьтыса вераськизы Улысь Балтач гурт поселенилэн администрациеныз кивалтӥсь Эдуард Рахимзянов, республикаысь удмуртъёслэн НКЦ-енызы кивалтӥсь, «Ошмес» газетлэн редакторез Салимьян Гарифуллин, ёросысь егитъёсын ужанъя но спортъя ёзэтэн кивалтӥсьлэсь ужзэ быдэсъясь Эльза Валиева, ДОСААФ-лэн ёросысь ёзэтэныз кивалтӥсь Марс Самигулов, Кызыл-Яр школалэн кивалтӥсез Иван Гайнияров.

Пиналъёс лыжняе дыртӥзы. Ыбылӥськонын но, куас сюрес вылын но соос устолыксэс возьматӥзы. Основной школаос пӧлын вормисе потӥз Вязовка школалэн командаез (дышетӥсьсы Р. Нуриахметов). Кыкетӥ интыын луиз Кызыл-Яр школа (дышетӥсьсы Ю. Губаев), куинетӥ – Улысь Балтач школаысь команда (дышетӥсьсы Р. Губаев). Выль Татышлы школаысь пиналъёс ньылетӥ интыен буйгатсконо луизы (дышетӥсьсы М. Шаритдинов).

Бадӟым классъёс пӧлын кужмо луизы улысь балтачъёс, кыкетӥ интые потӥзы выль татышлыос, куинетӥ интыын – кальтяевоос (дышетӥсьсы Я. Бадамшин). Вылысь Татышлыысь кыкетӥ номеро школаысь команда ньылетӥ инты утӥз (дышетӥсьсы Р. Закиров). Нырысетӥ инты утэм командаосты кубокъёсын но грамотаосын данъязы. Ужрадэ пыриськем пиналъёсты котькудзэс синпель кузьымъёсын пусйизы. Ӵошатсконэз радъяны коньдонэн юрттӥзы ужбергатӥсь Р. Зарифьянов, Россиысь ДОСААФ-лэн ёросысь ёзэтэз но Ивановкаысь Е. Самиев.

Миляуша БУЛАТОВА.

4831

Оставить сообщение: