icon_gotop
18+
autorisation
Войти | Регистрация
Время в Татышле
20:03
Четверг, 28 Марта
Рекламный баннер 990x90px top

Удмуртлыксэс утьыны сюлмасько

08:52 18.12.2014

Каменск-Уральск палъёсын

Мартюш посёлок Каменск ёросэ пыре, кыдёкын ик лу­ымтэ Каменск-Уральск город вӧзы интыяськемын луэ. Та посёлокын улӥсьёс пӧлын но удмуртъёс вань. Свердловск улосвылын улӥсь удмуртъё­сын тодматсконмы Мартю­шысен кутскиз.

Татысь библиотека доры вуимы гинэ, милемыз шулдыр удмурт кырӟанъёсын «Зан­гари» фольклор ансамбль пумитаз. Ансамбль кык ар талэсь азьвыл кылдӥз. Арти­стъёсты библиотека огазея, соос татчы ӵем люкасько, библиотекаын но пӧртэм ин­тыосын ортчылӥсь ужрадъ­ёсы пырисько. Ансамбльлэн кивалтӥсез О. В. Иванова Юля внучкаеныз чебересь кылбур чуръёс лыдӟизы. Пичи ны­лашлэн удмурт сямен верам чуръёсыз мусо кылӥськизы. Озьыен, песяйёссы внукъёс­сэс удмурт кыллы дышетон сярысь сюлмаськонэн уло. Библиотекалэн кивалтӥсез Н. А. Савинова асьсэлэн ужъ­ёсынызы, пӧртэм аръёсы басьтэм вормонъёсынызы тодматӥз. Библиотекарьёс И. Л. Кавкаева, Г. Н. Полу­яхтова, Н. С. Гордеева «Уд­муртия – край родниковый» презентация дасяллям. Нош «Урал Кенеш» огазеяськон­лэн ёзчиез О.Т. Шамшиярова удмурт костюмлы презента­ция возьматӥз. Ольга Тимер­шиновна пӧртэм аръёсы нул­лоно удмурт дӥськутъёс ся­рысь тунсыко вераз. Ужрадэ Каменск-Уральскысь куль­турая центрлэн кивалтӥсез Г. Н. Спешилова но вуиз. Га­лина Николаевна удмурт сэреглэн усьтӥськемезлы шумпотон мылкыдзэ возьма­тыса вераз:

- Мон пичи гинэ вал ай татчы улыны лыктыку. Ачим удмурт луисько, удмурт ша­ерын вордӥськемын. Нош жаляса верано: удмурт кылме уг тодӥськы ни, али удмурт кырӟанъёсты кылыса синву­аськытэк ӧй чида. Малпасько, библиотекаын кутскем уж умой азинскон басьтоз, нош ми ӟеч малпандэс улонэ но ужады пыӵатыны юрттомы.

Центральной библиоте­калэн валтӥсь методистэз, Каменск-Уральскысь наци­ональной но религиозной общественной огазеясь­конъёслэн Консультатив­ной советсылэн членэз Т. А. Дьячкова ужрадэ люкась­кемъёсты ӟечкыласа шуиз:

- Берло дыре асьмеос ӵемысь толерантность кы­лын пумиськиськомы. Толе­рантность – со чидан, чидан­лык, ог-огдэ валаны тыршон. Куке пӧртэм культураос, пӧртэм кылын вераськись калыкъёс ог-огзэс валаса, ог-огзылы усьтӥськыса уло, ӟеч кусыпъёс тупатыны быга­то – улон умой азинске. Мон удмурт калык шоры котьку гажаса учкисько. Культура­ды, сям-йылолъёсты, ворд­скем кылды ноку но медаз ышы, медаз вуны.

Удмурт сэрегез усьтон ужрадэз шулдыресь удмурт кырӟанъёсын, эктонъёсын узырмытӥз Екатеринбургысь вуэм «Ошмес» ансамбль. Бӧрысь программа библиоте­каысь шаертодонъя музей­ын азьланьтӥськиз. Татын пӧртэм калыкъёслэн ко­стюмъёсынызы экспозициос дасямын вал.

Вань сыӵе город - Дегтярск

Дас ньылетӥ толсуре пумиськонмы Дегтярск городысь библиотекаын азьланьтӥськиз. 1914-тӥ арын татын серный колче­дан поттыны кутскиллям. Дегтярск Екатеринбурглы матын луэ, азьвыл сое Рев­да городэ пырто вылэм. Нош Дегтярск нимаз городэн 1954-тӥ арын лыдъяськыны кутскем. 1990-тӥ арозь го­родлэн валтӥсь ужез медной руда поттон луэм. Та город сярысь азьвыл кылылэме гинэ вал. Тросэз ми палась удмуртъёс татчы уж утчаса вуылӥллям. Семьяосынызы лыктыса та городэ «выжы­зэс» лэзиллям. Городэ пырон азьын аспӧртэм луись гуре­зьёслы пайми. Со гурезьёсты «Горы-терриконы» шуо. Гуре­зьёс, шахтаосысь поттэм буш породаосты огазе люкаса кылдэмын. Озьыен, татын шахтёръёс, пӧртэм инженер­но-технической ӧръёсъя ужасьёс уло. Городысь куль­турая дворецэ интыяськем библиотекаын туж шуныт пумитазы. Татысь библиоте­каын ужась И. Т. Зайнуллина библиотекалэн историеныз тодматӥз, удмурт калыклэн культураезлы сӥзем наци­ональной сэрегез усьтон сярысь вераз. Культурая юртэн кивалтӥсь Е. В. Кошина шумпотон мылкыдын шуиз:

Ми туннэ туж шум-потӥськом, котькуд уж­мес библиотекаен ӵошен лэсьтӥськомы. Валче ужась­комы, пӧртэм ужрадъёс ортчытӥськомы, ог-огмылы юрттӥськомы. Удмурт сэ­регез усьтыса,малпасько, библиотекамылэн выль ворвор­монъёсыз трос луозы.

Городысь библиотечной системалэн кивалтӥсез Л. В. Мазурова шуиз:

- Улонын вань­мыз воштӥське. Табере библио­текаос но ужазы выль амалъёс утчало. Библио­текаосы адямиос книгаос лыдӟыны гинэ ӧвӧл, ог-огенызы пумись­кыны но лыкто. Пӧртэм клубъёс, огазеяськонъёс кылдытыса ужмы выльме, выль проектъёс сярысь мал­паськыны кутскиськомы. Мон малпасько, туннэ нунал кемалы тодэ кылёз. Нош кутсконмы тунсыко ужъёслы но выль пумиськонъёслы ӟеч азинскыны юрттоз.

Ужрадэз азьланьтыса, удмурт костюмъёслы сӥзем презентацизэ Ольга Шамши­ярова возьматӥз. Дегтярск городысь «Италмас» ансамб­льысь кырӟасьёс но та горо­дын улӥсь Елизавета Саби­рова Настя внучкаеныз че­бересь удмурт кырӟанъёсты быдэстӥзы. Удмурт сэрег усьтӥськон ужрад Дегтяр­скысь удмуртъёс дорын но туж шуныт ортчиз.

Пумиськонъёс бере

малпанъёс

Кык нунал ӝог ке но орт­чиз, соослэн шунытсы быдэс улонамы тодэ кыльымон луиз. Ми, редакциын ужа­сьёс, А. Г. Зайноков, А. В. Самирзянов, Арибаш гуртысь гожъясьмы Л. З. Гараева Свердловск улосвылысь удмуртъёслы: «Урал кенеш» огазеяськонлэн ёзчиосызлы Ольга но Георгий Шамши­яровъёслы, Екатеринбур­гысь «Ошмес» ансамбльысь кырӟасьёслы Василий но Наталья Абдуллинъёслы, Валентина Пантюхиналы, Светлана Лекомцевалы, Каменск-Уральскысь «Зан­гари» ансамбльлы, Ольга но Вячеслав Зариповъёс­лы, Николай но Алефтина Уфимцевъёслы, Дегтярскысь «Италмас» ансамбльлы но библиотекарьлы И. Т. Зай­нуллиналы пумтэм тау кылъ­ёсмес вераськомы. Милемыз келяса эшъёсмы кырӟазы:

- Ой, сюлэмы, сюлэмы

Марлэсь меда лэсьтэмын?

Пулэсь, излэсь,зарни, азвесь-

Ваньмыз ик вань сюлэмын…

Свердловск улосвылысь удмуртъёсын пумиськонамы но ваньмыз вал: шумпотон но пальпотон, сюлмысь верась­конъёс, удмурт кырӟанъёс но эктонъёс, ас калыкедлэсь мӧзмыса синвуаськонъёс, вордӥськем калыксылэсь, ас шаерзылэсь палэнын улӥсь удмуртъёслэн удмуртлык­сэс, ас кылзэс юн яраты­ны быгатэмзылы паймон, выль пумиськонъёсмылы, ог-огенымы юн кусыпъёс тупатыны быгатонлы оскон.

Ваньмыз фотоос http://vk.com/album-38983890_208115247

Ирина САМИГУЛОВА.

Свердловск улосвыл.

9802

Оставить сообщение: