- Нефтекамскысь кивалтӥсьёс - Генеральной директор Станислав Молодцов, финансовой ужпумъёсъя кивалтӥсь Валерий Пантус, юридической ужпумъёсъя кивалтӥсь Вадим Шафиков, снабженец Никита Молодцов – хозяйствоямы вуэмен, калык уждун басьтыны кутскиз. Гуртоослэн мылкыдзы ик ӝутскиз кадь, доразы пукисьёс но ужаны потӥзы. Тулыс гырон-кизён ужъёсты вакытаз йылпумъямы. Огъя 1250 гектар гыроно-кизёно бусыосы 220 гектар чабей, 130 гектар йыды, 75 гектар кукуруз, 65 гектар суданка, 60 гектар сезьы, 66 гектар викаен чабей, 190 гектар ӟег но 250 гектар трос аръем турын киземын. Кӧня ке гектар музъем пар улэ кельтэмын. Вераны кулэ, бускель гуртысь «Салават» ООО но юрттэт возьматэ, - вера хозяйствоысь бухгалтер Гузель Шаяхметова.
Кивалтэт хозяйствоысь валтӥсь ужпумъёсты радъянэз валтӥсь инженерлы Виталий Шамшияровлы оскиз. Кема аръёс ӵоже гурт удысын тыршем воргорон ужез борды лулысь-сюлмысь басьтӥськиз. Фермаын шуг-секытъёс кылдо-а, бусыын трактор тӥяське-а, Виталий Карамутдинович котьку юрттыны дась, солэн гурт хозяйствоын валамтэ-тодымтэ ӧрез ик ӧвӧл, лэся.
Дэменъёс ёрос Сабантуе но пыр-поч дасяськиллям. Удмурт юртэз усто возьматэмзы понна, соосты «За сохранение национальных традиций» номинациысь нырысетӥ степенё дипломен пусйиллям. Ужрадэ вал, тачанка дасямзы понна но хозяйстволы нырысетӥ инты сётӥллям.
Али дэменъёс пудо сиён дасян бордын тыршо. Ужасьёслы зоро-кото нуналъёс но уг люкето.
- Арлэн котькыӵе вакытаз тыршыса ужало механизаторъёс Алексей Саитов, Александр Шаяхметов, Захит Тимиргалиев, комбайнёр Анатолий Атнафиков, – вера Виталий Шамшияров. - Соослы хозяйствоысьтымы котькуд ужез оскыса сётыны луэ.
Гужем куазь пӧртэм луэ. Ӵукна шунды пиштэ, нош ӝытпал витьымтэ шорысь зорыны кутске. Куазь зоре ке, дэменъёс сенаж поно, зорымтэ дыръя турынэ пото. Гуртын котькыӵе куазен но уж шеде.
Гурт калык ужтэк пукыны уг чида. Хозяйствоын вакытаз секыт югдур кылдэмын ке но вал, гурт ӧз быры, со сяськая, ульчаосын йыгмыт сыло ӝужытэсь, чебересь кирпич коркаос. Пусъёно, гуртысь тросэз воргоронъёс палэнэ ветлыса ужало. Нош гурт удысэз быръемъёс котьку татын тыршизы, али но тыршо. Соослэн выль кивалтэтлы осконзы бадӟым: азьпалан «Дэмен» ООО ӟеч возиськись хозяйствоос пӧлын лыдъяськоз.
Миляуша БУЛАТОВА.
Бурай ёрос.
Оставить сообщение: