Туэ куас сюрес вылын кужымзэс мертазы Янаул, Татышлы ёросъёсысь школаосын дышетскисьёс, Янаулысь пӧртэм организациосын ужасьёс. Ужрадэ вуэмъёсты шунды но мыняса пумитаз. Куасчиослы куазен удалтӥз. Ӵошатскон школалэн администрациезлэн но Сандугач гурт поселенилэн администрациеныз кивалтӥсьлэн Т. Ш. Куснияровлэн кичӧлтэмзыя ортчиз. Вормисьёсты пӧртэм категориосъя пусйизы.
5-6-тӥ классъёсын дышетскисьёс: нылъёс пӧлын нырысетӥ интыын луиз Регина Нуриахметова (Татышлы ёросысь Вязовка гурт), кыкетӥ интыын - Альбина Шаманаева (Янаул ёросысь Ямады гурт), куинетӥ интыын – Арина Садиева (Янаул ёросысь Шудек гурт). Пиос пӧлын финише котькинлэсь ӝог вуиз Кирилл Минтимиров (Ямады ), кыкетӥ но куинетӥ интыосын луизы Глеб Биктимиров (Вязовка) но Никита Байдуллин (Ямады).
7-8-тӥ классъёсын дышетскисьёс: нылъёс пӧлын нырысетӥ инты утӥз Элина Зайдуллина (Ямады), кыкетӥ интылы кузё луиз Ильвина Шайдуллина (Шудек), куинетӥ интылы – Карина Хуснутдинова (Сандугач). Пиос пӧлын ӝоглыкеныз висъяськиз Илья Хабибуллин (Шудек), кыкетӥ интыын луиз Альберт Валинуров (Сандугач), куинетӥ – Динар Гарипов (Янаул ёросысь Максим гурт).
9-11-тӥ классъёсын дышетскисьёс: нылъёс пӧлын финише нырысетӥ пыриз Гульдания Калимуллина (Ямады), солэсь берегес кыльыса вуиз Вера Васиуллина (Сандугач), куинетӥ пыриз Эльвина Нургалиева (Янаул ёросысь Истяк гурт). Пиос пӧлын нырысетӥ но кыкетӥ интыосты утӥзы ямадыос - Артур Иванов но Антон Минтимиров, куинетӥ интыын – Никита Адиев (Сандугач).
Пиосмуртъёс пӧлын (18-29 арес) вормисе потӥз Эрнст Мардамшин (Сандугач), кыкетӥ интылы кузё луиз Владислав Губаев (Татышлы ёросысь Улысь Балтач гурт), куинетӥ интылы – Эдгар Зайнуллин (Ямады). Нылъёс пӧлын тужгес ӝог луиз Юлия Набиуллина (Янаул ёросысь Выль Кирга гурт).
30-45 аресъем пиосмуртъёс пӧлын нырысетӥ интые потӥз Руслан Муллахметов (Янаулысь коррекционной школа), кыкетӥ интыын – Руслан Нуриахметов (Вязовка), куинетӥ – Ростислав Шакиров («ТрансТелеком»). 46 ареслэсь бадӟым пиосмуртъёс пӧлын вормисе потӥз Инзил Хабибуллин («Игры разума», Янаул), кыкетӥ интыын – Павел Нурисламов (Ямады), куинетӥ – Рамиль Мухаметханов (МЧС, Янаул).
Ӵошатсконэ вуэмъёсты пӧсь чаен но ческыт табанен куноязы. Тазалыкез кыдатонлы сӥзем ужрадысь котькин ӝутскем мылкыдын кошкиз.
Людмила ТИМИРШИНА.
Оставить сообщение: