Ужен но ӟеч кылын юрттӥсь

Татышлы ёросысь Кал­мияр гуртысь Лида Ахмет­зянова но улонэзлэсь 15-тӥарзэ ни оген улӥсь пере­сьёсты утёнлы сӥзе. Туннэ нуналэ солэсь юрттыны ву­эмзэ, нылзэс сямен, Калми­ярын, Петропавловкаын но Савкиязын улӥсь дас одӥг арлыдоос витё. Лида Набио­ковна соослы котькудзылы саклык висъяны, котькудзы доры сюрес шедьтыны тыр­ше. «Одӥг нуналэ Калмия­рын но Петропавловкаын ке юрттӥськисько, ӵуказеяз Савкиязэ мынӥсько. Утёно песянай-песятайёсы ваньзы сямен оген уло, одӥгез гинэ пиеныз - со но сӧсыр», - вера Лида апай.

Савкияз гурт Лида апай­лэн гуртэзлэсь тямыс иськем огпала пуксемын. Отчы со гу­жемен-толэн нялтас мынӥсь машинаен яке пыдын ветлоно луэ. Татын Л. Ахметзяноваез сизьым арлыдоос возьмало. Сюлмаськись но лякыт кыш­номурт борды соос сокем биниськиллям, сое нокинэн воштэмзы уг поты. Лида На­биоковна висьыны усьыкуз, со интые кузпалызлы ужаны ветлоно луэм. «Песянайёс Лидаез возьмало. Ку ачиз ми доры вуоз ни шуыса юало», - вера Лида апайлэн Темырзян кузпалыз. Утёно пересьёсыз пӧлысь тужгес бадӟымезлы 90 арес.

Социальной ужасьлы юрт котырын пӧртэм гурт ужъ­ёсты быдэсъяно луэ. Оген улӥсь пересьёслэн пӧртэм ужпӧръёссы люкасько.Со­осты ваньзэ песянайёслы сюлмазы кельшымон быдэ­стыны тыршоно. Быдэстоно ужъёсыз пӧлысь Лида апайлы тужгес секыт потэ пельпум вылын ошмесысь ву ворттон. Солы ошмесысь сяна, нуналаз гудӟемысь но олокӧня карнан ву пыртоно луэ.

Пересьёсты утись ужаны гинэ шаплы луыны кулэ ӧвӧл, со вазиськись, кайгу-курек­тонэз люкыны быгатӥсь мед луоз на. Угось оген улӥсь пересь но висись адямиос тросэз шудтэм луо яке та­залыкенызы курадњо. Соин пересьёсты утись котькуд­зылы шуныт, буйгатӥсь, ӟеч кылыныз но юрттыны быга­тыны кулэ. Со пумысен Лида апайлэн шугъяськонэз ӧвӧл. Со котькуд утёно пересьёсыз­лэсь сямъёссэс вить чиньыез кадь тодэ ни. Соин уж дураз валамтэос уг пумисько. Нош кылем арын Лида Набиоков­наез праздник нуналазы ёрос Тау карон гожтэтэн пусйиз.

Марина НИКОЛАЕВА.

Татышлы ёрос.