Башкортостанысь Сельхозконсультированияя центрлэн лыдпусъёсызъя, республикаын огъя 2148 сюрс тонна ю тысь дасямын. Ю тысьлэн удалтонлыкез шор лыдын гектарысьтыз 17,6 центнер усе. Архангельск, Баймак, Зилаир, Краснокама, Стерлибаш, Шаран ёросъёсысь гурт хозяйствоосын ю тысь дасян кематэк йылпумъяськоз: быдэстоно ужзылэн 20%-эз гинэ кылемын.
Республикаысь Гурт хозяйствоя министерство, ю тысь октон дыр кутскем дырысен, комбайнёръёслэсь ужзэс эскере, ужазы усточиосты дунъя. Стерлитамак ёросысь «Агропредприятие им. Калинина» ООО-ысь комбайнёр Ахмет Фаттахов 21 сюрс 470 центнер кутсам ( комбайн Claas Tucano-470). Татышлы ёросысь «Урожай» ООО-ысь Ринат Адиевлэн но нимыз вормисьёс пӧлын. «Вектор-410» комбайнэныз со 920 гектар музъемысь тысё культураосты октэм.
Сюресмы «Рассвет» СПК-е вуттӥз. Татын но ӟырдыт дыр. Зоръёслэсь акыльмем бусыосын комбайнъёс, тракторъёс ужало. Хозяйствоен кивалтӥсьлэн Альберт Минлебаевлэн кылъёсызъя, нуналъёс шундыё улысалзы ке, ю тысь дасян йылпумъяськысал ни. Кивалтӥсь пусъе, кык-куинь нуналскын ужзы йылпумъямын луыны кулэ шуыса. Хозяйствоысь валтӥсь агроном Андрей Шайхуллин но солы дурбасьтэ. Кивалтӥсь но, ӧнерчиос но, ужасьёс но азьпалан куазьлэн шулдыр улэмезлы оско. Валтӥсь агрономлэн кылъёсызъя, туэ рассветъёслэн пудо-сиён сярысь сюлмаськонзы уз луы: сенаж, силос, турын тырмыт дасямын. Азьпалан бадӟым ужпум – 250 гектар бусыысь кукурузаез октоно, 150 гектарысь вика кутсано. Ӧнерчиез одӥгез сюлмаськытэ: туэ ю тысьлэн удалтонлыкез ушъяськымон ӧвӧл, пе. Йыды гектарысьтыз 11 центнер усем, сезьы – 12 центнер, чабей – 10 центнер.
Хозяйствоысь ӟеч ужасьёссы сярысь юанмылы, кивалтӥсь тракторист Олег Зарипов сярысь гожтыны ӵектӥз. Арлэн котькыӵе вакытаз, котькыӵе ужез, пе, солы оскыны луэ.
Олег Зарипов 2004-тӥ арысен «Рассвет» СПК-ын ужа. Солэн кылъёсызъя, быръем ужез туж, пе, кельше. Тракторист бусые вазь тулыс потэ, ужез солэн бер сӥзьыл йылпумъяське. Тулыс О. Зарипов кизёнын сюлмысь тыршем, гужем турын дасям, сенаж, силос нуллэм. Ми вуылон нуналэ со викаез турна вал. Усто тракторист толалтэ но ужтэк уз пукы, фермаын миксерен пудоослы сиён пыртоз.
Валтӥсь агрономлэн кылъёсызъя, ю-нянь дасянын пусйымон ужъёссы комбайнёръёслэн Е. Галиаскаровлэн, А. Гузаировлэн, А. Зиянгировлэн, Р. Каюмовлэн, А. Мухаяровлэн, В. Мухаяровлэн, соослэн юрттӥсьсылэн Я. Фазлыевлэн, водительёслэн Е. Гильфановлэн, О. Зидыгановлэн но В. Шайдуллинлэн.
Аран, кутсан сяна, ю тысез дыраз куасьтон сярысь но сюлмаськоно. Жадёнэз валатэк КЗС-ын тыршо Р. Габоков, А. Галиханов, К. Гильмияров. Амбарын чабей куасьто Г. Гарифьянов, К. Хусаинова, О. Ушиярова, Р. Давлетшина, Л. Шайсламова, Ф. Мухаметханова (туспуктэм вылын паллянысен буре).
Ю тысь дасянэн ӵош хозяйствоын кын улэ гырон ужъёс азинско. Валтӥсь агроном В. Ахметовлэсь, А. Гильфановлэсь, В. Зидымаковлэсь, Р. Салимовлэсь, Г. Шаймардановлэсь, Г. Шартдиновлэсь, Ф. Ямалетдиновлэсь ужъёссэс пусъе. Толйись культураосты кизён хозяйствоын йылпумъяськемын ни.
Миляуша БУЛАТОВА.
Татышлы ёрос.
Оставить сообщение: