icon_gotop
18+
autorisation
Войти | Регистрация
Время в Татышле
00:37
Пятница, 29 Марта
Рекламный баннер 990x90px top

Ыжгонмес но лӧдӥськом, гын сапегмес но кышъяськом

14:08 27.08.2015

Туэ соос малпанъёссэс уж вылын эскерыны малпазы. Озьы нырысьсэ «Быдэ вуон» ужрад ортчиз. Егитъёсты Татышлы ёросысь Вязовка гуртын пумитазы. Азьпалтыса верало, тросэз пиос татын кужымзэс эскерыны ӧз дӥсьтэ. Озьы 21-тӥ гудырикошконэ татысь культура юртысь сцена вылэ куать нылъёс но куинь пиос потӥзы. Соосты ӟечкыласа Кальтяй гурт поселенилэн администрациеныз кивалтӥсь Р. Н. Гарипов, БР-ысь удмуртъёслэн историяя но культурая центренызы кивалтӥсь Л. З. Рахимьянова вераськизы. Соос огкылысь егитъёс понна таӵе ужрадлэсь кулэлыксэ пусйизы. Собере сцена вылэ потӥзы конкурсэ пыриськисьёс пӧлысь нырысетӥосыз – Лилиана Нуриахметова но Радис Гайниятов. Зэм, татысь сцена вылын соос асьсэды зэмос кузёосын шӧдо. Егитъёс кыксы ик Вязовкаын вордскемын но быдэ вуэмын, татысь культура юртын кырӟаны-эктыны дышетскемын. «Визитка» конкурсын но учкисьёс соослэсь таӵе быгатонлыксъёссэс вылӥ дунъязы. Паймымонэсь ик вылэм асьмелэн егитъёсмы. Сцена вылын сое яркыт возьматӥзы Татышлы ёросысь Калмиярысь Ксения Нуриева, Бальзюгаысь Изабелла Шайхуллина, Уразгильдыысь Виталий Зинатуллин, Янаул ёросысь Выль Варяшысь Ксения Нигиева, Удмурт Элькунысь Надежда Антонова, Уфаысь Эдуард Шайдуллин, Балтач ёросысь Асавкаысь Света Самиева. Конкурсэ нылъёс ческыт удмурт калык пӧръёсын вуиллям, перепеч, табань, калягалэсь ныро пыжиллям.

Вязовкаос егитъёслы пӧртэм тунсыко конкурсъёс дасяллям. Тани сцена вылэ кызьпу вайёсты поттӥзы. Нылъёслы но пиослы веник, пе, керттоно луоз. Кинлэн меда тужгес чебер пӧрмоз? Егитъёс бадӟым ужзэс быдэстыку, учкисьёсты чебер кырӟанэныз шулдыртӥз гуртысь пинал кырӟась Валерия Камалтдинова. Вениксы тужгес усто пӧрмиз Ксения Нуриевалэн, Ксения Нигиевалэн но Радис Гайниятовлэн. Ужрадэз дасясьёслэн егитъёслэсь быгатонлыксэс дунъянзы таин гинэ ӧз йылпумъяськы. Табере пиослы пичи дыразы берытсконо луиз. Соос асьсэ киосынызы  пӧртэм шудонъёс лэсьтӥзы. Тани Радис Гайниятов трактор пӧрмытэм, нош Виталий Зинатуллин но Эдуард Шайдуллин пичи дыръязы самолётэн тросгес шудӥллям, лэся.

Нош нылъёслэсь – вуоно кенъёслэсь – сугон пуконаны быгатэмзэс эскерыны малпаллям. Кинъёслы ке таиз конкурс тужгес секыт потӥз, дыр, нош Ксения Нуриевалэн, кылсярысь, сугон пуконэз капчиен но ӝог йылӥз. Эдуард Хайруллинлэн ӟуч кырӟанэз но юрттӥз кадь  солы тазэ ужзэ быдэстыны. Та вакытэ пиос но малпаськонэ усизы – кыӵе конкурс вите меда соосты азьпалан? Ужрадэз дасясьёслэн малпамзыя, толлы дасяськыны дыр, пе, вуэмын ни. Озьыен, пась гын сапегъёсты кышъяно. Тазэ толэз шуныт пыдкутчанэн ортчытоз Виталий Зинатуллин.

Сцена вылэ выльысь нылъёсты ӧтизы. Зэм, пиос но ӧз чидалэ соос вӧзы пуксьытэк. Егитъёслы лӧдыны быдэс мешок ыжгон поттӥзы. Нылъёслы ужаны шулдыр кырӟанэн Мариалина Нуриахметова юрттӥз. Таяз конкурсын Света Самиевалы вуисьёс ӧз луэ. Солэн ки улаз ыжгон буй-буй сиосын пуксиз. Нош визьмын кыӵе меда туала егитъёс? «Удмуртъёс азьвыл кыӵе пӧйшурлэсь кузэ коньдон интые куто вылэм?» - юазы ужрадэз нуисьёс соослэсь. Таизлы юанлы Изабелла Шайхуллина валэктон шедьтӥз. Нош собере висъяськизы на Надежда Антонова но Лилиана Нуриахметова.  Надежда пу вандонын но устоосыз пӧлын луиз. «Семьяямы пимы ӧвӧл. Соин ик мон ваньзы понна ужано луисько», - шуиз егит ныл со пумысен. Таяз конкурсын задорлыкеныз висъяськиз Ксения Нуриева. Со секыт ужез но капчи мылкыдын быдэстыны быгатэ вылэм.

Егитъёсты вите на вылэм гозы вылтӥ тэтчан. Одӥг, кык… вить. Лилиана Нуриахметоваен Радис Гайниятовлэн та лыдпуссы 12-лы ӵошаз. Соос мукетъёсты шӧдскымон азьпалтӥзы. Ужрадэз йылпумъяса, егитъёс кырӟаны –эктыны устолыксэс возьматӥзы. Конкурсын соослэн ваньзылэн сямен быгатонлыксы вить баллэн дунъямын.

Учкисьёс шӧдытэк но кылизы, лэся, ужрадлэсь быремзэ. Соослы вормисьёслэн нимъёссы гинэ тодмо ӧй вал. Соин кыл сётӥськиз БР-ысь удмуртъёслэн историяя но культурая центренызы кивалтӥсь Л. З. Рахимьяновалы. Со пӧртэм номинациосын вормисьёсты дипломъёсын но синпель кузьымъёсын данъяз. Нош нырысетӥяз конкурсын нырысетӥ интые потӥзы кузёос – Лилиана Нуриахметова но Радис Гайниятов.

Ольга НИГАМАТУЛЛИНА.

8186

Оставить сообщение: