Республикамылы быдэс дуннеысь куноосты пумитаны дасяськон понна куинь ар кулэ луиз. «Башкортостанын ШОС но БРИКС саммитъёсты пумитан – бадӟым дан, - вера республикамылэн тӧроез Рустэм Хамитов кунгож сьӧрысь журналистъёсын пумиськоназ. – Со – бадӟым уж».
Табере шоркармес но, кылсярысь, Пекинэн, Москваен, Шанхаен, Бразилиен, Нью-Делиен одӥг радэ пуктыны луоз. Чылкак отын но мукет городъёсын пӧртэм аръёсы ШОС но БРИКС шаеръёслэсь тӧрооссэс пумитазы.
Туэ республикамы шӧдскымон азьпала вамыштӥз – асьмеос пӧртэм шаеръёсысь тӧроосты пумитаськом. Соосын кивалтоно кунъёслэн огъя быдӟалазы дуннелэн одӥг куиньмосэзлы ӵоша. Отын музъем вылысь калыклэн ӝыныезлы матэез улэ. Соин республикамылэн кивалтэтэз саммитъёслэн бадӟым пайдаен ортчонзылы оске. «Уфа туала куронъёслы тупась отельёсын тырмытэмын. Озьыен, шоркармы туристической центрлы но пӧрмыны быгатысал. Асьмелэн куноослы возьматыны чебересь интыосмы трос», - вераз республикамылэн тӧроез.
Башкортостан Республикалэн кивалтэтэз саммитъёслэн нырысетӥ нуналъёсаз ик пӧртэм шаеръёсын эшлыко кусыпъёс тупатон сярысь сюлмаськиз. Кылсярысь, та нуналъёсы Китайысь, Таджикистанысь, Кыргызстанысь пӧртэм регионъёсын огкылъёс кутэмын ни. «Табере та выллем ужъёсты нуиськом Индиен. Со сяна, Бразилиысь куноос тунсыко малпанъёссэс шараяло», - вера Рустэм Хамитов.
ШОС но БРИКС саммитъёс дасэтӥ пӧсьтолэзёзь кыстӥськозы. Солэн ужаз Россия Федерацилэн Президентэз Владимир Путин но пыриськоз. Та нуналъёс куспын со БРИКС шаеръёслэн тӧроосынызы нимысьтыз пумиськылыса кенешыны чакла. Со сяна, РФ-лэн Президентэз «аутрич» амалэн радъяськоно заседание пыриськоз. Саммитъёс бере трос ужкагазъёс кутэмын луозы. Кылсярысь, тӧроослы ШОС-эз 2025-тӥ арозь азинтонъя стратегия дасяно. Со сяна, ШОС-лы ёзчиосы Индиез но Пакистанэз кутон ласянь ужкагазъёсты дасян борды басьтӥськоно.
Дасяз Ольга
НИГАМАТУЛЛИНА.
Оставить сообщение: